Read in తెలుగు / ಕನ್ನಡ / தமிழ் / देवनागरी / English (IAST)
ವಾಮನೋಽಸಿ ತ್ವಮಂಶೇನ ಮತ್ಪಿತುರ್ಯಜ್ಞಭಿಕ್ಷುಕಃ |
ರಾಜ್ಯಹರ್ತಾ ಚ ಶ್ರೀಹರ್ತಾ ಸುತಲಸ್ಥಲದಾಯಕಃ || ೧ ||
ಬಲಿಭಕ್ತಿವಶೋ ವೀರಃ ಸರ್ವೇಶೋ ಭಕ್ತವತ್ಸಲಃ |
ಶೀಘ್ರಂ ತ್ವಂ ಹಿಂಧಿ ಮಾಂ ಪಾಪಂ ಶಾಪಾದ್ಗರ್ದಭರೂಪಿಣಮ್ || ೨ ||
ಮುನೇರ್ದುರ್ವಾಸಸಃ ಶಾಪಾದೀದೃಶಂ ಜನ್ಮ ಕುತ್ಸಿತಮ್ |
ಮೃತ್ಯುರುಕ್ತಶ್ಚ ಮುನಿನಾ ತ್ವತ್ತೋ ಮಮ ಜಗತ್ಪತೇ || ೩ ||
ಷೋಡಶಾರೇಣ ಚಕ್ರೇಣ ಸುತೀಕ್ಷ್ಣೇನಾತಿತೇಜಸಾ |
ಜಹಿ ಮಾಂ ಜಗತಾಂ ನಾಥ ಸದ್ಭಕ್ತಿಂ ಕುರು ಮೋಕ್ಷದ || ೪ ||
ತ್ವಮಂಶೇನ ವರಾಹಶ್ಚ ಸಮುದ್ಧರ್ತುಂ ವಸುಂಧರಾಮ್ |
ವೇದಾನಾಂ ರಕ್ಷಿತಾ ನಾಥ ಹಿರಣ್ಯಾಕ್ಷನಿಷೂದನಃ || ೫ ||
ತ್ವಂ ನೃಸಿಂಹಃ ಸ್ವಯಂ ಪೂರ್ಣೋ ಹಿರಣ್ಯಕಶಿಪೋರ್ವಧೇ |
ಪ್ರಹ್ಲಾದಾನುಗ್ರಹಾರ್ಥಾಯ ದೇವಾನಾಂ ರಕ್ಷಣಾಯ ಚ || ೬ ||
ತ್ವಂ ಚ ವೇದೋದ್ಧಾರಕರ್ತಾ ಮೀನಾಂಶೇನ ದಯಾನಿಧೇ |
ನೃಪಸ್ಯ ಜ್ಞಾನದಾನಾಯ ರಕ್ಷಾಯೈ ಸುರವಿಪ್ರಯೋಃ || ೭ ||
ಶೇಷಾಧಾರಶ್ಚ ಕೂರ್ಮಸ್ತ್ವಮಂಶೇನ ಸೃಷ್ಟಿಹೇತವೇ |
ವಿಶ್ವಾಧಾರಶ್ಚ ವಿಶ್ವಸ್ತ್ವಮಂಶೇನಾಪಿ ಸಹಸ್ರಧೃತ್ || ೮ ||
ರಾಮೋ ದಾಶರಥಿಸ್ತ್ವಂ ಚ ಜಾನಕ್ಯುದ್ಧಾರಹೇತವೇ |
ದಶಕಂಧರಹಂತಾ ಚ ಸಿಂಧೌ ಸೇತುವಿಧಾಯಕಃ || ೯ ||
ಕಲಯಾ ಪರಶುರಾಮಶ್ಚ ಜಮದಗ್ನಿಸುತೋ ಮಹಾನ್ |
ತ್ರಿಃಸಪ್ತಕೃತ್ವೋ ಭೂಪಾನಾಂ ನಿಹಂತಾ ಜಗತೀಪತೇ || ೧೦ ||
ಅಂಶೇನ ಕಪಿಲಸ್ತ್ವಂ ಚ ಸಿದ್ಧಾನಾಂ ಚ ಗುರೋರ್ಗುರುಃ |
ಮಾತೃಜ್ಞಾನಪ್ರದಾತಾ ಚ ಯೋಗಶಾಸ್ತ್ರವಿಧಾಯಕಃ || ೧೧ ||
ಅಂಶೇನ ಜ್ಞಾನಿನಾಂ ಶ್ರೇಷ್ಠೌ ನರನಾರಾಯಣಾವೃಷೀ |
ತ್ವಂ ಚ ಧರ್ಮಸುತೋ ಭೂತ್ವಾ ಲೋಕವಿಸ್ತಾರಕಾರಕಃ || ೧೨ ||
ಅಧುನಾ ಕೃಷ್ಣರೂಪಸ್ತ್ವಂ ಪರಿಪೂರ್ಣತಮಃ ಸ್ವಯಮ್ |
ಸರ್ವೇಷಾಮವತಾರಾಣಾಂ ಬೀಜರೂಪಃ ಸನಾತನಃ || ೧೩ ||
