Read in తెలుగు / ಕನ್ನಡ / தமிழ் / देवनागरी / English (IAST)
ಮೈತ್ರೇಯ ಉವಾಚ |
ಕಥಮಾರಾಧ್ಯತೇ ಚಿತ್ತೇ ಹನುಮಾನ್ ಮಾರುತಾತ್ಮಜಃ |
ಕೀದೃಶೈರುಪಚಾರೈರ್ವಾ ವದ ಮೇ ವಿಸ್ತರಾನ್ಮುನೇ || ೧ ||
ಶ್ರೀಪರಾಶರ ಉವಚ |
ಹನುಮಂತಂ ಮಹಾತ್ಮಾನಂ ಪಿಂಗಾಕ್ಷಂ ಹೇಮಸನ್ನಿಭಮ್ |
ಮಂದಸ್ಮಿತಂ ಸುಖಾಸೀನಂ ಧ್ಯಾಯೇದೀಪ್ಸಿತಸಿದ್ಧಯೇ || ೨ ||
ತಾಪತ್ರಯಪರಿವ್ಯಾಪ್ತಂ ಚಿತ್ತಂ ಕೃತ್ವಾ ಸುನಿರ್ಮಲಮ್ |
ಭಾವಯೇನ್ಮನಸಾ ದೇವಂ ಭವಶಾಪವಿಮುಕ್ತಯೇ || ೩ ||
ಪ್ರಾತಃಕಾಲೇ ಸಮುತ್ಥಾಯ ಹನೂಮಂತಂ ಹೃದಿಸ್ಮರನ್ |
ಶುಚೌದೇಶೇ ಸಮಾಸೀನಃ ಕೃತ ಪ್ರಾಭಾತಕೀಕ್ರಿಯಾಃ || ೪ ||
ವಿಜನಂ ದೇಶಮಾಶ್ರಿತ್ಯ ಕದಳೀವನಮಧ್ಯಗಃ |
ಚಿತ್ತವಿಕ್ಷೇಪರಹಿತಃ ಪೂಜಾವಿಧಿಮುಪಕ್ರಮೇತ್ || ೫ ||
ಪೂಜಾ ಚ ಪಂಚಧಾಜ್ಞೇಯಾ ಕಪೀಂದ್ರಸ್ಯ ಮಹಾತ್ಮನಃ |
ಜಲೇ ಚ ಪ್ರತಿಮಾಯಾಂ ಚ ಶಿಲಾಯಾಂ ಸೂರ್ಯಮಂಡಲೇ |
ನಿಶ್ಚಲೇ ಮಾನಸೇ ವಾಪಿ ಪೂಜಯೇಜ್ಜಗತಾಂ ಪತಿಮ್ || ೬ ||
ಆದ್ಯೇ ಸರ್ವೋಪಚಾರಾನ್ ವೈ ಜಲೇನೈವ ಪ್ರಕಲ್ಪಯೇತ್ |
ದ್ವಿತೀಯೇ ತು ಯಥಾಶಾಸ್ತ್ರಂ ತಥಾ ದ್ರವ್ಯಂ ನಿವೇದಯೇತ್ || ೭ ||
ತೃತೀಯೇ ನ ವಿಶೇಷೋಽಸ್ತಿ ದ್ವಿತೀಯ ಇವ ಪೂಜಯೇತ್ |
ತುರೀಯೇ ನಿಶ್ಚಲಾಂ ದೃಷ್ಟಿಂ ಕೃತ್ವಾ ಭಾಸ್ಕರಮಂಡಲೇ || ೮ ||
ಪೂಜಾದ್ರವ್ಯಂ ಸಮಾನೀಯ ಚಕ್ಷುಷಾ ಸನ್ನಿಧಾಪಯೇತ್ |
ಪಂಚಮೀ ಮಾನಸೀಪೂಜಾ ಸರ್ವೇಷಾಮುತ್ತಮೋತ್ತಮಮ್ || ೯ ||
ತತ್ತದ್ರವ್ಯಾಣಿ ಸರ್ವಾಣಿ ಪೂಜಾಯಾಃ ಸಾಧನಾನಿ ವೈ |
ನಿಶ್ಚಲೇ ನಾಂತರಂಗೇಣ ಕಪೀಂದ್ರಾಯ ನಿವೇದಯೇತ್ || ೧೦ ||
