Sri Vishnu Vijaya Stotram – ಶ್ರೀ ವಿಷ್ಣು ವಿಜಯ ಸ್ತೋತ್ರಂ

ದೇವಾ ಊಚುಃ |
ನತಾಃ ಸ್ಮ ವಿಷ್ಣುಂ ಜಗದಾದಿಭೂತಂ
ಸುರಾಸುರೇಂದ್ರಂ ಜಗತಾಂ ಪ್ರಪಾಲಕಮ್ |
ಯನ್ನಾಭಿಪದ್ಮಾತ್ ಕಿಲ ಪದ್ಮಯೋನಿ-
-ರ್ಬಭೂವ ತಂ ವೈ ಶರಣಂ ಗತಾಃ ಸ್ಮಃ || ೧ ||

ನಮೋ ನಮೋ ಮತ್ಸ್ಯವಪುರ್ಧರಾಯ
ನಮೋಽಸ್ತು ತೇ ಕಚ್ಛಪರೂಪಧಾರಿಣೇ |
ನಮಃ ಪ್ರಕುರ್ಮಶ್ಚ ನೃಸಿಂಹರೂಪಿಣೇ
ತಥಾ ಪುನರ್ವಾಮನರೂಪಿಣೇ ನಮಃ || ೨ ||

ನಮೋಽಸ್ತು ತೇ ಕ್ಷತ್ರವಿನಾಶನಾಯ
ರಾಮಾಯ ರಾಮಾಯ ದಶಾಸ್ಯನಾಶಿನೇ |
ಪ್ರಲಂಬಹಂತ್ರೇ ಶಿತಿವಾಸಸೇ ನಮೋ
ನಮೋಽಸ್ತು ಬುದ್ಧಾಯ ಚ ದೈತ್ಯಮೋಹಿನೇ || ೩ ||

ಮ್ಲೇಚ್ಛಾಂತಕಾಯಾಪಿ ಚ ಕಲ್ಕಿನಾಮ್ನೇ
ನಮಃ ಪುನಃ ಕ್ರೋಡವಪುರ್ಧರಾಯ |
ಜಗದ್ಧಿತಾರ್ಥಂ ಚ ಯುಗೇ ಯುಗೇ ಭವಾನ್
ಬಿಭರ್ತಿ ರೂಪಂ ತ್ವಸುರಾಭವಾಯ || ೪ ||

ನಿಷೂದಿತೋಽಯಂ ಹ್ಯಧುನಾ ಕಿಲ ತ್ವಯಾ
ದೈತ್ಯೋ ಹಿರಣ್ಯಾಕ್ಷ ಇತಿ ಪ್ರಗಲ್ಭಃ |
ಯಶ್ಚೇಂದ್ರಮುಖ್ಯಾನ್ ಕಿಲ ಲೋಕಪಾಲಾನ್
ಸಂಹೇಲಯಾ ಚೈವ ತಿರಶ್ಚಕಾರ || ೫ ||

ಸ ವೈ ತ್ವಯಾ ದೇವಹಿತಾರ್ಥಮೇವ
ನಿಪಾತಿತೋ ದೇವವರ ಪ್ರಸೀದ |
ತ್ವಮಸ್ಯ ವಿಶ್ವಸ್ಯ ವಿಸರ್ಗಕರ್ತಾ
ಬ್ರಾಹ್ಮೇಣ ರೂಪೇಣ ಚ ದೇವದೇವ || ೬ ||

ಪಾತಾ ತ್ವಮೇವಾಸ್ಯ ಯುಗೇ ಯುಗೇ ಚ
ರೂಪಾಣಿ ಧತ್ಸೇ ಸುಮನೋಹರಾಣಿ |
ತ್ವಮೇವ ಕಾಲಾಗ್ನಿಹರಶ್ಚ ಭೂತ್ವಾ
ವಿಶ್ವಂ ಕ್ಷಯಂ ನೇಷ್ಯಸಿ ಚಾಂತಕಾಲೇ || ೭ ||

ಅತೋ ಭವಾನೇವ ಚ ವಿಶ್ವಕಾರಣಂ
ನ ತೇ ಪರಂ ಜೀವಮಜೀವಮೇವ ಚ |
ಯತ್ಕಿಂಚ ಭೂತಂ ಚ ಭವಿಷ್ಯರೂಪಂ
ಪ್ರವರ್ತಮಾನಂ ಚ ತಥೈವ ರೂಪಮ್ || ೮ ||

ಸರ್ವಂ ತ್ವಮೇವಾಸಿ ಚರಾಚರಾಖ್ಯಂ
ನ ಭಾತಿ ವಿಶ್ವಂ ತ್ವದೃತೇ ಚ ಕಿಂಚಿತ್ |
ಅಸ್ತೀತಿ ನಾಸ್ತೀತಿ ಚ ಭೇದನಿಷ್ಠಂ
ತ್ವಯ್ಯೇವ ಭಾತಂ ಸದಸತ್ಸ್ವರೂಪಮ್ || ೯ ||

ತತೋ ಭವಂತಂ ಕತಮೋಽಪಿ ದೇವ
ನ ಜ್ಞಾತುಮರ್ಹತ್ಯವಿಪಕ್ವಬುದ್ಧಿಃ |
ಕೃತೇ ಭವತ್ಪಾದಪರಾಯಣಂ ಜನಂ
ತೇನಾಗತಾಃ ಸ್ಮಃ ಶರಣಂ ಶರಣ್ಯಮ್ || ೧೦ ||

ವ್ಯಾಸ ಉವಾಚ |
ತತೋ ವಿಷ್ಣುಃ ಪ್ರಸನ್ನಾತ್ಮಾ ಉವಾಚ ತ್ರಿದಿವೌಕಸಃ |
ತುಷ್ಟೋಽಸ್ಮಿ ದೇವಾ ಭದ್ರಂ ವೋ ಯುಷ್ಮತ್ ಸ್ತೋತ್ರೇಣ ಸಾಂಪ್ರತಮ್ || ೧೧ ||

ಯ ಇದಂ ಪ್ರಪಠೇದ್ಭಕ್ತ್ಯಾ ವಿಜಯಸ್ತೋತ್ರಮಾದರಾತ್ |
ನ ತಸ್ಯ ದುರ್ಲಭಂ ದೇವಾಸ್ತ್ರಿಷು ಲೋಕೇಷು ಕಿಂಚನ || ೧೨ ||

ಗವಾಂ ಶತಸಹಸ್ರಸ್ಯ ಸಮ್ಯಗ್ದತ್ತಸ್ಯ ಯತ್ಫಲಮ್ |
ತತ್ಫಲಂ ಸಮವಾಪ್ನೋತಿ ಕೀರ್ತನಶ್ರವಣಾನ್ನರಃ || ೧೩ ||

ಸರ್ವಕಾಮಪ್ರದಂ ನಿತ್ಯಂ ದೇವದೇವಸ್ಯ ಕೀರ್ತನಮ್ |
ಅತಃ ಪರಂ ಮಹಾಜ್ಞಾನಂ ನ ಭೂತಂ ನ ಭವಿಷ್ಯತಿ || ೧೪ ||

ಇತಿ ಪದ್ಮಪುರಾಣೋಕ್ತಂ ಶ್ರೀ ವಿಷ್ಣು ವಿಜಯ ಸ್ತೋತ್ರಮ್ |

Did you see any mistake/variation in the content above? Click here to report mistakes and corrections in Stotranidhi content.