Sri Vishnu Stotram (Shiva Purane) – ಶ್ರೀ ವಿಷ್ಣು ಸ್ತೋತ್ರಂ (ಶಿವಪುರಾಣೇ)

ದೇವಾ ಊಚುಃ |
ಹೃಷೀಕೇಶ ಮಹಾಬಾಹೋ ಭಗವನ್ ಮಧುಸೂದನ |
ನಮಸ್ತೇ ದೇವದೇವೇಶ ಸರ್ವದೈತ್ಯವಿನಾಶಕ || ೧ ||

ಮತ್ಸ್ಯರೂಪಾಯ ತೇ ವಿಷ್ಣೋ ವೇದಾನ್ನೀತವತೇ ನಮಃ |
ಸತ್ಯವ್ರತೇನ ಸದ್ರಾಜ್ಞಾ ಪ್ರಲಯಾಬ್ಧಿವಿಹಾರಿಣೇ || ೨ ||

ಕುರ್ವಾಣಾನಾಂ ಸುರಾಣಾಂ ಚ ಮಂಥನಾಯೋದ್ಯಮಂ ಭೃಶಮ್ |
ಬಿಭ್ರತೇ ಮಂದರಗಿರಿಂ ಕೂರ್ಮರೂಪಾಯ ತೇ ನಮಃ || ೩ ||

ನಮಸ್ತೇ ಭಗವನ್ನಾಥ ಕ್ರತವೇ ಸೂಕರಾತ್ಮನೇ |
ವಸುಂಧರಾಂ ಜನಾಧಾರಾಂ ಮೂರ್ಧತೋ ಬಿಭ್ರತೇ ನಮಃ || ೪ ||

ವಾಮನಾಯ ನಮಸ್ತುಭ್ಯಮುಪೇಂದ್ರಾಖ್ಯಾಯ ವಿಷ್ಣವೇ |
ವಿಪ್ರರೂಪೇಣ ದೈತ್ಯೇಂದ್ರಂ ಬಲಿಂ ಛಲಯತೇ ವಿಭೋ || ೫ ||

ನಮಃ ಪರಶುರಾಮಾಯ ಕ್ಷತ್ರನಿಃಕ್ಷತ್ರಕಾರಿಣೇ |
ಮಾತುರ್ಹಿತಕೃತೇ ತುಭ್ಯಂ ಕುಪಿತಾಯಾಸತಾಂ ದ್ರುಹೇ || ೬ ||

ರಾಮಾಯ ಲೋಕರಾಮಾಯ ಮರ್ಯಾದಾಪುರುಷಾಯ ತೇ |
ರಾವಣಾಂತಕರಾಯಾಶು ಸೀತಾಯಾಃ ಪತಯೇ ನಮಃ || ೭ ||

ನಮಸ್ತೇ ಜ್ಞಾನಗೂಢಾಯ ಕೃಷ್ಣಾಯ ಪರಮಾತ್ಮನೇ |
ರಾಧಾವಿಹಾರಶೀಲಾಯ ನಾನಾಲೀಲಾಕರಾಯ ಚ || ೮ ||

ನಮಸ್ತೇ ಗೂಢದೇಹಾಯ ವೇದನಿಂದಾಕರಾಯ ಚ |
ಯೋಗಾಚಾರ್ಯಾಯ ಜೈನಾಯ ಬೌದ್ಧರೂಪಾಯ ಮಾಪತೇ || ೯ ||

ನಮಸ್ತೇ ಕಲ್ಕಿರೂಪಾಯ ಮ್ಲೇಚ್ಛಾನಾಮಂತಕಾರಿಣೇ |
ಅನಂತಶಕ್ತಿರೂಪಾಯ ಸದ್ಧರ್ಮಸ್ಥಾಪನಾಯ ಚ || ೧೦ ||

ನಮಸ್ತೇ ಕಪಿಲರೂಪಾಯ ದೇವಹೂತ್ಯೈ ಮಹಾತ್ಮನೇ |
ವದತೇ ಸಾಂಖ್ಯಯೋಗಂ ಚ ಸಾಂಖ್ಯಾಚಾರ್ಯಾಯ ವೈ ಪ್ರಭೋ || ೧೧ ||

