Read in తెలుగు / ಕನ್ನಡ / தமிழ் / English (IAST)
ಸಪ್ತಾಶೀತಿತಮದಶಕಮ್ (೮೭) – ಕುಚೇಲೋಪಾಖ್ಯಾನಮ್ |
ಕುಚೇಲನಾಮಾ ಭವತಃ ಸತೀರ್ಥ್ಯತಾಂ
ಗತಃ ಸ ಸಾನ್ದೀಪನಿಮನ್ದಿರೇ ದ್ವಿಜಃ |
ತ್ವದೇಕರಾಗೇಣ ಧನಾದಿನಿಃಸ್ಪೃಹೋ
ದಿನಾನಿ ನಿನ್ಯೇ ಪ್ರಶಮೀ ಗೃಹಾಶ್ರಮೀ || ೮೭-೧ ||
ಸಮಾನಶೀಲಾಽಪಿ ತದೀಯವಲ್ಲಭಾ
ತಥೈವ ನೋ ಚಿತ್ತಜಯಂ ಸಮೇಯುಷೀ |
ಕದಾಚಿದೂಚೇ ಬತ ವೃತ್ತಿಲಬ್ಧಯೇ
ರಮಾಪತಿಃ ಕಿಂ ನ ಸಖಾ ನಿಷೇವ್ಯತೇ || ೮೭-೨ ||
ಇತೀರಿತೋಽಯಂ ಪ್ರಿಯಯಾ ಕ್ಷುಧಾರ್ತಯಾ
ಜುಗುಪ್ಸಮಾನೋಽಪಿ ಧನೇ ಮದಾವಹೇ |
ತದಾ ತ್ವದಾಲೋಕನಕೌತುಕಾದ್ಯಯೌ
ವಹನ್ಪಟಾನ್ತೇ ಪೃಥುಕಾನುಪಾಯನಮ್ || ೮೭-೩ ||
ಗತೋಽಯಮಾಶ್ಚರ್ಯಮಯೀಂ ಭವತ್ಪೂರೀಂ
ಗೃಹೇಷು ಶೈಬ್ಯಾಭವನಂ ಸಮೇಯಿವಾನ್ |
ಪ್ರವಿಶ್ಯ ವೈಕುಣ್ಠಮಿವಾಪ ನಿರ್ವೃತಿಂ
ತವಾತಿಸಂಭಾವನಯಾ ತು ಕಿಂ ಪುನಃ || ೮೭-೪ ||
ಪ್ರಪೂಜಿತಂ ತಂ ಪ್ರಿಯಯಾ ಚ ವೀಜಿತಂ
ಕರೇ ಗೃಹೀತ್ವಾಽಕಥಯಃ ಪುರಾಕೃತಮ್ |
ಯದಿನ್ಧನಾರ್ಥಂ ಗುರುದಾರಚೋದಿತೈ-
ರಪರ್ತುವರ್ಷಂ ತದಮರ್ಷಿ ಕಾನನೇ || ೮೭-೫ ||
ತ್ರಪಾಜುಷೋಽಸ್ಮಾತ್ಪೃಥುಕಂ ಬಲಾದಥ
ಪ್ರಗೃಹ್ಯ ಮುಷ್ಟೌ ಸಕೃದಾಶಿತೇ ತ್ವಯಾ |
ಕೃತಂ ಕೃತಂ ನನ್ವಿಯತೇತಿ ಸಂಭ್ರಮಾ-
ದ್ರಮಾ ಕಿಲೋಪೇತ್ಯ ಕರಂ ರುರೋಧ ತೇ || ೮೭-೬ ||
ಭಕ್ತೇಷು ಭಕ್ತೇನ ಸ ಮಾನಿತಸ್ತ್ವಯಾ
ಪುರೀಂ ವಸನ್ನೇಕನಿಶಾಂ ಮಹಾಸುಖಮ್ |
ಬತಾಪರೇದ್ಯುರ್ದ್ರವಿಣಂ ವಿನಾ ಯಯೌ
ವಿಚಿತ್ರರೂಪಸ್ತವ ಖಲ್ವನುಗ್ರಹಃ || ೮೭-೭ ||
ಯದಿ ಹ್ಯಯಾಚಿಷ್ಯಮದಾಸ್ಯದಚ್ಯುತೋ
ವದಾಮಿ ಭಾರ್ಯಾಂ ಕಿಮಿತಿ ವ್ರಜನ್ನಸೌ |
ತ್ವದುಕ್ತಿಲೀಲಾಸ್ಮಿತಮಗ್ನಧೀಃ ಪುನಃ
ಕ್ರಮಾದಪಶ್ಯನ್ಮಣಿದೀಪ್ರಮಾಲಯಮ್ || ೮೭-೮ ||
ಕಿಂ ಮಾರ್ಗವಿಭ್ರಂಶ ಇತಿ ಭ್ರಮನ್ಕ್ಷಣಂ
ಗೃಹಂ ಪ್ರವಿಷ್ಟಃ ಸ ದದರ್ಶ ವಲ್ಲಭಾಮ್ |
ಸಖೀಪರೀತಾಂ ಮಣಿಹೇಮಭೂಷಿತಾಂ
ಬುಬೋಧ ಚ ತ್ವತ್ಕರುಣಾಂ ಮಹಾದ್ಭುತಾಮ್ || ೮೭-೯ ||
ಸ ರತ್ನಶಾಲಾಸು ವಸನ್ನಪಿ ಸ್ವಯಂ
ಸಮುನ್ನಮದ್ಭಕ್ತಿಭರೋಽಮೃತಂ ಯಯೌ |
ತ್ವಮೇವಮಾಪೂರಿತಭಕ್ತವಾಞ್ಛಿತೋ
ಮರುತ್ಪುರಾಧೀಶ ಹರಸ್ವ ಮೇ ಗದಾನ್ || ೮೭-೧೦ ||
ಇತಿ ಷಡಶೀತಿತಮದಶಕಂ ಸಮಾಪ್ತಂ
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