ದಳೈರ್ದ್ವಾದಶಭಿರ್ಯುಕ್ತಂ ಹೈಮಂ ಹೃದಯಪಂಕಜಮ್ |
ಭಾವಯೇ ದ್ವಿಕಚಂ ರಮ್ಯಂ ಕರ್ಣಿಕಾ ಕೇಸರಾನ್ವಿತಮ್ || ೧೧ ||
ತತ್ರ ಸಿಂಹಾಸನಂ ತತ್ರ ಹೈಮಂ ಭಾಸ್ಕರಸನ್ನಿಭಮ್ |
ನಿರಸ್ತಾಂತಸ್ತಮಸ್ತೋಮಂ ಕಲ್ಪಯೇನ್ಮುನಿಪುಂಗವ || ೧೨ ||
ಆವಾಹಯೇದ್ಧನೂಮಂತಂ ತತ್ರ ಸಿಂಹಾಸನೇ ಸುಧೀಃ |
ಅಥ ಧ್ಯಾಯೇತ್ ಕಪಿಶ್ರೇಷ್ಠಂ ಚತುರಾವರಣಾನ್ವಿತಮ್ || ೧೩ ||
ವಾಮಭಾಗಸ್ಥಿತಾಂ ಪತ್ನೀಂ ಸೂರ್ಯಪುತ್ರೀಂ ಸುವರ್ಚಲಾಮ್ |
ಪಶ್ಯಂತಂ ಸ್ನಿಗ್ಧಯಾ ದೃಷ್ಟ್ಯಾ ಸ್ಮಿತಯುಕ್ತ ಮುಖಾಂಬುಜಾಮ್ || ೧೪ ||
ಛತ್ರಚಾಮರಸಂಯುಕ್ತಂ ವಿನತಾದ್ಯೈಃ ಸುಸೇವಿತಮ್ |
ಯುಕ್ತಹಾರ ಗಣೋಪೇತಂ ತತ್ರ ಕುಂಡಲಭೂಷಿತಮ್ || ೧೫ ||
ಗ್ರೈವೇಯಭೂಷಿತಗ್ರೀವಂ ಕನಕಾಂಗದಧಾರಿಣಮ್ |
ನಾನಾಮಣಿಸಮುತ್ಕೀರ್ಣಂ ಕಿರೀಟೋಜ್ಜ್ವಲಶೇಖರಮ್ || ೧೬ ||
ಮೇಖಲಾದಾಮಸಂವೀತಂ ಮಣಿನೂಪುರಶೋಭಿತಮ್ |
ರತ್ನಕಂಕಣವಿದ್ಯೋತಂ ಪಾಣಿಂ ರಕ್ತಾಂಬುಜದ್ವಯಮ್ || ೧೭ ||
ಕ್ವಥಿತ ಸ್ವರ್ಣವರ್ಣಾಂಗಮುಷ್ಟ್ರಧ್ವಜಸಮನ್ವಿತಮ್ |
ಪದ್ಮಾಸನೇ ಸಮಾಸೀನಂ ಪೀತಾಂಬರಸಮನ್ವಿತಮ್ || ೧೮ ||
ಚತುರ್ಭುಜಧರಂ ಶಾಂತಂ ಸರ್ವವ್ಯಾಪಿನಮೀಶ್ವರಮ್ |
ಸರ್ವದೇವ ಪರೀವಾರಂ ಸರ್ವಾಭೀಷ್ಟಫಲಪ್ರದಮ್ || ೧೯ ||
(ಆವಾಹನಾದ್ಯುಪಚಾರ ಪ್ರಾರಂಭಃ)
ಆವಾಹಯಾಮಿ ಸರ್ವೇಶಂ ಸೂರ್ಯಪುತ್ರೀಪ್ರಿಯಂ ಪ್ರಭುಮ್ |
ಅಂಜನಾತನಯಂ ದೇವಂ ಮಾಯಾತೀತಂ ಜಗದ್ಗುರುಮ್ || ೨೦ ||
ದೇವದೇವ ಜಗನ್ನಾಥ ಕೇಸರಿಪ್ರಿಯನಂದನ |
ರತ್ನಸಿಂಹಾಸನಂ ತುಭ್ಯಂ ದಾಸ್ಯಾಮಿ ಹನುಮತ್ ಪ್ರಭೋ || ೨೧ ||