ನಮಃ ಪರಮಹಂಸಾಯ ಜ್ಞಾನಂ ಸಂವದತೇ ಪರಮ್ |
ವಿಧಾತ್ರೇ ಜ್ಞಾನರೂಪಾಯ ಯೇನಾತ್ಮಾ ಸಂಪ್ರಸೀದತಿ || ೧೨ ||

ವೇದವ್ಯಾಸಾಯ ವೇದಾನಾಂ ವಿಭಾಗಂ ಕುರ್ವತೇ ನಮಃ |
ಹಿತಾಯ ಸರ್ವಲೋಕಾನಾಂ ಪುರಾಣರಚನಾಯ ಚ || ೧೩ ||

ಏವಂ ಮತ್ಸ್ಯಾದಿತನುಭಿರ್ಭಕ್ತಕಾರ್ಯೋದ್ಯತಾಯ ತೇ |
ಸರ್ಗಸ್ಥಿತಿಧ್ವಂಸಕರ್ತ್ರೇ ನಮಸ್ತೇ ಬ್ರಹ್ಮಣೇ ಪ್ರಭೋ || ೧೪ ||

ಆರ್ತಿಹಂತ್ರೇ ಸ್ವದಾಸಾನಾಂ ಸುಖದಾಯ ಶುಭಾಯ ಚ |
ಪೀತಾಂಬರಾಯ ಹರಯೇ ತಾರ್ಕ್ಷ್ಯಯಾನಾಯ ತೇ ನಮಃ |
ಸರ್ವಕ್ರಿಯಾಯೈಕಕರ್ತ್ರೇ ಶರಣ್ಯಾಯ ನಮೋ ನಮಃ || ೧೫ ||

ದೈತ್ಯಸಂತಾಪಿತಾಮರ್ತ್ಯದುಃಖಾದಿಧ್ವಂಸವಜ್ರಕ |
ಶೇಷತಲ್ಪಶಯಾಯಾರ್ಕಚಂದ್ರನೇತ್ರಾಯ ತೇ ನಮಃ || ೧೬ ||

ಕೃಪಾಸಿಂಧೋ ರಮಾನಾಥ ಪಾಹಿ ನಃ ಶರಣಾಗತಾನ್ |
ಜಲಂಧರೇಣ ದೇವಾಶ್ಚ ಸ್ವರ್ಗಾತ್ ಸರ್ವೇ ನಿರಾಕೃತಾಃ || ೧೭ ||

ಸೂರ್ಯೋ ನಿಸ್ಸಾರಿತಃ ಸ್ಥಾನಾಚ್ಚಂದ್ರೋ ವಹ್ನಿಸ್ತಥೈವ ಚ |
ಪಾತಾಲಾನ್ನಾಗರಾಜಶ್ಚ ಧರ್ಮರಾಜೋ ನಿರಾಕೃತಃ || ೧೮ ||

ವಿಚರಂತಿ ಯಥಾ ಮರ್ತ್ಯಾಃ ಶೋಭಂತೇ ನೈವ ತೇ ಸುರಾಃ |
ಶರಣಂ ತೇ ವಯಂ ಪ್ರಾಪ್ತಾ ವಧಸ್ತಸ್ಯ ವಿಚಿಂತ್ಯತಾಮ್ || ೧೯ ||

ಇತಿ ಶ್ರೀಶಿವಪುರಾಣೇ ರುದ್ರಸಂಹಿತಾಯಾಂ ಯುದ್ಧಖಂಡೇ ಷೋಡಶೋಽಧ್ಯಾಯೇ ಸರ್ವದೇವ ಕೃತ ಶ್ರೀ ವಿಷ್ಣು ಸ್ತೋತ್ರಮ್ ||

Did you see any mistake/variation in the content above? Click here to report mistakes and corrections in Stotranidhi content.