Read in తెలుగు / ಕನ್ನಡ / தமிழ் / देवनागरी / English (IAST)
అంతర్ముఖో యః స్వశుభేచ్ఛయైవ
స్వయం విమర్శేన మనోమలాని |
దృష్ట్వా శమాద్యైర్ధునుతే సమూలం
స భాగ్యవాన్దేవి తవ ప్రియశ్చ || ౩౮-౧ ||
న వేదశాస్త్రాధ్యయనేన తీర్థ-
-సంసేవయా దానతపోవ్రతైర్వా |
శుద్ధిం మనో యాతి తవ స్మృతేస్త-
-ద్వైశద్యమాదర్శవదేతి మాతః || ౩౮-౨ ||
శుద్ధిర్న యజ్ఞేన యజన్ శశాంకః
పత్నీం గురోః ప్రాప భృశం స్మరార్తః |
శతక్రతుర్గౌతమధర్మపత్నీ-
-మగాదహల్యాం మదనేషు విద్ధః || ౩౮-౩ ||
స విఘ్నకారీ తపసాం మునీనాం
గతస్పృహం యోగివరం ప్రశాంతమ్ |
హా విశ్వరూపం పవినా జఘాన
న కించనాకార్యమధర్మబుద్ధేః || ౩౮-౪ ||
మునిర్వసిష్ఠః ఖలు తీర్థసేవీ
తపోనిధిర్గాధిసుతశ్చ కోపాత్ |
ఉభౌ మిథః శేపతురాడిభావం
ప్రాప్తః కిలైకో బకతాం పరశ్చ || ౩౮-౫ ||
ధనాని పృష్టాని గురూనదాతౄన్
స్వాన్ భార్గవాన్ పుత్రకళత్రభాజః |
క్రుద్ధాః పరం హైహయభూమిపాలా
న్యపీడయన్ కోఽత్ర విశుద్ధచిత్తః || ౩౮-౬ ||
కుర్యాన్న కిం లోభహతో మనుష్యో
యుధిష్ఠిరాద్యా అపి ధర్మనిష్ఠాః |
పితామహం బంధుజనాన్ గురూంశ్చ
రణే నిజఘ్నుః ఖలు రాజ్యలోభాత్ || ౩౮-౭ ||
కృష్ణోపదిష్టో జనమేజయస్తు
శుద్ధాంతరంగః పితరం మఖేన |
పరీక్షితం పాపవిముక్తమార్యం
విధాయ తే ప్రాపయతిస్మ లోకమ్ || ౩౮-౮ ||
సదా సదాచారరతో వివిక్తే
దేశే నిషణ్ణశ్చరణాంబుజే తే |
ధ్యాయన్నజస్రం నిజవాసనా యో
నిర్మార్ష్టి స త్వన్మయతాముపైతి || ౩౮-౯ ||
జ్ఞానం న భక్తిర్న తపో న యోగ-
-బుద్ధిర్న మే చిత్తజయోఽపి మాతః |
అంధం తమోఽహం ప్రవిశామి మృత్యోః
సముద్ధరేమం వరదే నమస్తే || ౩౮-౧౦ ||
ఏకోనచత్వారింశ దశకమ్ (౩౯) – మణిద్వీపనివాసినీ >>
సంపూర్ణ దేవీ నారాయణీయం (41 దశకాలు) చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
