Read in తెలుగు / ಕನ್ನಡ / தமிழ் / देवनागरी / English (IAST)
ಮುದ್ರಾಕ್ಷಮಾಲಾಽಮೃತಪಾತ್ರವಿದ್ಯಾ
ವ್ಯಾಘ್ರಾಜಿನಾರ್ಧೇಂದುಫಣೀಂದ್ರಯುಕ್ತಮ್ |
ಯೋಗೀಂದ್ರಪರ್ಜನ್ಯ ಮನಃ ಸರೋಜ-
-ಭೃಂಗಂ ಭಜೇಽಹಂ ಹೃದಿ ದಕ್ಷಿಣಾಸ್ಯಮ್ || ೧ ||
ಸ್ಫುಟವಟನಿಕಟಸ್ಥಂ ಸ್ತೂಯಮಾನಾವಭಾಸಂ
ಪಟುಭುಜತಟಬದ್ಧವ್ಯಾಘ್ರಚರ್ಮೋತ್ತರೀಯಮ್ |
ಚಟುಲನಿಟಲನೇತ್ರಂ ಚಂದ್ರಚೂಡಂ ಮುನೀಶಂ
ಸ್ಫಟಿಕಪಟಲದೇಹಂ ಭಾವಯೇ ದಕ್ಷಿಣಾಸ್ಯಮ್ || ೨ ||
ಆವಾಹಯೇ ಸುಂದರನಾಗಭೂಷಂ
ವಿಜ್ಞಾನಮುದ್ರಾಂಚಿತ ಪಂಚಶಾಖಮ್ |
ಭಸ್ಮಾಂಗರಾಗೇಣ ವಿರಾಜಮಾನಂ
ಶ್ರೀದಕ್ಷಿಣಾಮೂರ್ತಿ ಮಹಾತ್ಮರೂಪಮ್ || ೩ ||
ಸುವರ್ಣರತ್ನಾಮಲವಜ್ರನೀಲ-
-ಮಾಣಿಕ್ಯಮುಕ್ತಾಮಣಿಯುಕ್ತಪೀಠೇ |
ಸ್ಥಿರೋ ಭವ ತ್ವಂ ವರದೋ ಭವ ತ್ವಂ
ಸಂಸ್ಥಾಪಯಾಮೀಶ್ವರ ದಕ್ಷಿಣಾಸ್ಯ || ೪ ||
ಶ್ರೀಜಾಹ್ನವೀನಿರ್ಮಲತೋಯಮೀಶ
ಚಾರ್ಘ್ಯಾರ್ಥಮಾನೀಯ ಸಮರ್ಪಯಿಷ್ಯೇ |
ಪ್ರಸನ್ನವಕ್ತ್ರಾಂಬುಜಲೋಕವಂದ್ಯ
ಕಾಲತ್ರಯೇಹಂ ತವ ದಕ್ಷಿಣಾಸ್ಯ || ೫ ||
ಕಸ್ತೂರಿಕಾಮಿಶ್ರಮಿದಂ ಗೃಹಾಣ
ರುದ್ರಾಕ್ಷಮಾಲಾಭರಣಾಂಕಿತಾಂಗ |
ಕಾಲತ್ರಯಾಬಾಧ್ಯಜಗನ್ನಿವಾಸ
ಪಾದ್ಯಂ ಪ್ರದಾಸ್ಯೇ ಹೃದಿ ದಕ್ಷಿಣಾಸ್ಯ || ೬ ||
ಮುದಾಹಮಾನಂದ ಸುರೇಂದ್ರವಂದ್ಯ
ಗಂಗಾನದೀತೋಯಮಿದಂ ಹಿ ದಾಸ್ಯೇ |
ತವಾಧುನಾ ಚಾಚಮನಂ ಕುರುಷ್ವ
ಶ್ರೀದಕ್ಷಿಣಾಮೂರ್ತಿ ಗುರುಸ್ವರೂಪ || ೭ ||
ಸರ್ಪಿಃ ಪಯೋ ದಧಿ ಮಧು ಶರ್ಕರಾಭಿಃ ಪ್ರಸೇಚಯೇ |
ಪಂಚಾಮೃತಮಿದಂ ಸ್ನಾನಂ ದಕ್ಷಿಣಾಸ್ಯ ಕುರು ಪ್ರಭೋ || ೮ ||
ವೇದಾಂತವೇದ್ಯಾಖಿಲಶೂಲಪಾಣೇ
ಬ್ರಹ್ಮಾಮರೋಪೇಂದ್ರಸುರೇಂದ್ರವಂದ್ಯ |
ಸ್ನಾನಂ ಕುರುಷ್ವಾಮಲಗಾಂಗತೋಯೇ
ಸುವಾಸಿತೇಸ್ಮಿನ್ ಕುರು ದಕ್ಷಿಣಾಸ್ಯ || ೯ ||
ಕೌಶೇಯವಸ್ತ್ರೇಣ ಚ ಮಾರ್ಜಯಾಮಿ