ಆಗಚ್ಛ ಹನುಮನ್ ದೇವ ತ್ವಂ ಸುವರ್ಚಲಯಾ ಸಹ |
ಪೂಜಾ ಸಮಾಪ್ತಿಪರ್ಯಂತಂ ಭವ ಸನ್ನಿಹಿತೋ ಮುದಾ || ೨೨ ||
ಭೀಮಾಗ್ರಜ ಮಹಾಪ್ರಾಜ್ಞ ತ್ವಂ ಮಮಾಭಿಮುಖೋ ಭವ |
ಸುವರ್ಚಲಾಪತೇ ಶ್ರೀಮನ್ ಪ್ರಸೀದ ಜಗತಾಂ ಪತೇ || ೨೩ ||
ಯೋಗಿಧ್ಯೇಯಾಂಘ್ರಿಪದ್ಮಾಯ ಜಗತಾಂ ಪತಯೇ ನಮಃ |
ಪಾದ್ಯಂ ಮಯಾರ್ಪಿತಂ ದೇವ ಗೃಹಾಣ ಪುರುಷೋತ್ತಮ || ೨೪ ||
ಲಕ್ಷ್ಮಣಪ್ರಾಣಸಂರಕ್ಷ ಸೀತಾಶೋಕವಿನಾಶನ |
ಗೃಹಾಣಾರ್ಘ್ಯಂ ಮಯಾ ದತ್ತಂ ಪಾರ್ವತೀ ಪ್ರಿಯನಂದನ || ೨೫ ||
ಬಾಲಾಗ್ರ ಸೇತುಬಂಧಾಯ ಶತಾನನವಧಾಯ ಚ |
ತುಭ್ಯಮಾಚಮನಂ ದತ್ತಂ ಪ್ರತಿಗೃಹ್ಣೀಷ್ವ ಮಾರುತೇ || ೨೬ ||
ಅರ್ಜುನಧ್ವಜಸಂವಾಸ ದಶಾನನ ಮದಾಪಹ |
ಮಧುಪರ್ಕಂ ಪ್ರದಾಸ್ಯಾಮಿ ಹನುಮನ್ ಪ್ರತಿಗೃಹ್ಯತಾಮ್ || ೨೭ ||
ಗಂಗಾದಿ ಸರ್ವತೀರ್ಥೇಭ್ಯಃ ಸಮಾನೀತೈರ್ನವೋದಕೈಃ |
ಭವಂತ ಸ್ನಾಪಯಿಷ್ಯಾಮಿ ಕಪಿನಾಯಕ ಗೃಹ್ಯತಾಮ್ || ೨೮ ||
ಪೀತಾಂಬರಮಿದಂ ತುಭ್ಯಂ ತಪ್ತಹಾಟಕಸನ್ನಿಭಮ್ |
ದಾಸ್ಯಾಮಿ ವಾನರಶ್ರೇಷ್ಠ ಸಂಗೃಹಾಣ ನಮೋಽಸ್ತು ತೇ || ೨೯ ||
ಬ್ರಹ್ಮಸೂತ್ರಮಿದಂ ಭವ್ಯಂ ಮುಕ್ತಾದಾಮೋಪಶೋಭಿತಮ್ |
ಸ್ವೀಕುರುಷ್ವಾಂಜನಾಪುತ್ರ ಭಕ್ತರಕ್ಷಣ ತತ್ಪರ || ೩೦ ||
ಉತ್ತರೀಯಂ ತು ದಾಸ್ಯಾಮಿ ಸಂಸಾರೋತ್ತಾರಕಾರಣ |
ಗೃಹಾಣ ಪರಮಪ್ರೀತ್ಯಾ ನತೋಽಸ್ಮಿ ತವ ಪಾದಯೋಃ || ೩೧ ||
ಭೂಷಣಾನಿ ಮಹಾರ್ಹಾಣಿ ಕಿರೀಟ ಪ್ರಮುಖಾನ್ಯಹಮ್ |
ತುಭ್ಯಂ ದಾಸ್ಯಾಮಿ ಸರ್ವೇಶ ಗೃಹಾಣ ಕಪಿನಾಯಕ || ೩೨ ||
ಕಸ್ತೂರೀಕುಂಕುಮೋನ್ಮಿಶ್ರಂ ಕರ್ಪೂರಾಗರುವಾಸಿತಮ್ |
