Narayaneeyam Dasakam 39 – ನಾರಾಯಣೀಯಂ ಏಕೋನಚತ್ವಾರಿಂಶದಶಕಮ್

ಸ್ತೋತ್ರನಿಧಿ → ನಾರಾಯಣೀಯಂ → ಏಕೋನಚತ್ವಾರಿಂಶದಶಕಮ್

<< ನಾರಾಯಣೀಯಂ ಅಷ್ಟಾತ್ರಿಂಶದಶಕಂ

ನಾರಾಯಣೀಯಂ ಏಕೋನಚತ್ವಾರಿಂಶದಶಕಮ್ (೩೯) – ಯೋಗಮಾಯಾ ಪ್ರಾದುರ್ಭಾವಂ ತಥಾ ಗೋಕುಲೇ ಕೃಷ್ಣಜನ್ಮೋತ್ಸವಮ್

ಭವಂತಮಯಮುದ್ವಹನ್ ಯದುಕುಲೋದ್ವಹೋ ನಿಸ್ಸರನ್
ದದರ್ಶ ಗಗನೋಚ್ಚಲಜ್ಜಲಭರಾಂ ಕಲಿಂದಾತ್ಮಜಾಮ್ |
ಅಹೋ ಸಲಿಲಸಂಚಯಃ ಸ ಪುನರೈಂದ್ರಜಾಲೋದಿತೋ
ಜಲೌಘ ಇವ ತತ್ ಕ್ಷಣಾತ್ ಪ್ರಪದಮೇಯತಾಮಾಯಯೌ || ೩೯-೧ ||

ಪ್ರಸುಪ್ತಪಶುಪಾಲಿಕಾಂ ನಿಭೃತಮಾರುದದ್ಬಾಲಿಕಾ-
-ಮಪಾವೃತಕವಾಟಿಕಾಂ ಪಶುಪವಾಟಿಕಾಮಾವಿಶನ್ |
ಭವಂತಮಯಮರ್ಪಯನ್ ಪ್ರಸವತಲ್ಪಕೇ ತತ್ಪದಾ-
-ದ್ವಹನ್ ಕಪಟಕನ್ಯಕಾಂ ಸ್ವಪುರಮಾಗತೋ ವೇಗತಃ || ೩೯-೨ ||

ತತಸ್ತ್ವದನುಜಾರವಕ್ಷಪಿತನಿದ್ರವೇಗದ್ರವ-
-ದ್ಭಟೋತ್ಕರನಿವೇದಿತಪ್ರಸವವಾರ್ತಯೈವಾರ್ತಿಮಾನ್ |
ವಿಮುಕ್ತಚಿಕುರೋತ್ಕರಸ್ತ್ವರಿತಮಾಪತನ್ ಭೋಜರಾ-
-ಡತುಷ್ಟ ಇವ ದೃಷ್ಟವಾನ್ ಭಗಿನಿಕಾಕರೇ ಕನ್ಯಕಾಮ್ || ೩೯-೩ ||

ಧ್ರುವಂ ಕಪಟಶಾಲಿನೋ ಮಧುಹರಸ್ಯ ಮಾಯಾ ಭವೇ-
-ದಸಾವಿತಿ ಕಿಶೋರಿಕಾಂ ಭಗಿನಿಕಾಕರಾಲಿಂಗಿತಾಮ್ |
ದ್ವಿಪೋ ನಲಿನಿಕಾಂತರಾದಿವ ಮೃಣಾಳಿಕಾಮಾಕ್ಷಿಪ-
-ನ್ನಯಂ ತ್ವದನುಜಾಮಜಾಮುಪಲಪಟ್ಟಕೇ ಪಿಷ್ಟವಾನ್ || ೩೯-೪ ||

ತತೋ ಭವದುಪಾಸಕೋ ಝಟಿತಿ ಮೃತ್ಯುಪಾಶಾದಿವ
ಪ್ರಮುಚ್ಯ ತರಸೈವ ಸಾ ಸಮಧಿರೂಢರೂಪಾಂತರಾ |
ಅಧಸ್ತಲಮಜಗ್ಮುಷೀ ವಿಕಸದಷ್ಟಬಾಹುಸ್ಫುರ-
-ನ್ಮಹಾಯುಧಮಹೋ ಗತಾ ಕಿಲ ವಿಹಾಯಸಾ ದಿದ್ಯುತೇ || ೩೯-೫ ||