ದೇವೇಶ್ವರಾಂಗಾನಿ ತವಾಮಲಾನಿ |
ಪ್ರಜ್ಞಾಖ್ಯಲೋಕತ್ರಿತಯಪ್ರಸನ್ನ
ಶ್ರೀದಕ್ಷಿಣಾಸ್ಯಾಖಿಲಲೋಕಪಾಲ || ೧೦ ||
ಸುವರ್ಣತಂತೂದ್ಭವಮಗ್ರ್ಯಮೀಶ
ಯಜ್ಞೋಪವೀತಂ ಪರಿಧತ್ಸ್ವದೇವ |
ವಿಶಾಲಬಾಹೂದರಪಂಚವಕ್ತ್ರ
ಶ್ರೀದಕ್ಷಿಣಾಮೂರ್ತಿ ಸುಖಸ್ವರೂಪ || ೧೧ ||
ಕಸ್ತೂರಿಕಾಚಂದನಕುಂಕುಮಾದಿ-
-ವಿಮಿಶ್ರಗಂಧಂ ಮಣಿಪಾತ್ರಸಂಸ್ಥಮ್ |
ಸಮರ್ಪಯಿಷ್ಯಾಮಿ ಮುದಾ ಮಹಾತ್ಮನ್
ಗೌರೀಮನೋವಸ್ಥಿತದಕ್ಷಿಣಾಸ್ಯ || ೧೨ ||
ಶುಭ್ರಾಕ್ಷತೈಃ ಶುಭ್ರತಿಲೈಃ ಸುಮಿಶ್ರೈಃ
ಸಂಪೂಜಯಿಷ್ಯೇ ಭವತಃ ಪರಾತ್ಮನ್ |
ತದೇಕನಿಷ್ಠೇನ ಸಮಾಧಿನಾಥ
ಸದಾಹಮಾನಂದ ಸುದಕ್ಷಿಣಾಸ್ಯ || ೧೩ ||
ಸುರತ್ನದಾಂಗೇಯ ಕಿರೀಟಕುಂಡಲಂ
ಹಾರಾಂಗುಳೀಕಂಕಣಮೇಖಲಾವೃತಮ್ |
ಖಂಡೇಂದುಚೂಡಾಮೃತಪಾತ್ರಯುಕ್ತಂ
ಶ್ರೀದಕ್ಷಿಣಾಮೂರ್ತಿಮಹಂ ಭಜಾಮಿ || ೧೪ ||
ಮುಕ್ತಾಮಣಿಸ್ಥಾಪಿತಕರ್ಬುರಪ್ರ-
-ಸೂನೈಃ ಸದಾಹಂ ಪರಿಪೂಜಯಿಷ್ಯೇ |
ಕುಕ್ಷಿಪ್ರಪುಷ್ಟಾಖಿಲಲೋಕಜಾಲ
ಶ್ರೀದಕ್ಷಿಣಾಮೂರ್ತಿ ಮಹತ್ಸ್ವರೂಪ || ೧೫ ||
ದಶಾಂಗಧೂಪಂ ಪರಿಕಲ್ಪಯಾಮಿ
ನಾನಾಸುಗಂಧಾನ್ವಿತಮಾಜ್ಯಯುಕ್ತಮ್ |
ಮೇಧಾಖ್ಯ ಸರ್ವಜ್ಞ ಬುಧೇಂದ್ರಪೂಜ್ಯ
ದಿಗಂಬರ ಸ್ವೀಕುರು ದಕ್ಷಿಣಾಸ್ಯ || ೧೬ ||
ಆಜ್ಯೇನ ಸಂಮಿಶ್ರಮಿಮಂ ಪ್ರದೀಪಂ
ವರ್ತಿತ್ರಯೇಣಾನ್ವಿತಮಗ್ನಿಯುಕ್ತಮ್ |
ಗೃಹಾಣ ಯೋಗೀಂದ್ರ ಮಯಾರ್ಪಿತಂ ಭೋಃ
ಶ್ರೀದಕ್ಷಿಣಾಮೂರ್ತಿಗುರೋ ಪ್ರಸೀದ || ೧೭ ||
ಶಾಲ್ಯೋದನಂ ನಿರ್ಮಲಸೂಪಶಾಕ-
-ಭಕ್ಷ್ಯಾಜ್ಯಸಂಯುಕ್ತದಧಿಪ್ರಸಿಕ್ತಮ್ |
ಕಪಿತ್ಥ ಸದ್ರಾಕ್ಷಫಲೈಶ್ಚ ಚೂತೈಃ
ಸಾಪೋಶನಂ ಭಕ್ಷಯ ದಕ್ಷಿಣಾಸ್ಯ || ೧೮ ||
ಗುಡಾಂಬು ಸತ್ಸೈಂಧವಯುಕ್ತತಕ್ರಂ
ಕರ್ಪೂರಪಾಟೀರ ಲವಂಗಯುಕ್ತಮ್ |
ಯಜ್ಞೇಶ ಕಾಮಾಂತಕ ಪುಣ್ಯಮೂರ್ತೇ
ಪಿಬೋದಕಂ ನಿರ್ಮಲ ದಕ್ಷಿಣಾಸ್ಯ || ೧೯ ||
