Read in తెలుగు / ಕನ್ನಡ / தமிழ் / देवनागरी / English (IAST)
पुनः सङ्कल्पम् –
पूर्वोक्त एवं गुणविशेषण विशिष्टायां शुभतिथौ श्रीमहगणपतिमुद्दिश्य श्रीमहागणपतिप्रीत्यर्थं श्रीमन्मुद्गलपुराणे श्रीगृत्समद प्रोक्त श्लोकविधानेन यावच्छक्ति ध्यानावहनादि षोडशोपचार पूजां करिष्ये ॥
प्राणप्रतिष्ठ –
ओं असु॑नीते॒ पुन॑र॒स्मासु॒ चक्षु॒:
पुन॑: प्रा॒णमि॒ह नो᳚ धेहि॒ भोग᳚म् ।
ज्योक्प॑श्येम॒ सूर्य॑मु॒च्चर᳚न्त॒
मनु॑मते मृ॒डया᳚ नः स्व॒स्ति ॥
अ॒मृतं॒ वै प्रा॒णा अ॒मृत॒माप॑:
प्रा॒णाने॒व य॑थास्था॒नमुप॑ह्वयते ॥
आवाहितो भव स्थापितो भव ।
सुप्रसन्नो भव वरदो भव ।
अस्मिन् बिम्बे सपरिवार समेत श्रीमहागणपति स्वामिनं आवाहयामि स्थापयामि पूजयामि ॥
ध्यानम् –
ओं ग॒णानां᳚ त्वा ग॒णप॑तिग्ं हवामहे
क॒विं क॑वी॒नामु॑प॒मश्र॑वस्तमम् ।
ज्ये॒ष्ठ॒राजं॒ ब्रह्म॑णां ब्रह्मणस्पत॒
आ न॑: शृ॒ण्वन्नू॒तिभि॑: सीद॒ साद॑नम् ॥
चतुर्बाहुं त्रिनेत्रं च गजास्यं रक्तवर्णकम् ।
पाशाङ्कुशादिसम्युक्तं मायायुक्तं प्रचिन्तयेत् ॥
ओं श्रीमहागणपतये नमः ध्यायामि ।
आवाहनम् –
आगच्छ ब्रह्मणां नाथ सुराऽसुरवरार्चित ।
सिद्धिबुद्ध्यादिसम्युक्त भक्तिग्रहणलालस ॥
ओं श्रीमहागणपतये नमः आवहयामि ।
आसनम् –
रत्नसिंहासनं स्वामिन् गृहाण गणनायक ।
तत्रोपविश्य विघ्नेश रक्ष भक्तान्विशेषतः ॥
ओं श्रीमहागणपतये नमः आसनं समर्पयामि ।
पाद्यम् –
सुवासिताभिरद्भिश्च पादप्रक्षालनं प्रभो ।
शीतोष्णाम्भः करोमि ते गृहाण पाद्यमुत्तमम् ॥
ओं श्रीमहागणपतये नमः पाद्यं समर्पयामि ।
अर्घ्यम् –
रत्नप्रवालमुक्ताद्यैरनर्घ्यैः संस्कृतं प्रभो ।
अर्घ्यं गृहाण हेरम्ब द्विरदानन तोषकम् ॥
ओं श्रीमहागणपतये नमः अर्घ्यं समर्पयामि ।
आचमनीयम् –
सर्वतीर्थाहृतं तोयं सुवासितं सुवस्तुभिः ।
आचमनं च तेनैव कुरुष्व गणनायक ॥
ओं श्रीमहागणपतये नमः आचमनीयं समर्पयामि ।
मधुपर्कम् –
दधिमधुघृतैर्युक्तं मधुपर्कं गजानन ।
गृहाण भावसम्युक्तं मया दत्तं नमोऽस्तु ते ॥
ओं श्रीमहागणपतये नमः मधुपर्कं समर्पयामि ।
पञ्चामृत स्नानम् –
नानातीर्थजलैर्ढुण्ढे सुखोष्णभावरूपकैः ।
कमण्डलूद्भवैः स्नानं मया कुरु समर्पितैः ॥
ओं श्रीमहागणपतये नमः पञ्चामृतस्नानं समर्पयामि ।
स्नानम् –
गङ्गादि सर्वतीर्थेभ्यः आहृतैरमलैर्जलैः ।
स्नानं कुरुष्व भगवानुमापुत्र नमोऽस्तुते ॥
ओं श्रीमहागणपतये नमः शुद्धोदक स्नानं समर्पयामि ।
