Sri Jwalamukhi Stotram 1 – ಶ್ರೀ ಜ್ವಾಲಾಮುಖೀ ಸ್ತೋತ್ರಂ – 1

ಸ್ತೋತ್ರನಿಧಿ → ದೇವೀ ಸ್ತೋತ್ರಗಳು → ಶ್ರೀ ಜ್ವಾಲಾಮುಖೀ ಸ್ತೋತ್ರಂ – 1

ಶ್ರೀಭೈರವ ಉವಾಚ |
ತಾರಂ ಯೋ ಭಜತೇ ಮಾತರ್ಬೀಜಂ ತವ ಸುಧಾಕರಮ್ |
ಪಾರಾವಾರಸುತಾ ನಿತ್ಯಂ ನಿಶ್ಚಲಾ ತದ್ಗೃಹೇ ವಸೇತ್ || ೧ ||

ಶೂನ್ಯಂ ಯೋ ದಹನಾಧಿರೂಢಮಮಲಂ ವಾಮಾಕ್ಷಿಸಂಸೇವಿತಂ
ಸೇಂದುಂ ಬಿಂದುಯುತಂ ಭವಾನಿ ವರದೇ ಸ್ವಾಂತೇ ಸ್ಮರೇತ್ ಸಾಧಕಃ |
ಮೂಕಸ್ಯಾಪಿ ಸುರೇಂದ್ರಸಿಂಧುಜಲವದ್ವಾಗ್ದೇವತಾ ಭಾರತೀ
ಗದ್ಯಃ ಪದ್ಯಮಯೀಂ ನಿರರ್ಗಲತರಾ ಮಾತರ್ಮುಖೇ ತಿಷ್ಠತಿ || ೨ ||

ಶುಭಂ ವಹ್ನ್ಯಾರೂಢಂ ಮತಿಯುತಮನಲ್ಪೇಷ್ಟಫಲದಂ
ಸಬಿಂದ್ವೀಂದುಂ ಮಂದೋ ಯದಿ ಜಪತಿ ಬೀಜಂ ತವ ಪ್ರಿಯಮ್ |
ತದಾ ಮಾತಃ ಸ್ವಃಸ್ತ್ರೀಜನವಿಹರಣಕ್ಲೇಶಸಹಿತಃ
ಸುಖಮಿಂದ್ರೋದ್ಯಾನೇ ಸ್ವಪಿತಿ ಸ ಭವತ್ಪೂಜನರತಃ || ೩ ||

ಜ್ವಾಲಾಮುಖೀತಿ ಜಪತೇ ತವ ನಾಮವರ್ಣಾನ್
ಯಃ ಸಾಧಕೋ ಗಿರಿಶಪತ್ನಿ ಸುಭಕ್ತಿಪೂರ್ವಮ್ |
ತಸ್ಯಾಂಘ್ರಿಪದ್ಮಯುಗಳಂ ಸುರನಾಥವೇಶ್ಯಾಃ
ಸೀಮಂತರತ್ನಕಿರಣೈರನುರಂಜಯಂತಿ || ೪ ||

ಪಾಶಾಂಬುಜಾಭಯಧರೇ ಮಮ ಸರ್ವಶತ್ರೂನ್
ಶಬ್ದಂ ತ್ವಿತಿ ಸ್ಮರತಿ ಯಸ್ತವ ಮಂತ್ರಮಧ್ಯೇ |
ತಸ್ಯಾದ್ರಿಪುತ್ರಿ ಚರಣೌ ಬಹುಪಾಂಸುಯುಕ್ತೌ
ಪ್ರಕ್ಷಾಲಯಂತ್ಯರಿವಧೂನಯನಾಶ್ರುಪಾತಾಃ || ೫ ||

ಭಕ್ಷಯದ್ವಯಮಿದಂ ಯದಿ ಭಕ್ತ್ಯಾ
ಸಾಧಕೋ ಜಪತಿ ಚೇತಸಿ ಮಾತಃ |
ಸ ಸ್ಮರಾರಿರಿವ ತ್ವತ್ಪ್ರಸಾದತ-
-ಸ್ತ್ವತ್ಪದಂ ಚ ಲಭತೇ ದಿವಾನಿಶಮ್ || ೬ ||

