Sri Dakshinamurthy Navamani Mala Stotram – ಶ್ರೀ ದಕ್ಷಿಣಾಮೂರ್ತಿ ನವಮಣಿಮಾಲಾ ಸ್ತೋತ್ರಂ

ಸ್ತೋತ್ರನಿಧಿ → ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಗಳು →  ಶ್ರೀ ದಕ್ಷಿಣಾಮೂರ್ತಿ ನವಮಣಿಮಾಲಾ ಸ್ತೋತ್ರಂ

ತೇಜಃಕಿಂಚಿತ್ಕಾಂಚನಟಂಕೀಕಪಿಶಾಭಾನ್
ಬಿಭ್ರದ್ಬಭ್ರೂನುದ್ಭಟಕಾಪರ್ದಕಲಾಪಾನ್ |
ಭಸ್ಮಾಲೇಪಸ್ಮೇರಲಲಾಟಂ ವಟಮೂಲೇ
ದೃಷ್ಟಂ ದುಷ್ಟಾಪಸ್ಮೃತಿಹಾರಿ ಸ್ಮರಹಂತೃ || ೧ ||

ನ್ಯಗ್ರೋಧಾಧೋ ಧಿಕ್ಕೃತಧಾರಾಧರಧೀರ
ಗ್ರೀವಾಭೋಗಂ ಭೋಗಿಕುಲಾಕಲ್ಪಮನಲ್ಪಮ್ |
ಮುಗ್ಧಾಕಾರಂ ಮುಗ್ಧನಿಶಾನಾಥವತಂಸಂ
ಮುಗ್ಧಸ್ಮೇರಂ ಮೋಹವಿರಾಮಂ ವಿಮೃಶಾಮಃ || ೨ ||

ನಾಸಾದತ್ತಾಲೋಕನಯಾನಾವ್ಯಸರೋರು-
-ಟ್ಕಿಂಜಲ್ಕಾಳಿಪಿಂಗಜಟಾಜೂಟಕವತ್ಯಾ |
ಪ್ರೌಢಾಪಸ್ಮಾರಸ್ಮಯಿತಾಘಸ್ಮರಶಕ್ತ್ಯಾ
ಚಿತ್ರೀಭೂತಂ ಚಿತ್ಕಳಯಾ ಮಾಮಕಮಂತಃ || ೩ ||

ವಿದ್ಯಾರೂಪೇ ವೇದಗಿರಾಮೇ ಕವಿಮೃಗ್ಯೇ
ನದ್ಯಾಮೌಳೌ ನರ್ತನಶೀಲಾಲಕಚೂಡೇ |
ಆಲೀನಂ ಮೇ ಮಾನಸಮಾಲೀಢಮನೋಭೂ-
-ಗಾಢಾಹಂಕಾರಾಂಕುರಲಾಲಾಟಕೃಶಾನೌ || ೪ ||

ವೈಯಾಘ್ರತ್ವಕ್ಚಿತ್ರಪಟೀಕ್ಲುಪ್ತಕಟೀಕಾ
ಟೀಕಾಕಾರಜ್ಞಾನಸಮುದ್ರಾನಿಗಮೋಕ್ತೇಃ |
ಮುಕ್ತೇರ್ಮಾತಾ ಮೂಲಮಪಾರಸ್ಯ ಮಹಿಮ್ನ-
-ಶ್ಚಿದ್ವೈದಗ್ಧ್ರೀ ಕಾಂಚನ ಚಿತ್ತೇ ಮಮ ಭಾತಿ || ೫ ||

ಇಂದೂತ್ತಂಸಂ ಕಾಳಿಮಕಂಠಂ ಶಿಖಿನೇತ್ರಂ
ಸಿಂದೂರೋಷ್ಠಂ ಶುದ್ಧತನುಂ ಬದ್ಧಫಣೀಂದ್ರಮ್ |
ಭಾಧೀಶಾಭಾಭಾಸುರಹಾಸಂ ಭವಮಂತಃ
ಶಾರ್ದೂಲತ್ವಗ್ವಾಸಸಮೀಶಂ ವರಿವಸ್ಯೇ || ೬ ||

ಮುದ್ರಾ ಕಾಚಿತ್ ಜ್ಞಾನಮಯೀ ಯಂ ಮುನಿಶಂಸ-
-ನ್ಮೋಹಧ್ವಾಂತೋತ್ಕರ್ತನವೈಕರ್ತನಮೂರ್ತೇಃ |
ಆರ್ತಿಂ ಭಿಂದ್ಯಾದಾಶಯಲಗ್ನಾಮನಿಶಂ ನೋ
ನೈಯಗ್ರೋಧೀಂ ಮೂಲಭುವಂ ಚಾಧಿಶಯಾನಾ || ೭ ||

ನೀಹಾರಾಂಭೋ ಹಾರಸಿತೈರಾವತಗಂಗಾ
ಪಾಟೀರಾಳೀ ಭೂತಿಸುಧಾತಧೌವಳಕ್ಷಮ್ |
ಸದ್ರುದ್ರಾಕ್ಷಸ್ರಗ್ಧರಮುದ್ರಾಕ್ಷಮನಕ್ಷ-
-ಸ್ಪಂದಂ ಮಂದಸ್ಮೇರಮನಾದಿಂ ಗುರುಮಂತಃ || ೮ ||

ಘೋರಾಪಸ್ಮೃತ್ಯುತ್ಕಟಪೃಷ್ಠೇ ವಿನಿವಿಷ್ಟೋ
ಯಸ್ಯೈಕೋಂಘ್ರಿಸ್ತತ್ಪೃಥುಲೋರು ಸ್ಥಿತಿರನ್ಯಃ |
ವಸ್ತುಧ್ಯಾನಾದುದ್ಧೃತನಿಷ್ಪಂದಶರೀರಂ
ಶಾಂತಂ ತೇಜಸ್ತನ್ಮಹಿಮಾನಂ ಸಮುಪಾಸೇ || ೯ ||

ಏತಾಂ ಮಾಲಾಂ ನವಮಣಿರೂಪಾಮಾದಿಗುರೋ-
-ರ್ಭಕ್ತ್ಯಾ ನಿತ್ಯಂ ಪಠತಿ ಚ ಯೋ ಜಾಡ್ಯವಿಮುಕ್ತಃ |
ಅಷ್ಟಾಚತ್ವಾರಿಂಶತಿ ಸಾಹಸ್ರಸಮತ್ವಂ
ಗತ್ವಾ ತಸ್ಮಿನ್ ವಿಲಯಮುಪೈತ್ಯೇವ ಸ ಧನ್ಯಃ || ೧೦ ||

ಇತಿ ಶ್ರೀನವನಾಥಸಿದ್ಧಕೃತ ಶ್ರೀ ದಕ್ಷಿಣಾಮೂರ್ತಿ ನವಮಣಿಮಾಲಾ ಸ್ತೋತ್ರಮ್ ||

---

ಇನ್ನಷ್ಟು ಶ್ರೀ ಶಿವ ಸ್ತೋತ್ರಗಳು ನೋಡಿ. ಇನ್ನಷ್ಟು ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.