Read in తెలుగు / ಕನ್ನಡ / தமிழ் / देवनागरी / English (IAST)
|| రావణభిక్షుసత్కారః ||
తథా పరుషముక్తస్తు కుపితో రాఘవానుజః |
స వికాంక్షన్భృశం రామం ప్రతస్థే న చిరాదివ || ౧ ||
తదాసాద్య దశగ్రీవః క్షిప్రమంతరమాస్థితః |
అభిచక్రామ వైదేహీం పరివ్రాజకరూపధృత్ || ౨ ||
శ్లక్ష్ణకాషాయసంవీతః శిఖీ ఛత్రీ ఉపానహీ |
వామే చాంసేఽవసజ్యాథ శుభే యష్టికమండలూ || ౩ ||
పరివ్రాజకరూపేణ వైదేహీం సముపాగమత్ |
తామాససాదాతిబలో భ్రాతృభ్యాం రహితాం వనే || ౪ ||
రహితాం చంద్రసూర్యాభ్యాం సంధ్యామివ మహత్తమః |
తామపశ్యత్తతో బాలాం రామపత్నీం యశస్వినీమ్ || ౫ ||
రోహిణీం శశినా హీనాం గ్రహవద్భృశదారుణః |
తముగ్రతేజః కర్మాణం జనస్థానరుహా ద్రుమాః || ౬ ||
సమీక్ష్య న ప్రకంపంతే న ప్రవాతి చ మారుతః |
శీఘ్రస్రోతాశ్చ తం దృష్ట్వా వీక్షంతం రక్తలోచనమ్ || ౭ ||
స్తిమితం గంతుమారేభే భయాద్గోదావరీ నదీ |
రామస్య త్వంతరప్రేప్సుర్దశగ్రీవస్తదంతరే || ౮ ||
ఉపతస్థే చ వైదేహీం భిక్షురూపేణ రావణః |
అభవ్యో భవ్యరూపేణ భర్తారమనుశోచతీమ్ || ౯ ||
అభ్యవర్తత వైదేహీం చిత్రామివ శనైశ్చరః |
స పాపో భవ్యరూపేణ తృణైః కూప ఇవావృతః || ౧౦ ||
అతిష్ఠత్ప్రేక్ష్య వైదేహీం రామపత్నీం యశస్వినీమ్ |
[* తిష్ఠన్ సంప్రేక్ష్య చ తదా పత్నీం రామస్య రావణ | *]
శుభాం రుచిరదంతోష్ఠీం పూర్ణచంద్రనిభాననామ్ || ౧౧ ||
ఆసీనాం పర్ణశాలాయాం బాష్పశోకాభిపీడితామ్ |
స తాం పద్మపలాశాక్షీం పీతకౌశేయవాసినీమ్ || ౧౨ ||
అభ్యగచ్ఛత వైదేహీం దుష్టచేతా నిశాచరః |
స మన్మథశరావిష్టో బ్రహ్మఘోషముదీరయన్ || ౧౩ ||
అబ్రవీత్ప్రశ్రితం వాక్యం రహితే రాక్షసాధిపః |
తాముత్తమాం స్త్రియం లోకే పద్మహీనామివ శ్రియమ్ || ౧౪ ||
విభ్రాజమానాం వపుషా రావణః ప్రశశంస హ |
కా త్వం కాంచనవర్ణాభే పీతకౌశేయవాసిని || ౧౫ ||
కమలానాం శుభాం మాలాం పద్మినీవ హి బిభ్రతీ |
హ్రీః కీర్తిః శ్రీః శుభా లక్ష్మీరప్సరా వా శుభాననే || ౧౬ ||
భూతిర్వా త్వం వరారోహే రతిర్వా స్వైరచారిణీ |
సమాః శిఖరిణః స్నిగ్ధాః పాండురా దశనాస్తవ || ౧౭ ||
విశాలే విమలే నేత్రే రక్తాంతే కృష్ణతారకే |
విశాలం జఘనం పీనమూరూ కరికరోపమౌ || ౧౮ ||
ఏతావుపచితౌ వృత్తౌ సంహతౌ సంప్రవల్గితౌ |
పీనోన్నతముఖౌ కాంతౌ స్నిగ్ధౌ తాలఫలోపమౌ || ౧౯ ||
మణిప్రవేకాభరణౌ రుచిరౌ తే పయోధరౌ |
చారుస్మితే చారుదతి చారునేత్రే విలాసిని || ౨౦ ||
