Sri Kamalajadayita Ashtakam – శ్రీ కమలజదయితాష్టకమ్


శృంగక్ష్మాభృన్నివాసే శుకముఖమునిభిః సేవ్యమానాంఘ్రిపద్మే
స్వాంగచ్ఛాయావిధూతామృతకరసురరాడ్వాహనే వాక్సవిత్రి |
శంభుశ్రీనాథముఖ్యామరవరనికరైర్మోదతః పూజ్యమానే
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౧ ||

కల్యాదౌ పార్వతీశః ప్రవరసురగణప్రార్థితః శ్రౌతవర్త్మ
ప్రాబల్యం నేతుకామో యతివరవపుషాగత్య యాం శృంగశైలే |
సంస్థాప్యార్చాం ప్రచక్రే బహువిధనుతిభిః సా త్వమింద్వర్ధచూడా
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౨ ||

పాపౌఘం ధ్వంసయిత్వా బహుజనిరచితం కిం చ పుణ్యాలిమారా-
-త్సంపాద్యాస్తిక్యబుద్ధిం శ్రుతిగురువచనేష్వాదరం భక్తిదార్ఢ్యమ్ |
దేవాచార్యద్విజాదిష్వపి మనునివహే తావకీనే నితాంతం
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౩ ||

విద్యాముద్రాక్షమాలామృతఘటవిలసత్పాణిపాథోజజాలే
విద్యాదానప్రవీణే జడబధిరముఖేభ్యోఽపి శీఘ్రం నతేభ్యః |
కామాదీనాంతరాన్మత్సహజరిపువరాన్దేవి నిర్మూల్య వేగాత్
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౪ ||

కర్మస్వాత్మోచితేషు స్థిరతరధిషణాం దేహదార్ఢ్యం తదర్థం
దీర్ఘం చాయుర్యశశ్చ త్రిభువనవిదితం పాపమార్గాద్విరక్తిమ్ |
సత్సంగం సత్కథాయాః శ్రవణమపి సదా దేవి దత్వా కృపాబ్ధే
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౫ ||

మాతస్త్వత్పాదపద్మం న వివిధకుసుమైః పూజితం జాతు భక్త్యా
గాతుం నైవాహమీశే జడమతిరలసస్త్వద్గుణాన్దివ్యపద్యైః |
మూకే సేవావిహీనేఽప్యనుపమకరుణామర్భకేఽంబేవ కృత్వా
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౬ ||

శాంత్యాద్యాః సంపదో వితర శుభకరీర్నిత్యతద్భిన్నబోధం
వైరాగ్యం మోక్షవాంఛామపి లఘు కలయ శ్రీశివాసేవ్యమానే |
విద్యాతీర్థాదియోగిప్రవరకరసరోజాతసంపూజితాంఘ్రే
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౭ ||

సచ్చిద్రూపాత్మనో మే శ్రుతిమనననిదిధ్యాసనాన్యాశు మాతః
సంపాద్య స్వాంతమేతద్రుచియుతమనిశం నిర్వికల్పే సమాధౌ |
తుంగాతీరాంకరాజద్వరగృహవిలసచ్చక్రరాజాసనస్థే
విద్యాం శుద్ధాం చ బుద్ధిం కమలజదయితే సత్వరం దేహి మహ్యమ్ || ౮ ||

ఇతి శృంగేరి శ్రీజగద్గురు శ్రీసచ్చిదానందశివాభినవనృసింహభారతీస్వామి విరచితం శ్రీకమలజదయితాష్టకం సంపూర్ణమ్ |


మరిన్ని శ్రీ సరస్వతీ స్తోత్రాలు చూడండి.


పైరసీ ప్రకటన : నాగేంద్రాస్ న్యూ గొల్లపూడి వీరాస్వామి సన్ మరియు శ్రీఆదిపూడి వెంకటశివసాయిరామ్ గారు కలిసి మా రెండు పుస్తకాలను ("శ్రీ వారాహీ స్తోత్రనిధి" మరియు "శ్రీ శ్యామలా స్తోత్రనిధి") ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.

Did you see any mistake/variation in the content above? Click here to report mistakes and corrections in Stotranidhi content.

Facebook Comments

స్పందించండి

error: Not allowed