ಖಮಾರ್ಗನಿರ್ಯಜ್ಜಲಮಾಶು ದೇವ
ಕುರೂತ್ತರಾಪೋಶನಮಭ್ರಕೇಶ |
ಪ್ರಕ್ಷಾಳನಂ ಪಾಣಿಯುಗಸ್ಯ ಶರ್ವ
ಗಂಡೂಷಮಾಪಾದಯ ದಕ್ಷಿಣಾಸ್ಯ || ೨೦ ||
ಸಮ್ಯಗ್ಜಲೇನಾಚಮನಂ ಕುರುಷ್ವ
ಸ್ವಸ್ಥೋ ಭವ ತ್ವಂ ಮಮ ಚಾಗ್ರಭಾಗೇ |
ಚಿದಾಕೃತೇ ನಿರ್ಮಲಪೂರ್ಣಕಾಮ
ವಿನಿರ್ಮಿತಂ ಪಾವನ ದಕ್ಷಿಣಾಸ್ಯ || ೨೧ ||
ತಾಂಬೂಲಮದ್ಯ ಪ್ರತಿಸಂಗೃಹಾಣ
ಕರ್ಪೂರಮುಕ್ತಾಮಣಿಚೂರ್ಣಯುಕ್ತಮ್ |
ಸುಪರ್ಣಪರ್ಣಾನ್ವಿತಪೂಗಖಂಡ-
-ಮನೇಕರೂಪಾಕೃತಿ ದಕ್ಷಿಣಾಸ್ಯ || ೨೨ ||
ನೀರಾಜನಂ ನಿರ್ಮಲಪಾತ್ರಸಂಸ್ಥಂ
ಕರ್ಪೂರಸಂದೀಪಿತಮಚ್ಛರೂಪಮ್ |
ಕರೋಮಿ ವಾಮೇಶ ತವೋಪರೀದಂ
ವ್ಯೋಮಾಕೃತೇ ಶಂಕರ ದಕ್ಷಿಣಾಸ್ಯ || ೨೩ ||
ತತಃ ಪರಂ ದರ್ಪಣಮೀಶ ಪಶ್ಯ
ಸ್ವಚ್ಛಂ ಜಗದ್ದೀಪಿತಚಕ್ರಭಾಸ್ವತ್ |
ಮಾಣಿಕ್ಯಮುಕ್ತಾಮಣಿಹೇಮನೀಲ-
-ವಿನಿರ್ಮಿತಂ ಪಾವನ ದಕ್ಷಿಣಾಸ್ಯ || ೨೪ ||
ಮಂದಾರಪಂಕೇರುಹಕುಂದಜಾತೀ-
-ಸುಗಂಧಪುಷ್ಪಾಂಜಲಿಮರ್ಪಯಾಮಿ |
ತ್ರಿಶೂಲ ಢಕ್ಕಾಂಚಿತ ಪಾಣಿಯುಗ್ಮ
ತೇ ದಕ್ಷಿಣಾಮೂರ್ತಿ ವಿರೂಪಧಾರಿನ್ || ೨೫ ||
ಪ್ರದಕ್ಷಿಣಂ ಸಮ್ಯಗಹಂ ಕರಿಷ್ಯೇ
ಕಾಲತ್ರಯೇ ತ್ವಾಂ ಕರುಣಾಭಿರಾಮಮ್ |
ಶಿವಾಮನೋನಾಥ ಮಮಾಪರಾಧಂ
ಕ್ಷಮಸ್ವ ಯಜ್ಞೇಶ್ವರ ದಕ್ಷಿಣಾಸ್ಯ || ೨೬ ||
ನಮೋ ನಮಃ ಪಾಪವಿನಾಶನಾಯ
ನಮೋ ನಮಃ ಕಂಜಭವಾರ್ಚಿತಾಯ |
ನಮೋ ನಮಃ ಕೃಷ್ಣಹೃದಿಸ್ಥಿತಾಯ
ಶ್ರೀದಕ್ಷಿಣಾಮೂರ್ತಿ ಮಹೇಶ್ವರಾಯ || ೨೭ ||
ಇತಿ ಶ್ರೀವಿಜ್ಞಾನೇಂದ್ರ ವಿರಚಿತಂ ಶ್ರೀ ದಕ್ಷಿಣಾಮೂರ್ತಿ ಮಾನಸಿಕ ಪೂಜಾ ಸ್ತೋತ್ರಮ್ ||
ಇನ್ನಷ್ಟು ಶ್ರೀ ಶಿವ ಸ್ತೋತ್ರಗಳು ನೋಡಿ. ಇನ್ನಷ್ಟು ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಗಳು ನೋಡಿ.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
