Read in తెలుగు / ಕನ್ನಡ / தமிழ் / देवनागरी / English (IAST)
ಓಂ ಸಹ ನಾವವತು | ಸಹ ನೌ ಭುನಕ್ತು | ಸಹ ವೀರ್ಯಂ ಕರವಾವಹೈ | ತೇಜಸ್ವಿನಾವಧೀತಮಸ್ತು | ಮಾ ವಿದ್ವಿಷಾವಹೈ | ಓಂ ಶಾಂತಿಃ ಶಾಂತಿಃ ಶಾಂತಿಃ ||
ಓಂ ಬ್ರಹ್ಮಾವರ್ತೇ ಮಹಾಭಾಂಡೀರ ವಟಮೂಲೇ ಮಹಾಸತ್ರಾಯ ಸಮೇತಾ ಮಹರ್ಷಯಃ ಶೌನಕಾದಯಸ್ತೇ ಹ ಸಮಿತ್ಪಾಣಯಸ್ತತ್ತ್ವಜಿಜ್ಞಾಸವೋ ಮಾರ್ಕಂಡೇಯಂ ಚಿರಂಜೀವಿನಮುಪಸಮೇತ್ಯ ಪಪ್ರಚ್ಛುಃ |
ಕೇನ ತ್ವಂ ಚಿರಂ ಜೀವಸಿ | ಕೇನ ವಾಽಽನಂದಮನುಭವಸೀತಿ | ಪರಮರಹಸ್ಯ ಶಿವತತ್ತ್ವಜ್ಞಾನೇನೇತಿ ಸ ಹೋವಾಚ | ಕಿಂ ತತ್ಪರಮರಹಸ್ಯ ಶಿವತತ್ತ್ವಜ್ಞಾನಮ್ | ತತ್ರ ಕೋ ದೇವಃ | ಕೇ ಮಂತ್ರಾಃ | ಕೋ ಜಪಃ | ಕಾ ಮುದ್ರಾ | ಕಾ ನಿಷ್ಠಾ | ಕಿಂ ತತ್ ಜ್ಞಾನಸಾಧನಮ್ | ಕಃ ಪರಿಕರಃ | ಕೋ ಬಲಿಃ | ಕಃ ಕಾಲಃ | ಕಿಂ ತತ್ ಸ್ಥಾನಮಿತಿ | ಸ ಹೋವಾಚ |
ಯೇನ ದಕ್ಷಿಣಾಭಿಮುಖಃ ಶಿವೋಽಪರೋಕ್ಷೀಕೃತೋ ಭವತಿ | ತತ್ಪರಮರಹಸ್ಯ ಶಿವತತ್ತ್ವಜ್ಞಾನಮ್ | ಯಃ ಸರ್ವೋಪರಮಕಾಲೇ ಸರ್ವಾನಾತ್ಮನ್ಯುಪಸಂಹೃತ್ಯ ಸ್ವಾತ್ಮಾನಂದೇ ಸುಖೇ ಮೋದತೇ ಪ್ರಕಾಶತೇ
ವಾ ಸ ದೇವಃ |
– ಚತುರ್ವಿಂಶಾಕ್ಷರ ಮನುಃ –
ಅತ್ರೈತೇ ಮಂತ್ರರಹಸ್ಯಶ್ಲೋಕಾ ಭವಂತಿ | ಮೇಧಾದಕ್ಷಿಣಾಮೂರ್ತಿಮಂತ್ರಸ್ಯ | ಬ್ರಹ್ಮಾ ಋಷಿಃ | ಗಾಯತ್ರೀ ಛಂದಃ | ದೇವತಾ ದಕ್ಷಿಣಾಸ್ಯಃ | ಮಂತ್ರೇಣಾಂಗನ್ಯಾಸಃ |
