Read in తెలుగు / ಕನ್ನಡ / தமிழ் / देवनागरी / English (IAST)
|| రాక్షసీవిలాపః ||
తాని తాని సహస్రాణి సారోహాణాం చ వాజినామ్ |
రథానాం త్వగ్నివర్ణానాం సధ్వజానాం సహస్రశః || ౧ ||
రాక్షసానాం సహస్రాణి గదాపరిఘయోధినామ్ |
కాంచనధ్వజచిత్రాణాం శూరాణాం కామరూపిణామ్ || ౨ ||
నిహతాని శరైస్తీక్ష్ణైస్తప్తకాంచనభూషణైః |
రావణేన ప్రయుక్తాని రామేణాక్లిష్టకర్మణా || ౩ ||
దృష్ట్వా శ్రుత్వా చ సంభ్రాంతా హతశేషా నిశాచరాః |
రాక్షసీశ్చ సమాగమ్య దీనాశ్చింతాపరిప్లుతాః || ౪ ||
విధవా హతపుత్రాశ్చ క్రోశంత్యో హతబాంధవాః |
రాక్షస్యః సహ సంగమ్య దుఃఖార్తాః పర్యదేవయన్ || ౫ ||
కథం శూర్పణఖా వృద్ధా కరాళా నిర్ణతోదరీ |
ఆససాద వనే రామం కందర్పమివ రూపిణమ్ || ౬ ||
సుకుమారం మహాసత్త్వం సర్వభూతహితే రతమ్ |
తం దృష్ట్వా లోకనింద్యా సా హీనరూపా ప్రకామితా || ౭ ||
కథం సర్వగుణైర్హీనా గుణవంతం మహౌజసమ్ |
సుముఖం దుర్ముఖీ రామం కామయామాస రాక్షసీ || ౮ ||
జనస్యాస్యాల్పభాగ్యత్వాద్వలినీ శ్వేతమూర్ధజా |
అకార్యమపహాస్యం చ సర్వలోకవిగర్హితమ్ || ౯ ||
రాక్షసానాం వినాశాయ దూషణస్య ఖరస్య చ |
చకారాప్రతిరూపా సా రాఘవస్య ప్రధర్షణమ్ || ౧౦ ||
తన్నిమిత్తమిదం వైరం రావణేన కృతం మహత్ |
వధాయ సీతా సానీతా దశగ్రీవేణ రక్షసా || ౧౧ ||
న చ సీతాం దశగ్రీవః ప్రాప్నోతి జనకాత్మజామ్ |
బద్ధం బలవతా వైరమక్షయం రాఘవేణ చ || ౧౨ ||
వైదేహీం ప్రార్థయానం తం విరాధం ప్రేక్ష్య రాక్షసమ్ |
హతమేకేన రామేణ పర్యాప్తం తన్నిదర్శనమ్ || ౧౩ ||
చతుర్దశసహస్రాణి రక్షసాం భీమకర్మణామ్ |
నిహతాని జనస్థానే శరైరగ్నిశిఖోపమైః || ౧౪ ||
ఖరశ్చ నిహతః సంఖ్యే దూషణస్త్రిశిరాస్తథా |
శరైరాదిత్యసంకాశైః పర్యాప్తం తన్నిదర్శనమ్ || ౧౫ ||
హతో యోజనబాహుశ్చ కబంధో రుధిరాశనః |
క్రోధాన్నాదం నదన్సోఽథ పర్యాప్తం తన్నిదర్శనమ్ || ౧౬ ||
జఘాన బలినం రామః సహస్రనయనాత్మజమ్ |
వాలినం మేరుసంకాశం పర్యాప్తం తన్నిదర్శనమ్ || ౧౭ ||
ఋశ్యమూకే వసన్ శైలే దీనో భగ్నమనోరథః |
సుగ్రీవః స్థాపితో రాజ్యే పర్యాప్తం తన్నిదర్శనమ్ || ౧౮ ||
[* అధికపాఠః –
ఏకో వాయుసుతః ప్రాప్య లంకాం హత్వా చ రాక్షసాన్ |
దగ్ధ్వా తాం చ పునర్యాతః పర్యాప్తం తన్నిదర్శనమ్ |
నిగృహ్య సాగరం తస్మిన్సేతుం బధ్వా ప్లవంగమైః |
వృతోఽతరత్తం యద్రామః పర్యాప్తం తన్నిదర్శనమ్ |
*]
ధర్మార్థసహితం వాక్యం సర్వేషాం రక్షసాం హితమ్ |
యుక్తం విభీషణేనోక్తం మోహాత్తస్య న రోచతే || ౧౯ ||
విభీషణవచః కుర్యాద్యది స్మ ధనదానుజః |
శ్మశానభూతా దుఃఖార్తా నేయం లంకా పురీ భవేత్ || ౨౦ ||
