Read in తెలుగు / ಕನ್ನಡ / தமிழ் / देवनागरी / English (IAST)
ఆద్యం రంగమితి ప్రోక్తం విమానం రంగసంజ్ఞితమ్ |
శ్రీముష్ణం వేంకటాద్రిం చ సాలగ్రామం చ నైమిశమ్ ||
తోయాద్రిం పుష్కరం చైవ నరనారాయణాశ్రమమ్ |
అష్టౌ మే మూర్తయః సంతి స్వయంవ్యక్తా మహీతలే ||
శ్రీసూత ఉవాచ |
శ్రీరుద్రముఖనిర్ణీతమురారిగుణసత్కథా |
సంతుష్టా పార్వతీ ప్రాహ శంకరం లోకశంకరమ్ || ౧ ||
శ్రీపార్వత్యువాచ |
శ్రీముష్ణేశస్య మాహాత్మ్యం వరాహస్య మహాత్మనః |
శ్రుత్వా తృప్తిర్న మే జాతా మనః కౌతూహలాయతే |
శ్రోతుం తద్దేవమాహాత్మ్యం తస్మాద్వర్ణయ మే పునః || ౨ ||
శ్రీశంకర ఉవాచ |
శృణు దేవి ప్రవక్ష్యామి శ్రీముష్ణేశస్య వైభవమ్ |
యస్య శ్రవణమాత్రేణ మహాపాపైః ప్రముచ్యతే |
సర్వేషామేవ తీర్థానాం తీర్థరాజోఽభిధీయతే || ౩ ||
నిత్యపుష్కరిణీ నామ్నీ శ్రీముష్ణే యా చ వర్తతే |
జాతా శ్రమాపహా పుణ్యా వరాహశ్రమవారిణా || ౪ ||
విష్ణోరంగుష్ఠసంస్పర్శాత్ పుణ్యదా ఖలు జాహ్నవీ |
విష్ణోః సర్వాంగసంభూతా నిత్యపుష్కరిణీ శుభా || ౫ ||
మహానదీ సహస్రేణ నిత్యదా సంగతా శుభా |
సకృత్ స్నాత్వా విముక్తాఘః సద్యో యాతి హరేః పదమ్ || ౬ ||
తస్యా ఆగ్నేయభాగే తు అశ్వత్థచ్ఛాయయోదకే |
స్నానం కృత్వా పిప్పలస్య కృత్వా చాపి ప్రదక్షిణమ్ || ౭ ||
దృష్ట్వా శ్వేతవరాహం చ మాసమేకం నయేద్యది |
కాలమృత్యుం వినిర్జిత్య శ్రియా పరమయా యుతః || ౮ ||
ఆధివ్యాధివినిర్ముక్తో గ్రహపీడావివర్జితః |
భుక్త్వా భోగాననేకాంశ్చ మోక్షమంతే వ్రజేత్ ధ్రువమ్ || ౯ ||
అశ్వత్థమూలేఽర్కవారే నిత్యపుష్కరిణీతటే |
వరాహకవచం జప్త్వా శతవారం జితేంద్రియః || ౧౦ ||
క్షయాపస్మారకుష్ఠాద్యైః మహారోగైః ప్రముచ్యతే |
వరాహకవచం యస్తు ప్రత్యహం పఠతే యది || ౧౧ ||
శత్రుపీడావినిర్ముక్తో భూపతిత్వమవాప్నుయాత్ |
లిఖిత్వా ధారయేద్యస్తు బాహుమూలే గలేఽథ వా || ౧౨ ||
భూతప్రేతపిశాచాద్యాః యక్షగంధర్వరాక్షసాః |
శత్రవో ఘోరకర్మాణో యే చాన్యే విషజంతవః |
నష్టదర్పా వినశ్యంతి విద్రవంతి దిశో దశ || ౧౩ ||
శ్రీపార్వత్యువాచ |
తద్బ్రూహి కవచం మహ్యం యేన గుప్తో జగత్త్రయే |
సంచరేద్దేవవన్మర్త్యః సర్వశత్రువిభీషణః |
యేనాప్నోతి చ సామ్రాజ్యం తన్మే బ్రూహి సదాశివ || ౧౪ ||
శ్రీశంకర ఉవాచ |
శృణు కల్యాణి వక్ష్యామి వారాహకవచం శుభమ్ |
యేన గుప్తో లభేన్మర్త్యో విజయం సర్వసంపదమ్ || ౧౫ ||
అంగరక్షాకరం పుణ్యం మహాపాతకనాశనమ్ |
సర్వరోగప్రశమనం సర్వదుర్గ్రహనాశనమ్ || ౧౬ ||