ಓಮಾದೌ ನಮ ಉಚ್ಚಾರ್ಯ ತತೋ ಭಗವತೇ ಪದಮ್ |
ದಕ್ಷಿಣೇತಿ ಪದಂ ಪಶ್ಚಾನ್ಮೂರ್ತಯೇ ಪದಮುದ್ಧರೇತ್ |
ಅಸ್ಮಚ್ಛಬ್ದಂ ಚತುರ್ಥ್ಯಂತಂ ಮೇಧಾಂ ಪ್ರಜ್ಞಾಂ ತತೋ ವದೇತ್ |
ಪ್ರಮುಚ್ಚಾರ್ಯ ತತೋ ವಾಯುಬೀಜಂ ಛಚ್ಚ ಚ ತತಃ ಪಠೇತ್ |
ಅಗ್ನಿಜಾಯಾಂ ತತಸ್ತ್ವೇಷ ಚತುರ್ವಿಂಶಾಕ್ಷರೋ ಮನುಃ ||
ಧ್ಯಾನಮ್ –
ಸ್ಫಟಿಕರಜತವರ್ಣಂ ಮೌಕ್ತಿಕೀಮಕ್ಷಮಾಲಾ-
-ಮಮೃತಕಲಶವಿದ್ಯಾ ಜ್ಞಾನಮುದ್ರಾಃ ಕರಾಬ್ಜೈಃ |
ದಧತಮುರಗಕಕ್ಷಂ ಚಂದ್ರಚೂಡಂ ತ್ರಿನೇತ್ರಂ
ವಿಧೃತವಿವಿಧಭೂಷಂ ದಕ್ಷಿಣಾಮೂರ್ತಿಮೀಡೇ ||
[** ಓಂ ನಮೋ ಭಗವತೇ ದಕ್ಷಿಣಾಮೂರ್ತಯೇ ಮಹ್ಯಂ ಮೇಧಾಂ ಪ್ರಜ್ಞಾಂ ಪ್ರಯಚ್ಛ ಸ್ವಾಹಾ **]
– ನವಾಕ್ಷರ ಮನುಃ –
ಬ್ರಹ್ಮಾ ಋಷಿಃ | ಗಾಯತ್ರೀ ಛಂದಃ | ದೇವತಾ ದಕ್ಷಿಣಾಸ್ಯಃ | ಮಂತ್ರೇಣ ನ್ಯಾಸಃ |
ಆದೌ ವೇದಾದಿಮುಚ್ಚಾರ್ಯ ಸ್ವರಾದ್ಯಂ ಸವಿಸರ್ಗಕಮ್ |
ಪಂಚಾರ್ಣಂ ತತ ಉದ್ಧೃತ್ಯ ತತ್ಪುನಃ ಸವಿಸರ್ಗಕಮ್ |
ಅಂತೇ ಸಮುದ್ಧರೇತ್ತಾರಂ ಮನುರೇಷ ನವಾಕ್ಷರಃ ||
ಧ್ಯಾನಮ್ –
ಮುದ್ರಾಂ ಭದ್ರಾರ್ಥದಾತ್ರೀಂ ಸ ಪರಶುಹರಿಣಂ ಬಾಹುಭಿರ್ಬಾಹುಮೇಕಂ
ಜಾನ್ವಾಸಕ್ತಂ ದಧಾನೋ ಭುಜಗವರಸಮಾಬದ್ಧಕಕ್ಷ್ಯೋ ವಟಾಧಃ |
ಆಸೀನಶ್ಚಂದ್ರಖಂಡಪ್ರತಿಘಟಿತಜಟಾಕ್ಷೀರಗೌರಸ್ತ್ರಿನೇತ್ರೋ
ದದ್ಯಾದಾದ್ಯೈಃ ಶುಕಾದ್ಯೈರ್ಮುನಿಭಿರಭಿವೃತೋ ಭಾವಸಿದ್ಧಿಂ ಭವೋ ನಃ ||
[** ಓಂ ಅಃ ಶಿವಾಯ ನಮ ಅಃ ಓಂ **]
– ಅಷ್ಟಾದಶಾಕ್ಷರ ಮನುಃ –
