Read in తెలుగు / ಕನ್ನಡ / தமிழ் / English (IAST)
ಸಪ್ತಸಪ್ತತಿತಮದಶಕಮ್ (೭೭) – ಜರಾಸನ್ಧಾದಿಭಿಃ ಸಹ ಯುದ್ಧಮ್ |
ಸೈರನ್ಧ್ರ್ಯಾಸ್ತದನು ಚಿರಂ ಸ್ಮರಾತುರಾಯಾ
ಯಾತೋಽಭೂಃ ಸುಲಲಿತಮುದ್ಧವೇನ ಸಾರ್ಧಮ್ |
ಆವಾಸಂ ತ್ವದುಪಗಮೋತ್ಸವಂ ಸದೈವ
ಧ್ಯಾಯನ್ತ್ಯಾಃ ಪ್ರತಿದಿನವಾಸಸಜ್ಜಿಕಾಯಾಃ || ೭೭-೧ ||
ಉಪಗತೇ ತ್ವಯಿ ಪೂರ್ಣಮನೋರಥಾಂ
ಪ್ರಮದಸಂಭ್ರಮಕಮ್ಪ್ರಪಯೋಧರಾಮ್ |
ವಿವಿಧಮಾನನಮಾದಧತೀಂ ಮುದಾ
ರಹಸಿ ತಾಂ ರಮಯಾಞ್ಚಕೃಷೇ ಸುಖಮ್ || ೭೭-೨ ||
ಪೃಷ್ಟಾ ವರಂ ಪುನರಸಾವವೃಣೋದ್ವರಾಕೀ
ಭೂಯಸ್ತ್ವಯಾ ಸುರತಮೇವ ನಿಶಾನ್ತರೇಷು |
ಸಾಯುಜ್ಯಮಸ್ತ್ವಿತಿ ವದೇದ್ಬುಧ ಏವ ಕಾಮಂ
ಸಾಮೀಪ್ಯಮಸ್ತ್ವನಿಶಮಿತ್ಯಪಿ ನಾಬ್ರವೀತ್ಕಿಮ್ || ೭೭-೩ ||
ತತೋ ಭವಾನ್ದೇವ ನಿಶಾಸು ಕಾಸುಚಿ-
ನ್ಮೃಗೀದೃಶಂ ತಾಂ ನಿಭೃತಂ ವಿನೋದಯನ್ |
ಅದಾದುಪಶ್ಲೋಕ ಇತಿ ಶ್ರುತಂ ಸುತಂ
ಸ ನಾರದಾತ್ಸಾತ್ತ್ವತತನ್ತ್ರವಿದ್ಬಭೌ || ೭೭-೪ ||
ಅಕ್ರೂರಮನ್ದಿರಮಿತೋಽಥ ಬಲೋದ್ಧವಾಭ್ಯಾ-
ಮಭ್ಯರ್ಚಿತೋ ಬಹು ನುತೋ ಮುದಿತೇನ ತೇನ |
ಏನಂ ವಿಸೃಜ್ಯ ವಿಪಿನಾಗತಪಾಣ್ಡವೇಯ-
ವೃತ್ತಂ ವಿವೇದಿಥ ತಥಾ ಧೃತರಾಷ್ಟ್ರಚೇಷ್ಟಾಮ್ || ೭೭-೫ ||
ವಿಘಾತಾಜ್ಜಾಮಾತುಃ ಪರಮಸುಹೃದೋ ಭೋಜನೃಪತೇ-
ರ್ಜರಾಸನ್ಧೇ ರುನ್ಧತ್ಯನವಧಿರುಷಾನ್ಧೇಽಥ ಮಥುರಾಮ್ |
ರಥಾದ್ಯೈರ್ದ್ಯೋರ್ಲಬ್ಧೈಃ ಕತಿಪಯಬಲಸ್ತ್ವಂ ಬಲಯುತ-
ಸ್ತ್ರಯೋವಿಂಶತ್ಯಕ್ಷೌಹಿಣಿ ತದುಪನೀತಂ ಸಮಹೃಥಾಃ || ೭೭-೬ ||
ಬದ್ಧಂ ಬಲಾದಥ ಬಲೇನ ಬಲೋತ್ತರಂ ತ್ವಂ
ಭೂಯೋ ಬಲೋದ್ಯಮರಸೇನ ಮುಮೋಚಿಥೈನಮ್ |
ನಿಶ್ಶೇಷದಿಗ್ಜಯಸಮಾಹೃತವಿಶ್ವಸೈನ್ಯಾತ್