మనో హరసి మే కాంతే నదీకూలమివాంభసా |
కరాంతమితమధ్యాసి సుకేశీ సంహతస్తనీ || ౨౧ ||
నైవ దేవీ న గంధర్వీ న యక్షీ న చ కిన్నరీ |
నైవంరూపా మయా నారీ దృష్టపూర్వా మహీతలే || ౨౨ ||
రూపమగ్ర్యం చ లోకేషు సౌకుమార్యం వయశ్చ తే |
ఇహ వాసశ్చ కాంతారే చిత్తమున్మాదయంతి మే || ౨౩ ||
సా ప్రతిక్రామ భద్రం తే న త్వం వస్తుమిహార్హసి |
రాక్షసానామయం వాసో ఘోరాణాం కామరూపిణామ్ || ౨౪ ||
ప్రాసాదాగ్రాణి రమ్యాణి నగరోపవనాని చ |
సంపన్నాని సుగంధీని యుక్తాన్యాచరితుం త్వయా || ౨౫ ||
వరం మాల్యం వరం భోజ్యం వరం వస్త్రం చ శోభనే |
భర్తారం చ వరం మన్యే త్వద్యుక్తమసితేక్షణే || ౨౬ ||
కా త్వం భవసి రుద్రాణాం మరుతాం వా వరాననే |
వసూనాం వా వరారోహే దేవతా ప్రతిభాసి మే || ౨౭ ||
నేహ గచ్ఛంతి గంధర్వా న దేవా న చ కిన్నరాః |
రాక్షసానామయం వాసః కథం ను త్వమిహాగతా || ౨౮ ||
ఇహ శాఖామృగాః సింహా ద్వీపివ్యాఘ్రమృగాస్తథా |
ఋక్షాస్తరక్షవః కంకాః కథం తేభ్యో న బిభ్యసి || ౨౯ ||
మదాన్వితానాం ఘోరాణాం కుంజరాణాం తరస్వినామ్ |
కథమేకా మహారణ్యే న బిభేషి వరాననే || ౩౦ ||
కాసి కస్య కుతశ్చిత్త్వం కిం నిమిత్తం చ దండకాన్ |
ఏకా చరసి కల్యాణి ఘోరాన్రాక్షససేవితాన్ || ౩౧ ||
ఇతి ప్రశస్తా వైదేహీ రావణేన దురాత్మనా |
ద్విజాతివేషేణ హితం దృష్ట్వా రావణమాగతమ్ || ౩౨ ||
సర్వైరతిథిసత్కారైః పూజయామాస మైథిలీ |
ఉపానీయాసనం పూర్వం పాద్యేనాభినిమంత్ర్య చ |
అబ్రవీత్సిద్ధమిత్యేవ తదా తం సౌమ్యదర్శనమ్ || ౩౩ ||
ద్విజాతివేషేణ సమీక్ష్య మైథిలీ
సమాగతం పాత్రకుసుంభధారిణమ్ |
అశక్యముద్ద్వేష్టుముపాయదర్శనం
న్యమంత్రయద్బ్రాహ్మణవత్తదాఽంగనా || ౩౪ ||
ఇయం బృసీ బ్రాహ్మణ కామమాస్యతాం
ఇదం చ పాద్యం ప్రతిగృహ్యతామితి |
ఇదం చ సిద్ధం వనజాతముత్తమం
త్వదర్థమవ్యగ్రమిహోపభుజ్యతామ్ || ౩౫ ||
నిమంత్ర్యమాణః ప్రతిపూర్ణభాషిణీం
నరేంద్రపత్నీం ప్రసమీక్ష్య మైథిలీమ్ |
ప్రసహ్య తస్యా హరణే ధృతం మనః
సమర్పయస్త్వాత్మవధాయ రావణః || ౩౬ ||
తతః సువేషం మృగయాగతం పతిం
ప్రతీక్షమాణా సహలక్ష్మణం తదా |
వివీక్షమాణా హరితం దదర్శ త-
-న్మహద్వనం నైవ తు రామలక్ష్మణౌ || ౩౭ ||
ఇత్యార్షే శ్రీమద్రామయణే వాల్మీకీయే ఆదికావ్యే అరణ్యకాండే షట్చత్వారింశః సర్గః || ౪౬ ||
అరణ్యకాండ సప్తచత్వారింశః సర్గః (౪౭) >>
సంపూర్ణ వాల్మీకి రామాయణే అరణ్యకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