విషాభిచారకృత్యాదిశత్రుపీడానివారణమ్ |
నోక్తం కస్యాపి పూర్వం హి గోప్యాద్గోప్యతరం యతః || ౧౭ ||
వరాహేణ పురా ప్రోక్తం మహ్యం చ పరమేష్ఠినే |
యుద్ధేషు జయదం దేవి శత్రుపీడానివారణమ్ || ౧౮ ||
వరాహకవచాద్గుప్తో నాఽశుభం లభతే నరః |
వరాహకవచస్యాస్య ఋషిర్బ్రహ్మా ప్రకీర్తితః || ౧౯ ||
ఛందోఽనుష్టుప్ తథా దేవో వరాహో భూపరిగ్రహః |
ప్రక్షాల్య పాదౌ పాణీ చ సమ్యగాచమ్య వారిణా || ౨౦ ||
కృతస్వాంగకరన్యాసః సపవిత్ర ఉదఙ్ముఖః |
ఓం భూర్భవః సువరితి నమో భూపతయేఽపి చ || ౨౧ ||
నమో భగవతే పశ్చాత్ వరాహాయ నమస్తథా |
ఏవం షడంగం న్యాసం చ న్యసేదంగులిషు క్రమాత్ || ౨౨ ||
నమః శ్వేతవరాహాయ మహాకోలాయ భూపతే |
యజ్ఞాంగాయ శుభాంగాయ సర్వజ్ఞాయ పరాత్మనే || ౨౩ ||
స్రవతుండాయ ధీరాయ పరబ్రహ్మస్వరూపిణే |
వక్రదంష్ట్రాయ నిత్యాయ నమోఽంతైర్నామభిః క్రమాత్ || ౨౪ ||
అంగుళీషు న్యసేద్విద్వాన్ కరపృష్ఠతలేష్వపి |
ధ్యాత్వా శ్వేతవరాహం చ పశ్చాన్మంత్రముదీరయేత్ || ౨౫ ||
ధ్యానమ్ –
ఓం | శ్వేతం వరాహవపుషం క్షితిముద్ధరంతం
శంఘారిసర్వవరదాఽభయయుక్తబాహుమ్ |
ధ్యాయేన్నిజైశ్చ తనుభిః సకలైరుపేతం
పూర్ణం విభుం సకలవాంఛితసిద్ధయేఽజమ్ || ౨౬ ||
కవచమ్ –
వరాహః పూర్వతః పాతు దక్షిణే దండకాంతకః |
హిరణ్యాక్షహరః పాతు పశ్చిమే గదయా యుతః || ౨౭ ||
ఉత్తరే భూమిహృత్ పాతు అధస్తాద్వాయువాహనః |
ఊర్ధ్వం పాతు హృషీకేశో దిగ్విదిక్షు గదాధరః || ౨౮ ||
ప్రాతః పాతు ప్రజానాథః కల్పకృత్ సంగమేఽవతు |
మధ్యాహ్నే వజ్రకేశస్తు సాయాహ్నే సర్వపూజితః || ౨౯ ||
ప్రదోషే పాతు పద్మాక్షో రాత్రౌ రాజీవలోచనః |
నిశీంద్రగర్వహా పాతు పాతూషః పరమేశ్వరః || ౩౦ ||
అటవ్యామగ్రజః పాతు గమనే గరుడాసనః |
స్థలే పాతు మహాతేజాః జలే పాత్వవనీపతిః || ౩౧ ||
గృహే పాతు గృహాధ్యక్షః పద్మనాభః పురోఽవతు |
ఝిల్లికావరదః పాతు స్వగ్రామే కరుణాకరః || ౩౨ ||
రణాగ్రే దైత్యహా పాతు విషమే పాతు చక్రభృత్ |
రోగేషు వైద్యరాజస్తు కోలో వ్యాధిషు రక్షతు || ౩౩ ||
తాపత్రయాత్ తపోమూర్తిః కర్మపాశాచ్చ విశ్వకృత్ |
క్లేశకాలేషు సర్వేషు పాతు పద్మాపతిర్విభుః || ౩౪ ||
హిరణ్యగర్భసంస్తుత్యః పాదౌ పాతు నిరంతరమ్ |
గుల్ఫౌ గుణాకరః పాతు జంఘే పాతు జనార్దనః || ౩౫ ||
జానూ చ జయకృత్ పాతు పాతూరూ పురుషోత్తమః |
రక్తాక్షో జఘనే పాతు కటిం విశ్వంభరోఽవతు || ౩౬ ||
పార్శ్వే పాతు సురాధ్యక్షః పాతు కుక్షిం పరాత్పరః |
నాభిం బ్రహ్మపితా పాతు హృదయం హృదయేశ్వరః || ౩౭ ||
