Read in తెలుగు / ಕನ್ನಡ / தமிழ் / देवनागरी / English (IAST)
|| ద్వితీయమంత్రాధివేశః ||
స బభూవ కృశో రాజా మైథిలీకామమోహితః |
అసమ్మానాచ్చ సుహృదాం పాపః పాపేన కర్మణా || ౧ ||
[* అతీవ కామసంపన్నో వైదేహీమనుచింతయన్ | *]
అతీతసమయే కాలే తస్మిన్ వై యుధి రావణః |
అమాత్యైశ్చ సుహృద్భిశ్చ ప్రాప్తకాలమమన్యత || ౨ || [మంత్ర]
స హేమజాలవితతం మణివిద్రుమభూషితమ్ |
ఉపగమ్య వినీతాశ్వమారురోహ మహారథమ్ || ౩ ||
తమాస్థాయ రథశ్రేష్ఠం మహామేఘసమస్వనమ్ |
ప్రయయౌ రక్షసశ్రేష్ఠో దశగ్రీవః సభాం ప్రతి || ౪ ||
అసిచర్మధరా యోధాః సర్వాయుధధరాస్తథా |
రాక్షసా రాక్షసేంద్రస్య పురతః సంప్రతస్థిరే || ౫ ||
నానావికృతవేషాశ్చ నానాభూషణభూషితాః |
పార్శ్వతః పృష్ఠతశ్చైనం పరివార్య యయుస్తతః || ౬ ||
రథైశ్చాతిరథాః శీఘ్రం మత్తైశ్చ వరవారణైః |
అనూత్పేతుర్దశగ్రీవమాక్రీడద్భిశ్చ వాజిభిః || ౭ ||
గదాపరిఘహస్తాశ్చ శక్తితోమరపాణయః |
పరశ్వధధరాశ్చాన్యే తథాఽన్యే శూలపాణయః || ౮ ||
తతస్తూర్యసహస్రాణాం సంజజ్ఞే నిస్వనో మహాన్ |
తుములః శంఖశబ్దశ్చ సభాం గచ్ఛతి రావణే || ౯ ||
స నేమిఘోషేణ మహాన్ సహసాఽభివినాదయన్ |
రాజమార్గం శ్రియా జుష్టం ప్రతిపేదే మహారథః || ౧౦ ||
విమలం చాతపత్రాణాం ప్రగృహీతమశోభత |
పాండరం రాక్షసేంద్రస్య పూర్ణస్తారాధిపో యథా || ౧౧ ||
హేమమంజరిగర్భే చ శుద్ధస్ఫటికవిగ్రహే |
చామరవ్యజనే చాస్య రేజతుః సవ్యదక్షిణే || ౧౨ ||
తే కృతాంజలయః సర్వే రథస్థం పృథివీస్థితాః |
రాక్షసా రాక్షసశ్రేష్ఠం శిరోభిస్తం వవందిరే || ౧౩ ||
రాక్షసైః స్తూయమానః సన్ జయాశీర్భిరరిందమః |
ఆససాద మహాతేజాః సభాం సువిహితాం శుభామ్ || ౧౪ ||
సువర్ణరజతస్థూణాం విశుద్ధస్ఫటికాంతరామ్ |
విరాజమానో వపుషా రుక్మపట్టోత్తరచ్ఛదామ్ || ౧౫ ||
తాం పిశాచశతైః షడ్భిరభిగుప్తాం సదా శుభామ్ |
ప్రవివేశ మహాతేజాః సుకృతాం విశ్వకర్మణా || ౧౬ ||
తస్యాం తు వైడూర్యమయం ప్రియకాజినసంవృతమ్ |
మహత్సోపాశ్రయం భేజే రావణః పరమాసనమ్ || ౧౭ ||
తతః శశాసేశ్వరవద్దూతాఁల్లఘుపరాక్రమాన్ |
సమానయత మే క్షిప్రమిహైతాన్రాక్షసానితి || ౧౮ ||