ಬ್ರಹ್ಮಾ ಋಷಿಃ | ಗಾಯತ್ರೀ ಛಂದಃ | ದೇವತಾ ದಕ್ಷಿಣಾಸ್ಯಃ | ಮಂತ್ರೇಣ ನ್ಯಾಸಃ |
ತಾರಂ ಬ್ಲೂಂ ನಮ ಉಚ್ಚಾರ್ಯ ಮಾಯಾಂ ವಾಗ್ಭವಮೇವ ಚ |
ದಕ್ಷಿಣಾ ಪದಮುಚ್ಚಾರ್ಯ ತತಃ ಸ್ಯಾನ್ಮೂರ್ತಯೇ ಪದಮ್ |
ಜ್ಞಾನಂ ದೇಹಿ ಪದಂ ಪಶ್ಚಾದ್ವಹ್ನಿಜಾಯಾಂ ತತೋ ವದೇತ್ |
ಮನುರಷ್ಟಾದಶಾರ್ಣೋಽಯಂ ಸರ್ವಮಂತ್ರೇಷು ಗೋಪಿತಃ ||
ಧ್ಯಾನಮ್ –
ಭಸ್ಮವ್ಯಾಪಾಂಡುರಾಂಗಃ ಶಶಿಶಕಲಧರೋ ಜ್ಞಾನಮುದ್ರಾಕ್ಷಮಾಲಾ-
-ವೀಣಾಪುಸ್ತೈರ್ವಿರಾಜತ್ಕರಕಮಲಧರೋ ಯೋಗಪಟ್ಟಾಭಿರಾಮಃ |
ವ್ಯಾಖ್ಯಾಪೀಠೇ ನಿಷಣ್ಣೋ ಮುನಿವರನಿಕರೈಃ ಸೇವ್ಯಮಾನಃ ಪ್ರಸನ್ನಃ
ಸವ್ಯಾಳಃ ಕೃತ್ತಿವಾಸಾಃ ಸತತಮವತು ನೋ ದಕ್ಷಿಣಾಮೂರ್ತಿರೀಶಃ ||
[** ಓಂ ಬ್ಲೂಂ ನಮೋ ಹ್ರೀಂ ಐಂ ದಕ್ಷಿಣಾಮೂರ್ತಯೇ ಜ್ಞಾನಂ ದೇಹಿ ಸ್ವಾಹಾ **]
– ದ್ವಾದಶಾಕ್ಷರ ಮನುಃ –
ಬ್ರಹ್ಮಾ ಋಷಿಃ | ಗಾಯತ್ರೀ ಛಂದಃ | ದೇವತಾ ದಕ್ಷಿಣಾಸ್ಯಃ | ಮಂತ್ರೇಣ ನ್ಯಾಸಃ |
ತಾರಂ ಮಾಯಾಂ ರಮಾಬೀಜಂ ಪದಂ ಸಾಂಬಶಿವಾಯ ಚ |
ತುಭ್ಯಂ ಚಾನಲಜಾಯಾಂ ಮನುರ್ದ್ವಾದಶವರ್ಣಕಃ ||
ಧ್ಯಾನಮ್ –
ವೀಣಾಂ ಕರೈಃ ಪುಸ್ತಕಮಕ್ಷಮಾಲಾಂ
ಬಿಭ್ರಾಣಮಭ್ರಾಭಗಳಂ ವರಾಢ್ಯಮ್ |
ಫಣೀಂದ್ರಕಕ್ಷ್ಯಂ ಮುನಿಭಿಃ ಶುಕಾದ್ಯೈಃ
ಸೇವ್ಯಂ ವಟಾಧಃ ಕೃತನೀಡಮೀಡೇ ||
[** ಓಂ ಹ್ರೀಂ ಶ್ರೀಂ ಸಾಂಬಶಿವಾಯ ತುಭ್ಯಂ ಸ್ವಾಹಾ **]
– ಅನುಷ್ಟುಭೋ ಮಂತ್ರರಾಜಃ –
