Read in తెలుగు / ಕನ್ನಡ / தமிழ் / English (IAST)
<< ನಾರಾಯಣೀಯಂ ಸಪ್ತಸಪ್ತತಿತಮದಶಕಮ್
ಅಷ್ಟಸಪ್ತತಿತಮದಶಕಮ್ (೭೮) – ದ್ವಾರಕಾವಾಸಃ ತಥಾ ರುಕ್ಮಣೀಸನ್ದೇಶಪ್ರಾಪ್ತಿಃ |
ತ್ರಿದಶವರ್ಧಕಿವರ್ಧಿತಕೌಶಲಂ
ತ್ರಿದಶದತ್ತಸಮಸ್ತವಿಭೂತಿಮತ್ |
ಜಲಧಿಮಧ್ಯಗತಂ ತ್ವಮಭೂಷಯೋ
ನವಪುರಂ ವಪುರಞ್ಚಿತರೋಚಿಷಾ || ೭೮-೧ ||
ದದುಷಿ ರೇವತಭೂಭೃತಿ ರೇವತೀಂ
ಹಲಭೃತೇ ತನಯಾಂ ವಿಧಿಶಾಸನಾತ್ |
ಮಹಿತಮುತ್ಸವಘೋಷಮಪೂಪುಷಃ
ಸಮುದಿತೈರ್ಮುದಿತೈಃ ಸಹ ಯಾದವೈಃ || ೭೮-೨ ||
ಅಥ ವಿದರ್ಭಸುತಾಂ ಖಲು ರುಕ್ಮಿಣೀಂ
ಪ್ರಣಯಿನೀಂ ತ್ವಯಿ ದೇವ ಸಹೋದರಃ |
ಸ್ವಯಮದಿತ್ಸತ ಚೇದಿಮಹೀಭುಜೇ
ಸ್ವತಮಸಾ ತಮಸಾಧುಮುಪಾಶ್ರಯನ್ || ೭೮-೩ ||
ಚಿರಧೃತಪ್ರಣಯಾ ತ್ವಯಿ ಬಾಲಿಕಾ
ಸಪದಿ ಕಾಙ್ಕ್ಷಿತಭಙ್ಗಸಮಾಕುಲಾ |
ತವ ನಿವೇದಯಿತುಂ ದ್ವಿಜಮಾದಿಶ-
ತ್ಸ್ವಕದನಂ ಕದನಙ್ಗವಿನಿರ್ಮಿತಮ್ || ೭೮-೪ ||
ದ್ವಿಜಸುತೋಽಪಿ ಚ ತೂರ್ಣಮುಪಾಯಯೌ
ತವ ಪುರಂ ಹಿ ದುರಾಶದುರಾಸದಮ್ |
ಮುದಮವಾಪ ಚ ಸಾದರಪೂಜಿತಃ
ಸ ಭವತಾ ಭವತಾಪಹೃತಾ ಸ್ವಯಮ್ || ೭೮-೫ ||
ಸ ಚ ಭವನ್ತಮವೋಚತ ಕುಣ್ಡಿನೇ
ನೃಪಸುತಾ ಖಲು ರಾಜತಿ ರುಕ್ಮಿಣೀ |
ತ್ವಯಿ ಸಮುತ್ಸುಕಯಾ ನಿಜಧೀರತಾ-
ರಹಿತಯಾ ಹಿ ತಯಾ ಪ್ರಹಿತೋಽಸ್ಮ್ಯಹಮ್ || ೭೮-೬ ||
ತವ ಹೃತಾಸ್ಮಿ ಪುರೈವ ಗುಣೈರಹಂ
ಹರತಿ ಮಾಂ ಕಿಲ ಚೇದಿನೃಪೋಽಧುನಾ |
ಅಯಿ ಕೃಪಾಲಯ ಪಾಲಯ ಮಾಮಿತಿ
ಪ್ರಜಗದೇ ಜಗದೇಕಪತೇ ತಯಾ || ೭೮-೭ ||
ಅಶರಣಾಂ ಯದಿ ಮಾಂ ತ್ವಮುಪೇಕ್ಷಸೇ
ಸಪದಿ ಜೀವಿತಮೇವ ಜಹಾಮ್ಯಹಮ್ |
ಇತಿ ಗಿರಾ ಸುತನೋರತನೋದ್ಭೃಶಂ
ಸುಹೃದಯಂ ಹೃದಯಂ ತವ ಕಾತರಮ್ || ೭೮-೮ ||
ಅಕಥಯಸ್ತ್ವಮಥೈನಮಯೇ ಸಖೇ
ತದಧಿಕಾ ಮಮ ಮನ್ಮಥವೇದನಾ |
ನೃಪಸಮಕ್ಷಮುಪೇತ್ಯ ಹರಾಮ್ಯಹಂ
ತದಯಿ ತಾಂ ದಯಿತಾಮಸಿತೇಕ್ಷಣಾಮ್ || ೭೮-೯ ||
ಪ್ರಮುದಿತೇನ ಚ ತೇನ ಸಮಂ ತದಾ
ರಥಗತೋ ಲಘು ಕುಣ್ಡಿನಮೇಯಿವಾನ್ |
ಗುರುಮರುತ್ಪುರನಾಯಕ ಮೇ ಭವಾ-
ನ್ವಿತನುತಾಂ ತನುತಾಂ ನಿಖಿಲಾಪದಾಮ್ || ೭೮-೧೦ ||
ಇತಿ ಅಷ್ಟಸಪ್ತತಿತಮದಶಕಂ ಸಮಾಪ್ತಮ್ |
ನಾರಾಯಣೀಯಂ ಏಕೋನಾಶೀತಿತಮ ದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