కృత్యమస్తి మహజ్జాతం సమర్థ్యమిహ నో మహత్ |
రాక్షసాస్తద్వచః శ్రుత్వా లంకాయాం పరిచక్రముః || ౧౯ ||
అనుగేహమవస్థాయ విహారశయనేషు చ |
ఉద్యానేషు చ రక్షాంసి చోదయంతో హ్యభీతవత్ || ౨౦ ||
తే రథాన్ రుచిరానేకే దృప్తానేకే పృథగ్ఘయాన్ |
నాగానన్యేఽధిరురుహుర్జగ్ముశ్చైకే పదాతయః || ౨౧ ||
సా పురీ పరమాకీర్ణా రథకుంజరవాజిభిః |
సంపతద్భిర్విరురుచే గరుత్మద్భిరివాంబరమ్ || ౨౨ ||
తే వాహనాన్యవస్థాప్య యానాని వివిధాని చ |
సభాం పద్భిః ప్రవివిశుః సింహా గిరిగుహామివ || ౨౩ ||
రాజ్ఞః పాదౌ గృహీత్వా తు రాజ్ఞా తే ప్రతిపూజితాః |
పీఠేష్వన్యే బృసీష్వన్యే భూమౌ కేచిదుపావిశన్ || ౨౪ ||
తే సమేత్య సభాయాం వై రాక్షసా రాజశాసనాత్ |
యథార్హముపతస్థుస్తే రావణం రాక్షసాధిపమ్ || ౨౫ ||
మంత్రిణశ్చ యథా ముఖ్యా నిశ్చితార్థేషు పండితాః |
అమాత్యాశ్చ గుణోపేతాః సర్వజ్ఞా బుద్ధిదర్శనాః || ౨౬ ||
సమేయుస్తత్ర శతశః శూరాశ్చ బహవస్తదా |
సభాయాం హేమవర్ణాయాం సర్వార్థస్య సుఖాయ వై || ౨౭ ||
రమ్యాయాం రాక్షసేంద్రస్య సమేయుస్తత్ర సంఘశః |
రాక్షసా రాక్షసశ్రేష్ఠం పరివార్యోపతస్థిరే || ౨౮ ||
తతో మహాత్మా విపులం సుయుగ్యం
వరం రథం హేమవిచిత్రితాంగమ్ |
శుభం సమాస్థాయ యయౌ యశస్వీ
విభీషణః సంసదమగ్రజస్య || ౨౯ ||
స పూర్వజాయావరజః శశంస
నామాథ పశ్చాచ్చరణౌ వవందే |
శుకః ప్రహస్తశ్చ తథైవ తేభ్యో
దదౌ యథార్హం పృథగాసనాని || ౩౦ ||
సువర్ణనానామణిభుషణానాం
సువాససాం సంసది రాక్షసానామ్ |
తేషాం పరార్ధ్యాగరుచందనానాం
స్రజశ్చ గంధాః ప్రవవుః సమంతాత్ || ౩౧ || [శ్చ]
న చుక్రుశుర్నానృతమాహ కశ్చి-
-త్సభాసదో నాపి జజల్పురుచ్చైః |
సంసిద్ధార్థాః సర్వ ఏవోగ్రవీర్యా
భర్తుః సర్వే దదృశుశ్చాననం తే || ౩౨ ||
స రావణః శస్త్రభృతాం మనస్వినాం
మహాబలానాం సమితౌ మనస్వీ |
తస్యాం సభాయాం ప్రభయా చకాశే
మధ్యే వసూనామివ వజ్రహస్తః || ౩౩ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ఏకాదశః సర్గః || ౧౧ ||
యుద్ధకాండ ద్వాదశః సర్గః (౧౨) >>
సంపూర్ణ శ్రీవాల్మీకి రామాయణ యుద్ధకాండ చూడండి
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