ಕೂರ್ಚಬೀಜಮನಘಂ ಯದಿ ಧ್ಯಾಯೇತ್
ಸಾಧಕಸ್ತವ ಮಹೇಶ್ವರಿ ಯೋಽಂತಃ |
ಅಷ್ಟಹಸ್ತಕಮಲೇಷು ಸುವಶ್ಯಾ-
-ಸ್ತಸ್ಯ ತ್ರ್ಯಂಬಕಸಮಸ್ತಸಿದ್ಧಯಃ || ೭ ||

ಠದ್ವಯಂ ತವ ಮನೂತ್ತರಸ್ಥಿತಂ
ಯೋ ಜಪೇತ್ತು ಪರಮಪ್ರಭಾವದಮ್ |
ತಸ್ಯ ದೇವಿ ಹರಿಶಂಕರಾದಯಃ
ಪೂಜಯಂತಿ ಚರಣೌ ದಿವೌಕಸಃ || ೮ ||

ಓಂ ಹ್ರೀಂ ಶ್ರೀಂ ತ್ರ್ಯಕ್ಷರೇ ದೇವಿ ಸುರಾಸುರನಿಷೂದಿನಿ |
ತ್ರೈಲೋಕ್ಯಾಭಯದೇ ಮಾತರ್ಜ್ವಾಲಾಮುಖಿ ನಮೋಽಸ್ತು ತೇ || ೯ ||

ಉದಿತಾರ್ಕದ್ಯುತೇ ಲಕ್ಷ್ಮಿ ಲಕ್ಷ್ಮೀನಾಥಸಮರ್ಚಿತೇ |
ವರಾಂಬುಜಾಭಯಧರೇ ಜ್ವಾಲಾಮುಖಿ ನಮೋಽಸ್ತು ತೇ || ೧೦ ||

ಸರ್ವಸಾರಮಯಿ ಶರ್ವೇ ಸರ್ವಾಮರನಮಸ್ಕೃತೇ |
ಸತ್ಯೇ ಸತಿ ಸದಾಚಾರೇ ಜ್ವಾಲಾಮುಖಿ ನಮೋಽಸ್ತು ತೇ || ೧೧ ||

ಯಸ್ಯಾ ಮೂರ್ಧ್ನಿ ಶಶೀ ತ್ರಿಲೋಚನಗತಾ ಯಸ್ಯಾ ರವೀಂದ್ವಗ್ನಯಃ
ಪಾಶಾಂಭೋಜವರಾಭಯಾಃ ಕರತಲಾಂಭೋಜೇಷು ಸದ್ಧೇತಯಃ |
ಗಾತ್ರೇ ಕುಂಕುಮಸನ್ನಿಭಾ ದ್ಯುತಿರಹಿರ್ಯಸ್ಯಾಗಲೇ ಸಂತತಂ
ದೇವೀಂ ಕೋಟಿಸಹಸ್ರರಶ್ಮಿಸದೃಶೀಂ ಜ್ವಾಲಾಮುಖೀಂ ನೌಮ್ಯಹಮ್ || ೧೨ ||

ನಿದ್ರಾಂ ನೋ ಭಜತೇ ವಿಧಿರ್ಭಗವತಿ ಶಂಕಾ ಶಿವಂ ನೋ ತ್ಯಜೇ-
-ದ್ವಿಷ್ಣುರ್ವ್ಯಾಕುಲತಾಮಲಂ ಕಮಲಿನೀಕಾಂತೋಽಪಿ ಧತ್ತೇ ಭಯಮ್ |
ದೃಷ್ಟ್ವಾ ದೇವಿ ತ್ವದೀಯಕೋಪದಹನಜ್ವಾಲಾಂ ಜ್ವಲಂತಿ ತದಾ
ದೇವಃ ಕುಂಕುಮಪೀತಗಂಡಯುಗಳಃ ಸಂಕ್ರಂದನಃ ಕ್ರಂದತಿ || ೧೩ ||