మహాదంష్ట్రః స్తనౌ పాతు కంఠం పాతు విముక్తిదః |
ప్రభంజనపతిర్బాహూ కరౌ కామపితాఽవతు || ౩౮ ||
హస్తౌ హంసపతిః పాతు పాతు సర్వాంగులీర్హరిః |
సర్వాంగశ్చిబుకం పాతు పాత్వోష్ఠౌ కాలనేమిహా || ౩౯ ||
ముఖం తు మధుహా పాతు దంతాన్ దామోదరోఽవతు |
నాసికామవ్యయః పాతు నేత్రే సూర్యేందులోచనః || ౪౦ ||
ఫాలం కర్మఫలాధ్యక్షః పాతు కర్ణౌ మహారథః |
శేషశాయీ శిరః పాతు కేశాన్ పాతు నిరామయః || ౪౧ ||
సర్వాంగం పాతు సర్వేశః సదా పాతు సతీశ్వరః |
ఇతీదం కవచం పుణ్యం వరాహస్య మహాత్మనః || ౪౨ ||
యః పఠేత్ శృణుయాద్వాపి తస్య మృత్యుర్వినశ్యతి |
తం నమస్యంతి భూతాని భీతాః సాంజలిపాణయః || ౪౩ ||
రాజదస్యుభయం నాస్తి రాజ్యభ్రంశో న జాయతే |
యన్నామస్మరణాద్భీతాః భూతవేతాళరాక్షసాః || ౪౪ ||
మహారోగాశ్చ నశ్యంతి సత్యం సత్యం వదామ్యహమ్ |
కంఠే తు కవచం బద్ధ్వా వంధ్యా పుత్రవతీ భవేత్ || ౪౫ ||
శత్రుసైన్యక్షయప్రాప్తిః దుఃఖప్రశమనం తథా |
ఉత్పాతదుర్నిమిత్తాదిసూచితారిష్టనాశనమ్ || ౪౬ ||
బ్రహ్మవిద్యాప్రబోధం చ లభతే నాత్ర సంశయః |
ధృత్వేదం కవచం పుణ్యం మాంధాతా పరవీరహా || ౪౭ ||
జిత్వా తు శాంబరీం మాయాం దైత్యేంద్రానవధీత్ క్షణాత్ |
కవచేనావృతో భూత్వా దేవేంద్రోఽపి సురారిహా || ౪౮ ||
భూమ్యోపదిష్టకవచధారణాన్నరకోఽపి చ |
సర్వావధ్యో జయీ భూత్వా మహతీం కీర్తిమాప్తవాన్ || ౪౯ ||
అశ్వత్థమూలేఽర్కవారే నిత్య పుష్కరిణీతటే |
వరాహకవచం జప్త్వా శతవారం పఠేద్యది || ౫౦ ||
అపూర్వరాజ్యసంప్రాప్తిం నష్టస్య పునరాగమమ్ |
లభతే నాత్ర సందేహః సత్యమేతన్మయోదితమ్ || ౫౧ ||
జప్త్వా వరాహమంత్రం తు లక్షమేకం నిరంతరమ్ |
దశాంశం తర్పణం హోమం పాయసేన ఘృతేన చ || ౫౨ ||
కుర్వన్ త్రికాలసంధ్యాసు కవచేనావృతో యది |
భూమండలాధిపత్యం చ లభతే నాత్ర సంశయః || ౫౩ ||
ఇదముక్తం మయా దేవి గోపనీయం దురాత్మనామ్ |
వరాహకవచం పుణ్యం సంసారార్ణవతారకమ్ || ౫౪ ||
మహాపాతకకోటిఘ్నం భుక్తిముక్తిఫలప్రదమ్ |
వాచ్యం పుత్రాయ శిష్యాయ సద్వృతాయ సుధీమతే || ౫౫ ||
శ్రీసూత ఉవాచ |
ఇతి పత్యుర్వచః శ్రుత్వా దేవీ సంతుష్టమానసా |
వినాయకగుహౌ పుత్రౌ ప్రపేదే ద్వౌ సురార్చితౌ || ౫౬ ||
కవచస్య ప్రభావేన లోకమాతా చ పార్వతీ |
య ఇదం శృణుయాన్నిత్యం యో వా పఠతి నిత్యశః |
స ముక్తః సర్వపాపేభ్యో విష్ణులోకే మహీయతే || ౫౭ ||
ఇతి శ్రీ వరాహ కవచమ్ |
మరిన్ని శ్రీ విష్ణు స్తోత్రాలు చూడండి.
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