ಶ್ರೀಚಂದನಂ ತು ದಾಸ್ಯಾಮಿ ಗೃಹ್ಯತಾಂ ಹನುಮತ್ ಪ್ರಭೋ || ೩೩ ||
ಸುಗಂಧೀನಿ ಸುರೂಪಾಣಿ ವನ್ಯಾನಿ ವಿವಿಧಾನಿ ಚ |
ಚಂಪಕಾದೀನಿ ಪುಷ್ಪಾಣಿ ಕಮಲಾನ್ಯುತ್ಪಲಾನಿ ಚ || ೩೪ ||
ತುಲಸೀದಳಮಾದೀನಿ ಮನಸಾ ಕಲ್ಪಯಾಮಿ ತೇ |
ಗೃಹಾಣ ಹನುಮದ್ದೇವ ಪ್ರಣತೋಽಸ್ಮಿ ಪದಾಂಬುಜೇ || ೩೫ ||
ಶಾಲೀಯಾನಕ್ಷತಾನ್ರಮ್ಯಾನ್ ಪದ್ಮರಾಗಸಮಪ್ರಭಾನ್ |
ಅಖಂಡಾನ್ ಖಂಡಿತಧ್ವಾಂತ ಸ್ವೀಕುರುಷ್ವ ದಯಾನಿಧೇ || ೩೬ ||
ಕಪಿಲಾಘೃತಸಂಯುಕ್ತಃ ಕೃಷ್ಣಾಗರುಸಮುದ್ಭವಃ |
ಮಯಾ ಸಮರ್ಪಿತೋ ಧೂಪಃ ಹನುಮನ್ ಪ್ರತಿಗೃಹ್ಯತಾಮ್ || ೩೭ ||
ನಿರಸ್ತಾಜ್ಞಾನತಿಮಿರತೇಜೋರಾಶೇ ಜಗತ್ಪತೇ |
ದೀಪಂ ಗೃಹಾಣ ದೇವೇಶ ಗೋಘೃತಾತ್ತಂ ದಶಾನ್ವಿತಮ್ || ೩೮ ||
ಇದಂ ದಿವ್ಯಾನ್ನಮಮೃತಂ ಸೂಪಶಾಕಫಲಾನ್ವಿತಮ್ |
ಸಾಜ್ಯಂ ಸದಧಿ ಸಕ್ಷೀರಂ ಶರ್ಕರಾಮಧುಸಂಯುತಮ್ || ೩೯ ||
ಭಕ್ಷ್ಯಂ ಭೋಜ್ಯಂ ಚ ಲೇಹ್ಯಂ ಚ ಚೋಷ್ಯಂ ಚಾಪಿ ಚತುರ್ವಿಧಮ್ |
ಗೃಹಾಣ ಹನುಮನ್ ಭಕ್ತ್ಯಾ ಸ್ವರ್ಣಪಾತ್ರೇ ನಿವೇದಿತಮ್ || ೪೦ ||
ಸಮರ್ಪಯಾಮಿ ಪಾನೀಯಂ ಮಧ್ಯೇಮಧ್ಯೇ ಸುಧೋಪಮಮ್ |
ಸಚ್ಚಿದಾನಂದರೂಪಾಯ ಸೃಷ್ಟಿಸ್ಥಿತ್ಯಂತಹೇತವೇ || ೪೧ ||
ಪೂಗೀಫಲೈಃ ಸಮಾಯುಕ್ತಂ ಕರ್ಪೂರಾದಿಸಮನ್ವಿತಮ್ |
ಸ್ವರ್ಣವರ್ಣದಳೋಪೇತಂ ತಾಂಬೂಲಂ ಗೃಹ್ಯತಾಂ ಹರೇ || ೪೨ ||
ನೀರಾಜನಮಿದಂ ದಿವ್ಯಂ ಮಂಗಳಾರ್ಥಂ ಕಪಿ ಪ್ರಭೋ |
ಮಯಾ ಸಮರ್ಪಿತಂ ತಾತ ಗೃಹಾಣ ವರದೋ ಭವ || ೪೩ ||
ನೃತ್ಯಂ ಗೀತಂ ಚ ವಾದ್ಯಂ ಚ ಕೃತಂ ಗಂಧರ್ವಸತ್ತಮೈಃ |
ಪ್ರಕಲ್ಪಯಾಮಿ ಮನಸಾ ರಾಮದೂತಾಯ ತೇ ನಮಃ || ೪೪ ||
ರಾಜೋಪಚಾರೈಃ ಸತತಂ ಪುರಾಣಪಠನಾದಿಭಿಃ |