ವಿಷ್ಣು ಋಷಿಃ | ಅನುಷ್ಟುಪ್ ಛಂದಃ | ದೇವತಾ ದಕ್ಷಿಣಾಸ್ಯಃ | ಮಂತ್ರೇಣ ನ್ಯಾಸಃ |
ತಾರಂ ನಮೋ ಭಗವತೇ ತುಭ್ಯಂ ವಟ ಪದಂ ತತಃ |
ಮೂಲೇತಿ ಪದಮುಚ್ಚಾರ್ಯ ವಾಸಿನೇ ಪದಮುದ್ಧರೇತ್ |
ವಾಗೀಶಾಯ ಪದಂ ಪಶ್ಚಾನ್ಮಹಾಜ್ಞಾನಪದಂ ತತಃ |
ದಾಯಿನೇ ಪದಮುಚ್ಚಾರ್ಯ ಮಾಯಿನೇ ನಮ ಉದ್ಧರೇತ್ |
ಅನುಷ್ಟುಭೋ ಮಂತ್ರರಾಜಃ ಸರ್ವಮಂತ್ರೋತ್ತಮೋತಮಃ ||
ಧ್ಯಾನಮ್ –
ಮುದ್ರಾಪುಸ್ತಕವಹ್ನಿನಾಗವಿಲಸದ್ಬಾಹುಂ ಪ್ರಸನ್ನಾನನಂ
ಮುಕ್ತಾಹಾರವಿಭೂಷಿತಂ ಶಶಿಕಲಾಭಾಸ್ವತ್ಕಿರೀಟೋಜ್ಜ್ವಲಮ್ |
ಅಜ್ಞಾನಾಪಹಮಾದಿಮಾದಿಮಗಿರಾಮರ್ಥಂ ಭವಾನೀಪತಿಂ
ನ್ಯಗ್ರೋಧಾತ್ತನಿವಾಸಿನಂ ಪರಗುರುಂ ಧ್ಯಾಯೇದಭೀಷ್ಟಾಪ್ತಯೇ ||
[** ಓಂ ನಮೋ ಭಗವತೇ ತುಭ್ಯಂ ವಟಮೂಲವಾಸಿನೇ |
ವಾಗೀಶಾಯ ಮಹಾಜ್ಞಾನದಾಯಿನೇ ಮಾಯಿನೇ ನಮಃ || **]
ಮೌನಂ ಮುದ್ರಾ | ಸೋಽಹಮಿತಿ ಯಾವದಾಸ್ಥಿತಿಃ ಸಾನಿಷ್ಠಾ ಭವತಿ | ತದಭೇದೇನ ಮನ್ವಾಮ್ರೇಡನಂ ಜ್ಞಾನಸಾಧನಮ್ | ಚಿತ್ತೇ ತದೇಕತಾನತಾ ಪರಿಕರಃ | ಅಂಗಚೇಷ್ಟಾರ್ಪಣಂ ಬಲಿಃ | ತ್ರೀಣಿ ಧಾಮಾನಿ ಕಾಲಃ | ದ್ವಾದಶಾಂತಪದಂ ಸ್ಥಾನಮಿತಿ |
ತೇ ಹ ಪುನಃ ಶ್ರದ್ಧಧಾನಾಸ್ತಂ ಪ್ರತ್ಯೂಚುಃ | ಕಥಂ ವಾಽಸ್ಯೋದಯಃ | ಕಿಂ ಸ್ವರೂಪಮ್ | ಕೋ ವಾಽಸ್ಯೋಪಾಸಕ ಇತಿ | ಸ ಹೋವಾಚ ||
ವೈರಾಗ್ಯತೈಲಸಂಪೂರ್ಣೇ ಭಕ್ತಿವರ್ತಿಸಮನ್ವಿತೇ |
ಪ್ರಬೋಧಪೂರ್ಣಪಾತ್ರೇ ತು ಜ್ಞಪ್ತಿದೀಪಂ ವಿಲೋಕಯೇತ್ ||
