Read in తెలుగు / ಕನ್ನಡ / தமிழ் / English (IAST)
ద్వ్యశీతితమదశకమ్ (౮౨) – బాణాసురయుద్ధం తథా నృగశాపమోక్షమ్ |
ప్రద్యుమ్నో రౌక్మిణేయః స ఖలు తవ కలా శంబరేణాహృతస్తం
హత్వా రత్యా సహాప్తో నిజపురమహరద్రుక్మికన్యాం చ ధన్యామ్ |
తత్పుత్రోఽథానిరుద్ధో గుణనిధిరవహద్రోచనాం రుక్మిపౌత్రీం
తత్రోద్వాహే గతస్త్వం న్యవధి ముసలినా రుక్మ్యపి ద్యూతవైరాత్ || ౮౨-౧ ||
బాణస్య సా బలిసుతస్య సహస్రబాహో-
ర్మాహేశ్వరస్య మహితా దుహితా కిలోషా |
త్వత్పౌత్రమేనమనిరుద్ధమదృష్టపూర్వం
స్వప్నేఽనుభూయ భగవన్ విరహాతురాఽభూత్ || ౮౨-౨ ||
యోగిన్యతీవ కుశలా ఖలు చిత్రలేఖా
తస్యాః సఖీ విలిఖతీ తరుణానశేషాన్ |
తత్రానిరుద్ధముషయా విదితం నిశాయా-
మానేష్ట యోగబలతో భవతో నికేతాత్ || ౮౨-౩ ||
కన్యాపురే దయితయా సుఖమారమన్తం
చైనం కథఞ్చన బబన్ధుషి శర్వబన్ధౌ |
శ్రీనారదోక్తతదుదన్తదురన్తరోషై-
స్త్వం తస్య శోణితపురం యదుభిర్న్యరున్ధాః || ౮౨-౪ ||
పురీపాలః శైలప్రియదుహితృనాథోఽస్య భగవాన్
సమం భూతవ్రాతైర్యదుబలమశఙ్కం నిరురుధే |
మహాప్రాణో బాణో ఝటితి యుయుధానేనయుయుధే
గుహః ప్రద్యుమ్నేన త్వమపి పురహన్త్రా జఘటిషే || ౮౨-౫ ||
నిరుద్ధాశేషాస్త్రే ముముహుషి తవాస్త్రేణ గిరిశే
ద్రుతా భూతా భీతాః ప్రమథకులవీరాః ప్రమథితాః |
పరాస్కన్దత్స్కన్దః కుసుమశరబాణైశ్చ సచివః
స కుంభాణ్డో భాణ్డం నవమివ బలేనాశు బిభిదే || ౮౨-౬ ||
చాపానాం పఞ్చశత్యా ప్రసభముపగతే ఛిన్నచాపేఽథ బాణే
వ్యర్థే యాతే సమేతో జ్వరపతిరశనైరజ్వరి త్వజ్జ్వరేణ |
జ్ఞానీ స్తుత్వాథ దత్త్వా తవ చరితజుషాం విజ్వరం స జ్వరోఽగాత్
ప్రాయోఽన్తర్జ్ఞానవన్తోఽపి చ బహుతమసా రౌద్రచేష్టా హి రౌద్రాః || ౮౨-౭ ||
బాణం నానాయుధోగ్రం పునరభిపతితం దర్పదోషాద్వితన్వన్
నిర్లూనాశేషదోషం సపది బుబుధుషా శఙ్కరేణోపగీతః |
తద్వాచా శిష్టబాహుద్వితయముభయతో నిర్భయం తత్ప్రియం తం
ముక్త్వా తద్దత్తమానో నిజపురమగమః సానిరుద్ధః సహోషః || ౮౨-౮ ||
ముహుస్తావచ్ఛక్రం వరుణమజయో నన్దహరణే
యమం బాలానీతౌ దవదహనపానేఽనిలసఖమ్ |
విధిం వత్సస్తేయే గిరిశమిహ బాణస్య సమరే
విభో విశ్వోత్కర్షీ తదయమవతారో జయతి తే || ౮౨-౯ ||
ద్విజరుషా కృకలాసవపుర్ధరం నృగనృపం త్రిదివాలయమాపయన్ |
నిజజనే ద్విజభక్తిమనుత్తమాముపదిశన్ పవనేశ్వర పాహి మామ్ || ౮౨-౧౦ ||
ఇతి ద్వ్యశీతితమదశకం సమాప్తం
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
