Sri Lakshmi Nrusimha Karavalamba Stotram (13 Shlokas) – శ్రీ లక్ష్మీనృసింహ కరావలంబ స్తోత్రం (13 శ్లో.)

(గమనిక: శ్రీ లక్ష్మీనృసింహ కరావలంబ స్తోత్రం (25 శ్లోకాలతో) మరొక వరుసక్రమంలో కూడా ఉన్నది చూడండి.)

శ్రీమత్పయోనిధినికేతన చక్రపాణే
భోగీంద్రభోగమణిరంజిత పుణ్యమూర్తే |
యోగీశ శాశ్వత శరణ్య భవాబ్ధిపోత
లక్ష్మీనృసింహ మమ దేహి కరావలంబమ్ || ౧ ||

బ్రహ్మేంద్రరుద్రమరుదర్కకిరీటకోటి-
సంఘట్టితాంఘ్రికమలామలకాంతికాంత |
లక్ష్మీలసత్కుచసరోరుహరాజహంస
లక్ష్మీనృసింహ మమ దేహి కరావలంబమ్ || ౨ ||

సంసారఘోరగహనే చరతో మురారే
మారోగ్రభీకరమృగప్రవరార్దితస్య |
ఆర్తస్య మత్సరనిదాఘనిపీడితస్య
లక్ష్మీనృసింహ మమ దేహి కరావలంబమ్ || ౩ ||

సంసారకూపమతిఘోరమగాధమూలం
సంప్రాప్య దుఃఖశతసర్పసమాకులస్య |
దీనస్య దేవ కృపయా పదమాగతస్య
లక్ష్మీనృసింహ మమ దేహి కరావలంబమ్ || ౪ ||

సంసారసాగరవిశాలకరాళకాల-
నక్రగ్రహగ్రసననిగ్రహవిగ్రహస్య |
వ్యగ్రస్య రాగరసనోర్మినిపీడితస్య
లక్ష్మీనృసింహ మమ దేహి కరావలంబమ్ || ౫ ||

సంసారవృక్షమఘబీజమనంతకర్మ-
శాఖాశతం కరణపత్రమనంగపుష్పమ్ |
ఆరుహ్య దుఃఖఫలితం పతతో దయాళో
లక్ష్మీనృసింహ మమ దేహి కరావలంబమ్ || ౬ ||

సంసారసర్పఘనవక్త్రభయోగ్రతీవ్ర-
దంష్ట్రాకరాళవిషదగ్ధవినష్టమూర్తేః |
నాగారివాహన సుధాబ్ధినివాస శౌరే
లక్ష్మీనృసింహ మమ దేహి కరావలంబమ్ || ౭ ||

సంసారదావదహనాతురభీకరోరు-
జ్వాలావళీభిరతిదగ్ధతనూరుహస్య |
త్వత్పాదపద్మసరసీం శరణాగతస్య
లక్ష్మీనృసింహ మమ దేహి కరావలంబమ్ || ౮ ||

సంసారజాలపతితస్య జగన్నివాస
సర్వేంద్రియార్థబడిశార్థఝషోపమస్య |
ప్రోత్ఖండితప్రచురతాలుకమస్తకస్య
లక్ష్మీనృసింహ మమ దేహి కరావలంబమ్ || ౯ ||

సంసారభీకరకరీంద్రకరాభిఘాత-
నిష్పిష్టమర్మవపుషః సకలార్తినాశ |
ప్రాణప్రయాణభవభీతిసమాకులస్య
లక్ష్మీనృసింహ మమ దేహి కరావలంబమ్ || ౧౦ ||

అంధస్య మే హృతవివేకమహాధనస్య
చోరైః ప్రభో బలిభిరింద్రియనామధేయైః |
మోహాంధకూపకుహరే వినిపాతితస్య
లక్ష్మీనృసింహ మమ దేహి కరావలంబమ్ || ౧౧ ||

లక్ష్మీపతే కమలనాభ సురేశ విష్ణో
వైకుంఠ కృష్ణ మధుసూదన పుష్కరాక్ష |
బ్రహ్మణ్య కేశవ జనార్దన వాసుదేవ
దేవేశ దేహి కృపణస్య కరావలంబమ్ || ౧౨ ||

యన్మాయయోర్జితవపుః ప్రచురప్రవాహ-
మగ్నార్థమత్ర నివహోరుకరావలంబమ్ |
లక్ష్మీనృసింహచరణాబ్జమధువ్రతేన
స్తోత్రం కృతం సుఖకరం భువి శంకరేణ || ౧౩ ||

ఇతి శ్రీమత్పరమహంసపరివ్రాజకాచార్య శ్రీమచ్ఛంకరాచార్య విరచితం శ్రీలక్ష్మీనృసింహ కరావలంబ స్తోత్రమ్ |

(గమనిక: శ్రీ లక్ష్మీనృసింహ కరావలంబ స్తోత్రం (25 శ్లోకాలతో) మరొక వరుసక్రమంలో కూడా ఉన్నది చూడండి.)


మరిన్ని శ్రీ నృసింహ స్తోత్రాలు చూడండి.


గమనిక: "శ్రీ శివ స్తోత్రనిధి" పుస్తకము ముద్రణ చేయుటకు ఆలోచన చేయుచున్నాము.

Facebook Comments

You may also like...

2 వ్యాఖ్యలు

  1. Srinivas అంటున్నారు:

    Nice

  2. B.subhadramma అంటున్నారు:

    V.nice tks a lot

స్పందించండి

మీ ఈమెయిలు చిరునామా ప్రచురించబడదు.

error: Not allowed
%d bloggers like this: