Read in తెలుగు / ಕನ್ನಡ / தமிழ் / देवनागरी / English (IAST)
|| క్రోధసంహారప్రార్థనా ||
తప్యమానం తథా రామం సీతాహరణకర్శితమ్ |
లోకానామభవే యుక్తం సాంవర్తకమివానలమ్ || ౧ ||
వీక్షమాణం ధనుః సజ్యం నిఃశ్వసంతం పునః పునః |
దగ్ధుకామం జగత్సర్వం యుగాంతే చ యథా హరమ్ || ౨ ||
అదృష్టపూర్వం సంక్రుద్ధం దృష్ట్వా రామం తు లక్ష్మణః |
అబ్రవీత్ప్రాంజలిర్వాక్యం ముఖేన పరిశుష్యతా || ౩ ||
పురా భూత్వా మృదుర్దాంతః సర్వభూతహితే రతః |
న క్రోధవశమాపన్నః ప్రకృతిం హాతుమర్హసి || ౪ ||
చంద్రే లక్ష్మీః ప్రభా సూర్యే గతిర్వాయౌ భువి క్షమా |
ఏతచ్చ నియతం సర్వం త్వయి చానుత్తమం యశః || ౫ ||
ఏకస్య నాపరాధేన లోకాన్హంతుం త్వమర్హసి |
న తు జానామి కస్యాయం భగ్నః సాంగ్రామికో రథః || ౬ ||
కేన వా కస్య వా హేతోః సాయుధః సపరిచ్ఛదః |
ఖురనేమిక్షతశ్చాయం సిక్తో రుధిరబిందుభిః || ౭ ||
దేశో నివృత్తసంగ్రామః సుఘోరః పార్థివాత్మజ |
ఏకస్య తు విమర్దోఽయం న ద్వయోర్వదతాం వర || ౮ ||
న హి వృత్తం హి పశ్యామి బలస్య మహతః పదమ్ |
నైకస్య తు కృతే లోకాన్వినాశయితుమర్హసి || ౯ ||
యుక్తదండా హి మృదవః ప్రశాంతా వసుధాధిపాః |
సదా త్వం సర్వభూతానాం శరణ్యః పరమా గతిః || ౧౦ ||
కో ను దారప్రణాశం తే సాధు మన్యేత రాఘవ |
సరితః సాగరాః శైలా దేవగంధర్వదానవాః || ౧౧ ||
నాలం తే విప్రియం కర్తుం దీక్షితస్యేవ సాధవః |
యేన రాజన్హృతా సీతా తమన్వేషితుమర్హసి || ౧౨ ||
మద్ద్వితీయో ధనుష్పాణిః సహాయైః పరమర్షిభిః |
సముద్రం చ విచేష్యామః పర్వతాంశ్చ వనాని చ || ౧౩ ||
గుహాశ్చ వివిధా ఘోరాః నదీః పద్మవనాని చ |
దేవగంధర్వలోకాంశ్చ విచేష్యామః సమాహితాః || ౧౪ ||
యావన్నాధిగమిష్యామస్తవ భార్యాపహారిణమ్ |
న చేత్సామ్నా ప్రదాస్యంతి పత్నీం తే త్రిదశేశ్వరాః |
కోసలేంద్ర తతః పశ్చాత్ప్రాప్తకాలం కరిష్యసి || ౧౫ ||
శీలేన సామ్నా వినయేన సీతాం
నయేన న ప్రాప్స్యసి చేన్నరేంద్ర |
తతః సముత్సాదయ హేమపుంఖై-
-ర్మహేంద్రవజ్రప్రతిమైః శరౌఘైః || ౧౬ ||
ఇత్యార్షే శ్రీమద్రామాయణే వాల్మీకియే ఆదికావ్యే అరణ్యకాండే పంచషష్ఠితమః సర్గః || ౬౫ ||
అరణ్యకాండే షట్షష్ఠితమః సర్గః (౬౬) >>
గమనిక: "నవగ్రహ స్తోత్రనిధి" పుస్తకము తాయారుచేయుటకు ఆలోచన చేయుచున్నాము.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