ನೃಶಂಸತರ ಕಂಸ ತೇ ಕಿಮು ಮಯಾ ವಿನಿಷ್ಪಿಷ್ಟಯಾ
ಬಭೂವ ಭವದಂತಕಃ ಕ್ವಚನ ಚಿಂತ್ಯತಾಂ ತೇ ಹಿತಮ್ |
ಇತಿ ತ್ವದನುಜಾ ವಿಭೋ ಖಲಮುದೀರ್ಯ ತಂ ಜಗ್ಮುಷೀ
ಮರುದ್ಗಣಪಣಾಯಿತಾ ಭುವಿ ಚ ಮಂದಿರಾಣ್ಯೇಯುಷೀ || ೩೯-೬ ||

ಪ್ರಗೇ ಪುನರಗಾತ್ಮಜಾವಚನಮೀರಿತಾ ಭೂಭುಜಾ
ಪ್ರಲಂಬಬಕಪೂತನಾಪ್ರಮುಖದಾನವಾ ಮಾನಿನಃ |
ಭವನ್ನಿಧನಕಾಮ್ಯಯಾ ಜಗತಿ ಬಭ್ರಮುರ್ನಿರ್ಭಯಾಃ
ಕುಮಾರಕವಿಮಾರಕಾಃ ಕಿಮಿವ ದುಷ್ಕರಂ ನಿಷ್ಕೃಪೈಃ || ೩೯-೭ ||

ತತಃ ಪಶುಪಮಂದಿರೇ ತ್ವಯಿ ಮುಕುಂದ ನಂದಪ್ರಿಯಾ-
-ಪ್ರಸೂತಿಶಯನೇಶಯೇ ರುದತಿ ಕಿಂಚಿದಂಚತ್ಪದೇ |
ವಿಬುಧ್ಯ ವನಿತಾಜನೈಸ್ತನಯಸಂಭವೇ ಘೋಷಿತೇ
ಮುದಾ ಕಿಮು ವದಾಮ್ಯಹೋ ಸಕಲಮಾಕುಲಂ ಗೋಕುಲಮ್ || ೩೯-೮ ||

ಅಹೋ ಖಲು ಯಶೋದಯಾ ನವಕಲಾಯಚೇತೋಹರಂ
ಭವಂತಮಲಮಂತಿಕೇ ಪ್ರಥಮಮಾಪಿಬಂತ್ಯಾ ದೃಶಾ |
ಪುನಃ ಸ್ತನಭರಂ ನಿಜಂ ಸಪದಿ ಪಾಯಯಂತ್ಯಾ ಮುದಾ
ಮನೋಹರತನುಸ್ಪೃಶಾ ಜಗತಿ ಪುಣ್ಯವಂತೋ ಜಿತಾಃ || ೩೯-೯ ||

ಭವತ್ಕುಶಲಕಾಮ್ಯಯಾ ಸ ಖಲು ನಂದಗೋಪಸ್ತದಾ
ಪ್ರಮೋದಭರಸಂಕುಲೋ ದ್ವಿಜಕುಲಾಯ ಕಿಂ ನಾದದಾತ್ |
ತಥೈವ ಪಶುಪಾಲಕಾಃ ಕಿಮು ನ ಮಂಗಳಂ ತೇನಿರೇ
ಜಗತ್ತ್ರಿತಯಮಂಗಳ ತ್ವಮಿಹ ಪಾಹಿ ಮಾಮಾಮಯಾತ್ || ೩೯-೧೦ ||

ಇತಿ ಏಕೋನಚತ್ವಾರಿಂಶದಶಕಂ ಸಮಾಪ್ತಮ್ |

ನಾರಾಯಣೀಯಂ ಚತ್ವಾರಿಂಶದಶಕಮ್ >>

---

ಸಂಪೂರ್ಣ ನಾರಾಯಣೀಯಂ ನೋಡಿ.

---