ಯಾಮಾರಾಧ್ಯ ದಿವಾನಿಶಂ ಸುರಸರಿತ್ತೀರೇ ಸ್ತವೈರಾತ್ಮಭೂ-
-ರುದ್ಯದ್ಭಾಸ್ವರಘರ್ಮಭಾನುಸದೃಶೀಂ ಪ್ರಾಪ್ತೋಽಮರಜ್ಯೇಷ್ಠತಾಮ್ |
ದಾರಿದ್ರ್ಯೋರಗದಷ್ಟಲೋಕತ್ರಿತಯೀಸಂಜಿವನೀಂ ಮಾತರಂ
ದೇವೀಂ ತಾಂ ಹೃದಯೇ ಶಶಾಂಕಶಕಲಾಚೂಡಾವತಂಸಾಂ ಭಜೇ || ೧೪ ||

ಆಪೀನಸ್ತನಶ್ರೋಣಿಭಾರನಮಿತಾಂ ಕಂದರ್ಪದರ್ಪೋಜ್ಜ್ವಲಾಂ
ಲಾವಣ್ಯಾಂಕಿತರಮ್ಯಗಂಡಯುಗಳಾಂ ಯಸ್ತ್ವಾಂ ಸ್ಮರೇತ್ ಸಾಧಕಃ |
ವಶ್ಯಾಸ್ತಸ್ಯ ಧರಾಭೃದೀಶ್ವರಸುತೇ ಗೀರ್ವಾಣವಾಮಭ್ರುವಃ
ಪಾದಾಂಭೋಜತಲಂ ಭಜಂತಿ ತ್ರಿದಶಾ ಗಂಧರ್ವಸಿದ್ಧಾದಯಃ || ೧೫ ||

ಹೃತ್ವಾ ದೇವಿ ಶಿರೋ ವಿಧೇರ್ಯದಕರೋತ್ ಪಾತ್ರಂ ಕರಾಂಭೋರುಹೇ
ಶೂಲಪ್ರೋತಮಮುಂ ಹರಿಂ ವ್ಯಗಮಯತ್ ಸದ್ಭೂಷಣಂ ಸ್ಕಂಧಯೋಃ |
ಕಾಲಾಂತೇ ತ್ರಿತಯಂ ಮುಖೇಂದುಕುಹರೇ ಶಂಭೋಃ ಶಿರಃ ಪಾರ್ವತಿ
ತನ್ಮಾತರ್ಭುವನೇ ವಿಚಿತ್ರಮಖಿಲಂ ಜಾನೇ ಭವತ್ಯಾಃ ಶಿವೇ || ೧೬ ||

ಗಾಯತ್ರೀ ಪ್ರಕೃತಿರ್ಗಳೇಽಪಿ ವಿಧೃತಾ ಸಾ ತ್ವಂ ಶಿವೇ ವೇಧಸಾ
ಶ್ರೀರೂಪಾ ಹರಿಣಾಪಿ ವಕ್ಷಸಿ ಧೃತಾಪ್ಯರ್ಧಾಂಗಭಾಗೇ ತಥಾ |
ಶರ್ವೇಣಾಪಿ ಭವಾನಿ ದೇವಿ ಸಕಲಾಃ ಖ್ಯಾತುಂ ನ ಶಕ್ತಾ ವಯಂ
ತ್ವದ್ರೂಪಂ ಹೃದಿ ಮಾದೃಶಾಂ ಜಡಧಿಯಾಂ ಧ್ಯಾತುಂ ಕಥೈವಾಸ್ತಿ ಕಾ || ೧೭ ||

ಜ್ವಾಲಾಮುಖೀಸ್ತವಮಿಮಂ ಪಠತೇ ಯದಂತಃ
ಶ್ರೀಮಂತ್ರರಾಜಸಹಿತಂ ವಿಭವೈಕಹೇತುಮ್ |
ಇಷ್ಟಪ್ರದಾನಸಮಯೇ ಭುವಿ ಕಲ್ಪವೃಕ್ಷಂ
ಸ್ವರ್ಗಂ ವ್ರಜೇತ್ ಸುರವಧೂಜನಸೇವಿತಃ ಸಃ || ೧೮ ||

ಇತಿ ದೇವೀರಹಸ್ಯೇ ಶ್ರೀ ಜ್ವಾಲಾಮುಖಿ ಸ್ತವಮ್ |

---

ಇನ್ನಷ್ಟು ದೇವೀ ಸ್ತೋತ್ರಗಳು ನೋಡಿ.

Did you see any mistake/variation in the content above? Click here to report mistakes and corrections in Stotranidhi content.