( श्रीगणपत्यथर्वशीर्षोपनिषत् पश्यतु ॥ )
वस्त्रम् –
वस्त्रयुग्मं गृहाण त्वमनर्घं रक्तवर्णकम् ।
लोकलज्जाहरं चैव विघ्ननाथ नमोऽस्तु ते ॥
ओं श्रीमहागणपतये नमः वस्त्रयुग्मं समर्पयामि ।
यज्ञोपवीतम् –
उपवीतं गणाध्यक्ष गृहाण च ततः परम् ।
त्रैगुण्यमयरूपं तु प्रणवग्रन्थिबन्धनम् ॥
ओं श्रीमहागणपतये नमः उपवीतं समर्पयामि ।
आभरणम् –
नानाभूषणकानि त्वमङ्गेषु विविधेषु च ।
भासुरस्वर्णरत्नैश्च निर्मितानि गृहाण भो ॥
ओं श्रीमहागणपतये नमः आभरणानि समर्पयामि ।
गन्धम् –
अष्टगन्धसमायुक्तं गन्धं रक्तं गजानन ।
द्वादशाङ्गेषु ते ढुण्ढे लेपयामि सुचित्रवत् ॥
ओं श्रीमहागणपतये नमः गन्धान् समर्पयामि ।
अक्षतान् –
रक्तचन्दनसम्युक्तानथवा कुङ्कुमैर्युतान् ।
अक्षतान्विघ्नराज त्वं गृहाण फालमण्डले ॥
ओं श्रीमहागणपतये नमः अक्षतान् समर्पयामि ।
पुष्पम् –
चम्पकादिसुवृक्षेभ्यः सम्भूतानि गजानन ।
पुष्पाणि शमीमन्दारदूर्वादीनि गृहाण च ॥
ओं श्रीमहागणपतये नमः नानाविध परिमल पुष्पाणि समर्पयामि ।
षोडशनाम पूजा –
ओं सुमुखाय नमः । ओं एकदन्ताय नमः ।
ओं कपिलायनमः । ओं गजकर्णिकाय नमः ।
ओं लम्बोदरायनमः । ओं विकटाय नमः ।
ओं विघ्नराजाय नमः । ओं गणाधिपायनमः ।
ओं धूमकेतवे नमः । ओं गणाध्यक्षाय नमः ।
ओं फालचन्द्राय नमः । ओं गजाननाय नमः ।
ओं वक्रतुण्डाय नमः । ओं शूर्पकर्णाय नमः ।
ओं हेरम्बाय नमः । ओं स्कन्दपूर्वजाय नमः ।
ओं सर्वसिद्धिप्रदाय नमः ।
अष्टोत्तरशतनामावली –
श्री गणेश अष्टोत्तरशतनामावली पश्यतु ।
धूपम् –
दशाङ्गं गुग्गुलुं धूपं सर्वसौरभकारकम् ।
गृहाण त्वं मया दत्तं विनायक महोदर ॥
ओं श्रीमहागणपतये नमः धूपमाघ्रापयामि ।
दीपम् –
नानाजातिभवं दीपं गृहाण गणनायक ।
अज्ञानमलजं दीपं हरन्तं ज्योतिरूपकम् ॥
ओं श्रीमहागणपतये नमः दीपं दर्शयामि ।
नैवेद्यम् –
चतुर्विधान्नसम्पन्नं मधुरं लड्डुकादिकम् ।
नैवेद्यं ते मया दत्तं भोजनं कुरु विघ्नप ॥
ओं श्रीमहागणपतये नमः नैवेद्यं समर्पयामि ।
ओं भूर्भुव॒स्सुव॑: । तत्स॑वि॒तुर्वरे᳚ण्यं॒ भर्गो॑ दे॒वस्य॑ धीमहि ।
धियो॒ यो न॑: प्रचो॒दया᳚त् ॥
सत्यं त्वा ऋतेन परिषिञ्चामि ।
(सायङ्काले – ऋतं त्वा सत्येन परिषिञ्चामि)
अमृतमस्तु । अ॒मृ॒तो॒प॒स्तर॑णमसि ।
ओं प्रा॒णाय॒ स्वाहा᳚ । ओं अ॒पा॒नाय॒ स्वाहा᳚ ।
ओं व्या॒नाय॒ स्वाहा᳚ । ओं उ॒दा॒नाय॒ स्वाहा᳚ ।
ओं स॒मा॒नाय॒ स्वाहा᳚ ।
मध्ये मध्ये पानीयं समर्पयामि ।