ಕೋಽನ್ಯಸ್ತತೋ ಹಿ ಬಲಪೌರುಷವಾಂಸ್ತದಾನೀಮ್ || ೭೭-೭ ||
ಭಗ್ನಸ್ಸ ಲಗ್ನಹೃದಯೋಽಪಿ ನೃಪೈಃ ಪ್ರಣುನ್ನೋ
ಯುದ್ಧಂ ತ್ವಯಾ ವ್ಯಧಿತ ಷೋಡಶಕೃತ್ವ ಏವಮ್ |
ಅಕ್ಷೌಹಿಣೀಃ ಶಿವ ಶಿವಾಸ್ಯ ಜಘನ್ಥ ವಿಷ್ಣೋ
ಸಂಭೂಯ ಸೈಕನವತಿತ್ರಿಶತಂ ತದಾನೀಮ್ || ೭೭-೮ ||
ಅಷ್ಟಾದಶೇಽಸ್ಯ ಸಮರೇ ಸಮುಪೇಯುಷಿ ತ್ವಂ
ದೃಷ್ಟ್ವಾ ಪುರೋಽಥ ಯವನಂ ಯವನತ್ರಿಕೋಟ್ಯಾ |
ತ್ವಷ್ಟ್ರಾ ವಿಧಾಪ್ಯ ಪುರಮಾಶು ಪಯೋಧಿಮಧ್ಯೇ
ತತ್ರಾಥ ಯೋಗಬಲತಃ ಸ್ವಜನಾನನೈಷೀಃ || ೭೭-೯ ||
ಪದ್ಭ್ಯಾಂ ತ್ವಂ ಪದ್ಮಮಾಲೀ ಚಕಿತ ಇವ ಪುರಾನ್ನಿರ್ಗತೋ ಧಾವಮಾನೋ
ಮ್ಲೇಚ್ಛೇಶೇನಾನುಯಾತೋ ವಧಸುಕೃತವಿಹೀನೇನ ಶೈಲೇ ನ್ಯಲೈಷೀಃ |
ಸುಪ್ತೇನಾಙ್ಘ್ರ್ಯಾಹತೇನ ದ್ರುತಮಥ ಮುಚುಕುನ್ದೇನ ಭಸ್ಮೀಕೃತೇಽಸ್ಮಿನ್
ಭೂಪಾಯಾಸ್ಮೈ ಗುಹಾನ್ತೇ ಸುಲಲಿತವಪುಷಾ ತಸ್ಥಿಷೇ ಭಕ್ತಿಭಾಜೇ || ೭೭-೧೦ ||
ಐಕ್ಷ್ವಾಕೋಽಹಂ ವಿರಕ್ತೋಽಸ್ಮ್ಯಖಿಲನೃಪಸುಖೇ ತ್ವತ್ಪ್ರಸಾದೈಕಕಾಙ್ಕ್ಷೀ
ಹಾ ದೇವೇತಿ ಸ್ತುವನ್ತಂ ವರವಿತತಿಷು ತಂ ನಿಸ್ಪೃಹಂ ವೀಕ್ಷ್ಯ ಹೃಷ್ಯನ್ |
ಮುಕ್ತೇಸ್ತುಲ್ಯಾಂ ಚ ಭಕ್ತಿಂ ಧುತಸಕಲಮಲಂ ಮೋಕ್ಷಮಪ್ಯಾಶು ದತ್ತ್ವಾ
ಕಾರ್ಯಂ ಹಿಂಸಾವಿಶುದ್ಧ್ಯೈ ತಪ ಇತಿ ಚ ತದಾ ಪ್ರಾಸ್ಥ ಲೋಕಪ್ರತೀತ್ಯೈ || ೭೭-೧೧ ||
ತದನು ಮಥುರಾಂ ಗತ್ವಾ ಹತ್ವಾ ಚಮೂಂ ಯವನಾಹೃತಾಂ
ಮಗಧಪತಿನಾ ಮಾರ್ಗೇ ಸೈನ್ಯೈಃ ಪುರೇವ ನಿವಾರಿತಃ |
ಚರಮವಿಜಯಂ ದರ್ಪಾಯಾಸ್ಮೈ ಪ್ರದಾಯ ಪಲಾಯಿತೋ
ಜಲಧಿನಗರೀಂ ಯಾತೋ ವಾತಾಲಯೇಶ್ವರ ಪಾಹಿ ಮಾಮ್ || ೭೭-೧೨ ||
ಇತಿ ಸಪ್ತಸಪ್ತತಿತಮದಶಕಂ ಸಮಾಪ್ತಂ
ನಾರಾಯಣೀಯಂ ಅಷ್ಟಸಪ್ತತಿತಮದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
