Sri Matangi Stotram 2 – శ్రీ మాతంగీ స్తోత్రం 2

స్తోత్రనిధి → దశమహావిద్యలు → శ్రీ మాతంగీ స్తోత్రం 2

[గమనిక: ఈ స్తోత్రము “శ్రీ శ్యామలా స్తోత్రనిధి” పారాయణ గ్రంథములో కూడా ఉన్నది. Click here to buy.]

మాతంగీం మధుపానమత్తనయనాం మాతంగ సంచారిణీం
కుంభీకుంభవివృత్తపీవరకుచాం కుంభాదిపాత్రాంచితామ్ |
ధ్యాయేఽహం మధుమారణైకసహజాం ధ్యాతుః సుపుత్రప్రదాం
శర్వాణీం సురసిద్ధసాధ్యవనితా సంసేవితా పాదుకామ్ || ౧ ||

మాతంగీ మహిషాదిరాక్షసకృతధ్వాంతైకదీపో మణిః
మన్వాదిస్తుత మంత్రరాజవిలసత్సద్భక్త చింతామణిః |
శ్రీమత్కౌలికదానహాస్యరచనా చాతుర్య రాకామణిః
దేవి త్వం హృదయే వసాద్యమహిమే మద్భాగ్య రక్షామణిః || ౨ ||

జయ దేవి విశాలాక్షి జయ సర్వేశ్వరి జయ |
జయాంజనగిరిప్రఖ్యే మహాదేవ ప్రియంకరి || ౩ ||

మహావిశ్వేశదయితే జయ బ్రహ్మాది పూజితే |
పుష్పాంజలిం ప్రదాస్యామి గృహాణ కులనాయికే || ౪ ||

జయ మాతర్మహాకృష్ణే జయ నీలోత్పలప్రభే |
మనోహారి నమస్తేఽస్తు నమస్తుభ్యం వశంకరి || ౫ ||

జయ సౌభాగ్యదే నౄణాం లోకమోహిని తే నమః |
సర్వైశ్వర్యప్రదే పుంసాం సర్వవిద్యాప్రదే నమః || ౬ ||

సర్వాపదాం నాశకరీం సర్వదారిద్ర్యనాశినీమ్ |
నమో మాతంగతనయే నమశ్చాండాలి కామదే || ౭ ||

నీలాంబరే నమస్తుభ్యం నీలాలకసమన్వితే |
నమస్తుభ్యం మహావాణి మహాలక్ష్మి నమోఽస్తు తే || ౮ ||

మహామాతంగి పాదాబ్జం తవ నిత్యం నమామ్యహమ్ |
ఏతదుక్తం మహాదేవ్యా మాతంగ్యాః స్తోత్రముత్తమమ్ || ౯ ||

సర్వకామప్రదం నిత్యం యః పఠేన్మానవోత్తమః |
విముక్తః సకలైః పాపైః సమగ్రం పుణ్యమశ్నుతే || ౧౦ ||

రాజానో దాసతాం యాంతి నార్యో దాసీత్వమాప్నుయుః |
దాసీభూతం జగత్సర్వం శీఘ్రం తస్య భవేద్ధ్రువమ్ || ౧౧ ||

మహాకవీ భవేద్వాగ్భిః సాక్షాద్వాగీశ్వరో భవేత్ |
అచలాం శ్రియమాప్నోతి అణిమాద్యష్టకం లభేత్ || ౧౨ ||

లభేన్మనోరథాన్ సర్వాన్ త్రైలోక్యే నాపి దుర్లభాన్ |
అంతే శివత్వమాప్నోతి నాత్ర కార్యా విచారణా || ౧౩ ||

ఇతి శ్రీ మాతంగీ స్తోత్రమ్ |

---

గమనిక: పైన ఇవ్వబడిన స్తోత్రము, ఈ పుస్తకములో కూడా ఉన్నది.

శ్రీ శ్యామలా స్తోత్రనిధి

(నిత్య పారాయణ గ్రంథము)

See details – Click here to buy

---

మరిన్ని శ్రీ శ్యామలా స్తోత్రాలు చూడండి. మరిన్ని దశమహావిద్యా స్తోత్రాలు చూడండి.

Did you see any mistake/variation in the content above? Click here to report mistakes and corrections in Stotranidhi content.