ಯಶೋದಾಜೀವನೋ ನಿತ್ಯೋ ನಂದೈಕಾನಂದವರ್ಧನಃ |
ಪ್ರಾಣಾಧಿದೇವೋ ಗೋಪೀನಾಂ ರಾಧಾಪ್ರಾಣಾಧಿಕಪ್ರಿಯಃ || ೧೪ ||
ವಸುದೇವಸುತಃ ಶಾಂತೋ ದೇವಕೀದುಃಖಭಂಜನಃ |
ಅಯೋನಿಸಂಭವಃ ಶ್ರೀಮಾನ್ ಪೃಥಿವೀಭಾರಹಾರಕಃ || ೧೫ ||
ಪೂತನಾಯೈ ಮಾತೃಗತಿಂ ಪ್ರದಾತಾ ಚ ಕೃಪಾನಿಧಿಃ |
ಬಕಕೇಶಿಪ್ರಲಂಬಾನಾಂ ಮಮಾಪಿ ಮೋಕ್ಷಕಾರಕಃ || ೧೬ ||
ಸ್ವೇಚ್ಛಾಮಯ ಗುಣಾತೀತ ಭಕ್ತಾನಾಂ ಭಯಭಂಜನ |
ಪ್ರಸೀದ ರಾಧಿಕಾನಾಥ ಪ್ರಸೀದ ಕುರು ಮೋಕ್ಷಣಮ್ || ೧೭ ||
ಹೇ ನಾಥ ಗಾರ್ದಭೀಯೋನೇಃ ಸಮುದ್ಧರ ಭವಾರ್ಣವಾತ್ |
ಮೂರ್ಖಸ್ತ್ವದ್ಭಕ್ತಪುತ್ರೋಽಹಂ ಮಾಮುದ್ಧರ್ತುಂ ತ್ವಮರ್ಹಸಿ || ೧೮ ||
ವೇದಾ ಬ್ರಹ್ಮಾದಯೋ ಯಂ ಚ ಮುನೀಂದ್ರಾಃ ಸ್ತೋತುಮಕ್ಷಮಾಃ |
ಕಿಂ ಸ್ತೌಮಿ ತಂ ಗುಣಾತೀತಂ ಪುರಾ ದೈತ್ಯೋಽಧುನಾ ಖರಃ || ೧೯ ||
ಏವಂ ಕುರು ಕೃಪಾಸಿಂಧೋ ಯೇನ ಮೇ ನ ಭವೇಜ್ಜನುಃ |
ದೃಷ್ಟ್ವಾ ಪಾದಾರವಿಂದಂ ತೇ ಕಃ ಪುನರ್ಭವನಂ ವ್ರಜೇತ್ || ೨೦ ||
ಬ್ರಹ್ಮಾ ಸ್ತೋತಾ ಖರಃ ಸ್ತೋತಾ ನೋಪಹಾಸಿತುಮರ್ಹಸಿ |
ಸದೀಶ್ವರಸ್ಯ ವಿಜ್ಞಸ್ಯ ಯೋಗ್ಯಾಯೋಗ್ಯೇ ಸಮಾ ಕೃಪಾ || ೨೧ ||
ಇತ್ಯೇವಮುಕ್ತ್ವಾ ದೈತ್ಯೇಂದ್ರಸ್ತಸ್ಥೌ ಚ ಪುರತೋ ಹರೇಃ |
ಪ್ರಸನ್ನವದನಃ ಶ್ರೀಮಾನತಿತುಷ್ಟೋ ಬಭೂವ ಹ || ೨೨ ||
ಇದಂ ದೈತ್ಯಕೃತಂ ಸ್ತೋತ್ರಂ ನಿತ್ಯಂ ಭಕ್ತ್ಯಾ ಚ ಯಃ ಪಠೇತ್ |
ಸಾಲೋಕ್ಯಸಾರ್ಷ್ಟಿಸಾಮೀಪ್ಯಂ ಲೀಲಯಾ ಲಭತೇ ಹರೇಃ || ೨೩ ||
ಇಹ ಲೋಕೇ ಹರೇರ್ಭಕ್ತಿಮಂತೇ ದಾಸ್ಯಂ ಸುದುರ್ಲಭಮ್ |
ವಿದ್ಯಾಂ ಶ್ರಿಯಂ ಸುಕವಿತಾಂ ಪುತ್ರಪೌತ್ರಾನ್ ಯಶೋ ಲಭೇತ್ || ೨೪ ||
ಇತಿ ಶ್ರೀಬ್ರಹ್ಮವೈವರ್ತೇ ಮಹಾಪುರಾಣೇ ಶ್ರೀಕೃಷ್ಣಜನ್ಮಖಂಡೇ ದ್ವಾವಿಂಶೋಽಧ್ಯಾಯೇ ದಾನವಕೃತ ಶ್ರೀ ಕೃಷ್ಣ ಸ್ತೋತ್ರಮ್ |
ಇನ್ನಷ್ಟು ಶ್ರೀ ಕೃಷ್ಣ ಸ್ತೋತ್ರಗಳು ನೋಡಿ.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
