Read in తెలుగు / ಕನ್ನಡ / தமிழ் / देवनागरी / English (IAST)
|| మారీచవంచనా ||
తథా తు తం సమాదిశ్య భ్రాతరం రఘునందనః |
బబంధాసిం మహాతేజా జాంబూనదమయత్సరుమ్ || ౧ ||
తతస్త్ర్యవనతం చాపమాదాయాత్మవిభూషణమ్ |
ఆబధ్య చ కలాపౌ ద్వౌ జగామోదగ్రవిక్రమః || ౨ ||
తం వంచయానో రాజేంద్రమాపతంతం నిరీక్ష్య వై |
బభూవాంతర్హితస్త్రాసాత్ పునః సందర్శనేఽభవత్ || ౩ ||
బద్ధాసిర్ధనురాదాయ ప్రదుద్రావ యతో మృగః |
తం స్మ పశ్యతి రూపేణ ద్యోతమానమివాగ్రతః || ౪ ||
అవేక్ష్యావేక్ష్య ధావంతం ధనుష్పాణిం మహావనే |
అతివృత్తమిషోః పాతాల్లోభయానం కదాచన || ౫ ||
శంకితం తు సముద్భ్రాంతముత్పతంతమివాంబరే |
దృశ్యమానమదృశ్యం చ వనోద్దేశేషు కేషుచిత్ || ౬ ||
చిన్నాభ్రైరివ సంవీతం శారదం చంద్రమండలమ్ |
ముహూర్తాదేవ దదృశే ముహుర్దూరాత్ప్రకాశతే || ౭ ||
దర్శనాదర్శనాదేవం సోఽపాకర్షత రాఘవమ్ |
సుదూరమాశ్రమస్యాస్య మారిచో మృగతాం గతః || ౮ ||
ఆసీత్ క్రుద్ధస్తు కాకుత్స్థో వివశస్తేన మోహితః |
అథావతస్థే సంభ్రాంతశ్ఛాయామాశ్రిత్య శాద్వలే || ౯ ||
స తమున్మాదయామాస మృగరూపో నిశాచరః |
మృగైః పరివృతో వన్యైరదూరాత్ ప్రత్యదృశ్యత || ౧౦ ||
గ్రహీతుకామం దృష్ట్వైనం పునరేవాభ్యధావత |
తత్క్షణాదేవ సంత్రాసాత్ పునరంతర్హితోఽభవత్ || ౧౧ ||
పునరేవ తతో దూరాద్వృక్షషండాద్వినిఃసృతమ్ |
దృష్ట్వా రామో మహాతేజాస్తం హంతుం కృతనిశ్చయః || ౧౨ ||
భూయస్తు శరముద్ధృత్య కుపితస్తత్ర రాఘవః |
సూర్యరశ్మిప్రతీకాశం జ్వలంతమరిమర్దనః || ౧౩ ||
సంధాయ సుదృఢే చాపే వికృష్య బలవద్బలీ |
తమేవ మృగముద్దిశ్య శ్వసంతమివ పన్నగమ్ || ౧౪ ||
ముమోచ జ్వలితం దీప్తమస్త్రం బ్రహ్మవినిర్మితమ్ |
శరీరం మృగరూపస్య వినిర్భిద్య శరోత్తమః || ౧౫ ||
మారీచస్యైవ హృదయం విభేదాశనిసన్నిభః |
తాలమాత్రమథోత్ప్లుత్య న్యపతత్స శరాతురః || ౧౬ ||
వినదన్భైరవం నాదం ధరణ్యామల్పజీవితః |
మ్రియమాణస్తు మారీచో జహౌ తాం కృత్రిమాం తనుమ్ || ౧౭ ||
స్మృత్వా తద్వచనం రక్షో దధ్యౌ కేన తు లక్ష్మణమ్ |
ఇహ ప్రస్థాపయేత్ సీతా శూన్యే తాం రావణో హరేత్ || ౧౮ ||
స ప్రాప్తకాలమాజ్ఞాయ చకార చ తతః స్వరమ్ |
సదృశం రాఘవస్యైవ హా సీతే లక్ష్మణేతి చ || ౧౯ ||
తేన మర్మణి నిర్విద్ధః శరేణానుపమేన చ |
మృగరూపం తు తత్త్యక్త్వా రాక్షసం రూపమాత్మనః || ౨౦ ||
చక్రే స సుమహాకాయో మారీచో జీవితం త్యజన్ |
తతో విచిత్రకేయూరః సర్వాభరణభూషితః || ౨౧ ||
హేమమాలీ మహాదంష్ట్రో రాక్షసోఽభూచ్ఛరాహతః |
తం దృష్ట్వా పతితం భూమౌ రాక్షసం ఘోరదర్శనమ్ || ౨౨ ||
రామో రుధిరసిక్తాంగం వేష్టమానం మహీతలే |
జగామ మనసా సీతాం లక్ష్మణస్య వచః స్మరన్ || ౨౩ ||
మారీచస్యైవ మాయైషా పూర్వోక్తం లక్ష్మణేన తు |
తత్తథా హ్యభవచ్చాద్య మారీచోఽయం మయా హతః || ౨౪ ||
హా సీతే లక్ష్మణేత్యేవమాక్రుశ్య చ మహాస్వనమ్ |
మమార రాక్షసః సోఽయం శ్రుత్వా సీతా కథం భవేత్ || ౨౫ ||
లక్ష్మణశ్చ మహాబాహుః కామవస్థాం గమిష్యతి |
ఇతి సంచింత్య ధర్మాత్మా రామో హృష్టతనూరుహః || ౨౬ ||
తత్ర రామం భయం తీవ్రమావివేశ విషాదజమ్ |
రాక్షసం మృగరూపం తం హత్వా శ్రుత్వా చ తత్స్వరమ్ || ౨౭ ||
నిహత్య పృషతం చాన్యం మాంసమాదాయ రాఘవః |
త్వరమాణో జనస్థానం ససారాభిముఖస్తదా || ౨౮ ||
ఇత్యార్షే శ్రీమద్రామాయణే వాల్మీకీయే ఆదికావ్యే అరణ్యకాండే చతుశ్చత్వారింశః సర్గః || ౪౪ ||
అరణ్యకాండ పంచచత్వారింశః సర్గః (౪౫) >>
సంపూర్ణ వాల్మీకి రామాయణే అరణ్యకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.