ಸಂತುಷ್ಟೋ ಭವ ಸರ್ವಾತ್ಮನ್ ಸರ್ವಲಿಂಗಮಯಾತ್ಮಕ || ೪೫ ||
ಮೇರಾವಣ ಮಹಾಪ್ರಾಜ್ಞ ಪ್ರಾಣವಾಯು ಬಿಲೇಶಯ |
ಪುನರರ್ಘ್ಯಂ ಪ್ರದಾಸ್ಯಾಮಿ ಪವನಾತ್ಮಜ ಗೃಹ್ಯತಾಮ್ || ೪೬ ||
ಮಂದಾರಪಾರಿಜಾತಾದಿ ಪುಷ್ಪಾಂಜಲಿಮಿಮಂ ಪ್ರಭೋ |
ಸ್ವರ್ಣಪುಷ್ಪಸಮಾಕೀರ್ಣಮುಷ್ಟ್ರಧ್ವಜ ಗೃಹಾಣ ವೈ || ೪೭ ||
ಪ್ರದಕ್ಷಿಣನಮಸ್ಕಾರಾನ್ ಸಾಷ್ಟಾಂಗಾನ್ ಪಂಚಸಂಖ್ಯಯಾ |
ದಾಸ್ಯಾಮಿ ಕಪಿನಾಥಾಯ ಗೃಹಾಣಾಭೀಷ್ಟದಾಯಕ || ೪೮ ||
ದೇವದೇವ ಜಗನ್ನಾಥ ಪುರಾಣಪುರುಷೋತ್ತಮ |
ಅನೇನ ಪೂಜಾವಿಧಿನಾ ಸುಪ್ರೀತೋ ಭವ ಸರ್ವದಾ || ೪೯ ||
ಸುವರ್ಚಲಾಸಮೇತಸ್ತ್ವಂ ಚತುರಾವರಣಾನ್ವಿತಮ್ |
ಹಂಸತೂಲಿಕಯೋಪೇತೇ ಮಮ ಹೃತ್ಪಂಕಜೇ ವಸ || ೫೦ ||
ಶ್ರೀಪರಾಶರ ಉವಾಚ |
ಇತ್ಯೇವಂ ಮಾನಸೀಪೂಜಾ ಸರ್ವಾಭೀಷ್ಟಪ್ರದಾಯಿನೀ |
ಶಂಕರೇಣ ಪುರಾ ಗೌರ್ಯಾಃ ಕಥಿತಾ ವಿಸ್ತರಾನ್ಮುನೇ || ೫೧ ||
ಪ್ರಾತರ್ಮಧ್ಯಾಹ್ನಯೋಶ್ಚಾಪಿ ಸಾಯಂಕಾಲ ನಿಶೀಥಯೋಃ |
ಯದಾ ಕದಾಪಿ ಪೂಜೇಯಂ ಮಾನಸೀ ಸರ್ವದೋತ್ತಮಾ || ೫೧ ||
ಏತಸ್ಯ ಪೂಜನವಿಧೈಃ ಪಠನೇನಾಪಿ ಮಾನವಃ |
ಸರ್ವಾನ್ ಕಾಮಾನವಾಪ್ನೋತಿ ಶ್ರವಣೇನ ವಿಶೇಷತಃ || ೫೨ ||
ಬ್ರಹ್ಮ ಕ್ಷತ್ರ ವಿಶಾಂ ಸ್ತ್ರೀಣಾಂ ಬಾಲಾನಾಂ ಚ ಶುಭಾವಹಮ್ |
ಇದಂ ಪವಿತ್ರಂ ಪಾಪಘ್ನಂ ಭುಕ್ತಿಮುಕ್ತಿಫಲಪ್ರದಮ್ || ೫೩ ||
ಇತಿ ಶ್ರೀಪರಾಶರಸಂಹಿತಾಯಾಂ ಶ್ರೀಪರಾಶರಮೈತ್ರೇಯ ಸಂವಾದೇ ಶ್ರೀ ಹನುಮಾನ್ ಮಾಸಿಕ ಪೂಜಾ ನಾಮ ದ್ವಿಪಂಚಾಶತ್ಪಟಲಃ |
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