ಮೋಹಾಂಧಕಾರೇ ನಿಃಸಾರೇ ಉದೇತಿ ಸ್ವಯಮೇವ ಹಿ |
ವೈರಾಗ್ಯಮರಣಿಂ ಕೃತ್ವಾ ಜ್ಞಾನಂ ಕೃತ್ವೋತ್ತರಾರಣಿಮ್ ||
ಗಾಢತಾಮಿಸ್ರಸಂಶಾಂತಂ ಗೂಢಮರ್ಥಂ ನಿವೇದಯೇತ್ |
ಮೋಹಭಾನುಜಸಂಕ್ರಾಂತಂ ವಿವೇಕಾಖ್ಯಂ ಮೃಕಂಡುಜಮ್ ||
ತತ್ತ್ವಾವಿಚಾರಪಾಶೇನ ಬದ್ಧಂ ದ್ವೈತಭಯಾತುರಮ್ |
ಉಜ್ಜೀವಯನ್ನಿಜಾನಂದೇ ಸ್ವಸ್ವರೂಪೇಣ ಸಂಸ್ಥಿತಃ ||
ಶೇಮುಷೀ ದಕ್ಷಿಣಾ ಪ್ರೋಕ್ತಾ ಸಾ ಯಸ್ಯಾಭೀಕ್ಷಣೇ ಮುಖಮ್ |
ದಕ್ಷಿಣಾಭಿಮುಖಃ ಪ್ರೋಕ್ತಃ ಶಿವೋಽಸೌ ಬ್ರಹ್ಮವಾದಿಭಿಃ ||
ಸರ್ಗಾದಿಕಾಲೇ ಭಗವಾನ್ ವಿರಿಂಚಿ-
-ರುಪಾಸ್ಯೈನಂ ಸರ್ಗಸಾಮರ್ಥ್ಯಮಾಪ್ಯ |
ತುತೋಷ ಚಿತ್ತೇ ವಾಂಛಿತಾರ್ಥಾಂಶ್ಚ ಲಬ್ಧ್ವಾ
ಧನ್ಯಃ ಸೋಸ್ಯೋಪಾಸಕೋ ಭವತಿ ಧಾತಾ ||
– ಅಧ್ಯಯನ ಫಲಮ್ –
ಯ ಇಮಾಂ ಪರಮರಹಸ್ಯ ಶಿವತತ್ತ್ವವಿದ್ಯಾಮಧೀತೇ | ಸ ಸರ್ವಪಾಪೇಭ್ಯೋ ಮುಕ್ತೋ ಭವತಿ | ಯ ಏವಂ ವೇದ | ಸ ಕೈವಲ್ಯಮನುಭವತಿ | ಇತ್ಯುಪನಿಷತ್ ||
ಓಂ ಸಹ ನಾವವತು | ಸಹ ನೌ ಭುನಕ್ತು | ಸಹ ವೀರ್ಯಂ ಕರವಾವಹೈ | ತೇಜಸ್ವಿನಾವಧೀತಮಸ್ತು ಮಾ ವಿದ್ವಿಷಾವಹೈ | ಓಂ ಶಾಂತಿಃ ಶಾಂತಿಃ ಶಾಂತಿಃ ||
ಇತಿ ಶ್ರೀ ದಕ್ಷಿಣಾಮೂರ್ತ್ಯುಪನಿಷತ್ ||
ಇನ್ನಷ್ಟು ಶ್ರೀ ಶಿವ ಸ್ತೋತ್ರಗಳು ನೋಡಿ. ಇನ್ನಷ್ಟು ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಗಳು ನೋಡಿ.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