కుంభకర్ణం హతం శ్రుత్వా రాఘవేణ మహాబలమ్ |
అతికాయం చ దుర్ధర్షం లక్ష్మణేన హతం పునః || ౨౧ ||
ప్రియం చేంద్రజితం పుత్రం రావణో నావబుధ్యతే |
మమ పుత్రో మమ భ్రాతా మమ భర్తా రణే హతః || ౨౨ ||
ఇత్యేవం శ్రూయతే శబ్దో రాక్షసానాం కులే కులే |
రథాశ్చాశ్వాశ్చ నాగాశ్చ హతాః శతసహస్రశః || ౨౩ ||
రణే రామేణ శూరేణ రాక్షసాశ్చ పదాతయః |
రుద్రో వా యది వా విష్ణుర్మహేంద్రో వా శతక్రతుః || ౨౪ ||
హంతి నో రామరూపేణ యది వా స్వయమంతకః |
హతప్రవీరా రామేణ నిరాశా జీవితే వయమ్ || ౨౫ ||
అపశ్యంతో భయస్యాంతమనాథా విలపామహే |
రామహస్తాద్దశగ్రీవః శూరో దత్తమహావరః || ౨౬ ||
ఇదం భయం మహాఘోరముత్పన్నం నావబుధ్యతే |
న దేవా న చ గంధర్వా న పిశాచా న రాక్షసాః || ౨౭ ||
ఉపసృష్టం పరిత్రాతుం శక్తా రామేణ సంయుగే |
ఉత్పాతాశ్చాపి దృశ్యంతే రావణస్య రణే రణే || ౨౮ ||
కథయిష్యంతి రామేణ రావణస్య నిబర్హణమ్ |
పితామహేన ప్రీతేన దేవదానవరాక్షసైః || ౨౯ ||
రావణస్యాభయం దత్తం మానుషేభ్యో న యాచితమ్ |
తదిదం మానుషం మన్యే ప్రాప్తం నిఃసంశయం భయమ్ || ౩౦ ||
జీవితాంతకరం ఘోరం రక్షసాం రావణస్య చ |
పీడ్యమానాస్తు బలినా వరదానేన రక్షసా || ౩౧ ||
దీప్తైస్తపోభిర్విబుధాః పితామహమపూజయన్ |
దేవతానాం హితార్థాయ మహాత్మా వై పితామహః || ౩౨ ||
ఉవాచ దేవతాః సర్వా ఇదం తుష్టో మహద్వచః |
అద్యప్రభృతి లోకాంస్త్రీన్సర్వే దానవరాక్షసాః || ౩౩ ||
భయేన ప్రావృతా నిత్యం విచరిష్యంతి శాశ్వతమ్ |
దైవతైస్తు సమాగమ్య సర్వైశ్చేంద్రపురోగమైః || ౩౪ ||
వృషధ్వజస్త్రిపురహా మహాదేవః ప్రసాదితః |
ప్రసన్నస్తు మహాదేవో దేవానేతద్వచోఽబ్రవీత్ || ౩౫ ||
ఉత్పత్స్యతి హితార్థం వో నారీ రక్షఃక్షయావహా |
ఏషా దేవైః ప్రయుక్తా తు క్షుద్యథా దానవాన్పురా || ౩౬ ||
భక్షయిష్యతి నః సీతా రాక్షసఘ్నీ సరావణాన్ |
రావణస్యాపనీతేన దుర్వినీతస్య దుర్మతేః || ౩౭ ||
అయం నిష్ఠానకో ఘోరః శోకేన సమభిప్లుతః |
తం న పశ్యామహే లోకే యో నః శరణదో భవేత్ || ౩౮ ||
రాఘవేణోపసృష్టానాం కాలేనేవ యుగక్షయే |
నాస్తి నః శరణం కశ్చిద్భయే మహతి తిష్ఠతామ్ || ౩౯ ||
దవాగ్నివేష్టితానాం హి కరేణూనాం యథా వనే |
ప్రాప్తకాలం కృతం తేన పౌలస్త్యేన మహాత్మనా |
యత ఏవ భయం దృష్టం తమేవ శరణం గతః || ౪౦ ||
ఇతీవ సర్వా రజనీచరస్త్రియః
పరస్పరం సంపరిరభ్య బాహుభిః |
విషేదురార్తా భయభారపీడితాః
వినేదురుచ్చైశ్చ తదా సుదారుణమ్ || ౪౧ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే పంచనవతితమః సర్గః || ౯౫ ||
యుద్ధకాండ షణ్ణవతితమః సర్గః (౯౬) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