अ॒मृ॒ता॒पि॒धा॒नम॑सि । उत्तरापोशनं समर्पयामि ।
हस्तौ प्रक्षालयामि । पादौ प्रक्षालयामि ।
शुद्धाचमनीयं समर्पयामि ।
ताम्बूलम् –
अष्टाङ्गं देव ताम्बूलं गृहाण मुखवासनम् ।
असकृद्विघ्नराज त्वं मया दत्तं विशेषतः ॥
ओं श्रीमहागणपतये नमः ताम्बूलं समर्पयामि ।
नीराजनम् –
नानादीपसमायुक्तं नीराजनं गजानन ।
गृहाण भावसम्युक्तं सर्वाज्ञानविनाशन ॥
ओं श्रीमहागणपतये नमः नीराजनं समर्पयामि ।
मन्त्रपुष्पम् –
ओं ग॒णानां᳚ त्वा ग॒णप॑तिं हवामहे
क॒विं क॑वी॒नामु॑प॒मश्र॑वस्तमम् ।
ज्ये॒ष्ठ॒राजं॒ ब्रह्म॑णां ब्रह्मणस्पत॒
आ न॑: शृ॒ण्वन्नू॒तिभि॑स्सीद॒ साद॑नम् ॥
चतुर्वेदभवैर्मन्त्रैर्गाणपत्यैर्गजानन ।
मन्त्रितानि गृहाण त्वं पुष्पपत्राणि विघ्नप ॥
ओं श्रीमहागणपतये नमः मन्त्रपुष्पं समर्पयामि ।
प्रदक्षिणम् –
एकविंशतिसङ्ख्यं वा त्रिसङ्ख्यं वा गजानन ।
प्रादक्षिण्यं गृहाण त्वं ब्रह्मन् ब्रह्मेशभावन ॥
ओं श्रीमहागणपतये नमः प्रदक्षिण नमस्कारान् समर्पयामि ।
साष्टाङ्गनमस्कारः –
साष्टाङ्गां प्रणतिं नाथ एकविंशतिसम्मिताम् ।
हेरम्ब सर्वपूज्य त्वं गृहाण तु मया कृतम् ॥
ओं श्रीमहागणपतये नमः साष्टाङ्ग नमस्कारान् समर्पयामि ।
नमस्कारम् –
विघ्नेश्वराय वरदाय गणेश्वराय ।
सर्वेश्वराय शुभदाय सुरेश्वराय ॥
विद्याधराय विकटाय च वामनाय ।
भक्तिप्रसन्न वरदाय नमो नमोऽस्तु ॥
क्षमाप्रार्थन –
अपराधानसङ्ख्यातान् क्षमस्व गणनायक ।
भक्तं कुरु च मां ढुण्ढे तव पादप्रियं सदा ॥
समर्पणम् –
जाग्रत्स्वप्नसुषुप्तिभिर्देहवाङ्मनसैः कृतम् ।
सांसर्गिकेण यत्कर्म गणेशाय समर्पये ॥
अनया ध्यान आवाहनादि षोडशोपचार पूजया भगवान् सर्वात्मिकः श्री महागणाधिपति
सुप्रीतो सुप्रसन्नो वरदो भवन्तु ॥
तीर्थस्वीकरण –
बाह्यं नानाविधं पापं महोग्रं तल्लयं व्रजेत् ।
गणेशपादतीर्थस्य मस्तके धारणात्किल ॥
श्री महागणाधिपति पादोदक तीर्थं गृह्णामि ।
प्रसादस्वीकरण –
ततोच्छिष्टं तु नैवेद्यं गणेशस्य भुनज्म्यहम् ।
भुक्तिमुक्तिप्रदं पूर्णं नानापापनिकृन्तनम् ॥
श्री महागणाधिपति प्रसादं शिरसा गृह्णामि ।
ओं शान्तिः शान्तिः शान्तिः ॥
इतर श्री गणेश स्तोत्राणि पश्यतु ।
గమనిక: రాబోయే ధనుర్మాసం సందర్భంగా "శ్రీ కృష్ణ స్తోత్రనిధి" ముద్రించుటకు ఆలోచన చేయుచున్నాము. ఇటీవల మేము "శ్రీ సాయి స్తోత్రనిధి" పుస్తకము విడుదల చేశాము.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
