Read in తెలుగు / ಕನ್ನಡ / தமிழ் / देवनागरी / English (IAST)
|| విభీషణసమాలోచనమ్ ||
తతో నికుంభో రభసః సూర్యశత్రుర్మహాబలః |
సుప్తఘ్నో యజ్ఞహా రక్షో మహాపార్శ్వో మహోదరః || ౧ ||
అగ్నికేతుశ్చ దుర్ధర్షో రశ్మికేతుశ్చ రాక్షసః |
ఇంద్రజిచ్చ మహాతేజా బలవాన్ రావణాత్మజః || ౨ ||
ప్రహస్తోఽథ విరూపాక్షో వజ్రదంష్ట్రో మహాబలః |
ధూమ్రాక్షశ్చాతికాయశ్చ దుర్ముఖశ్చైవ రాక్షసః || ౩ ||
పరిఘాన్పట్టశాన్ప్రాసాన్ శక్తిశూలపరశ్వధాన్ |
చాపాని చ సబాణాని ఖడ్గాంశ్చ విపులాన్ శితాన్ || ౪ ||
ప్రగృహ్య పరమక్రుద్ధాః సముత్పత్య చ రాక్షసాః |
అబ్రువన్ రావణం సర్వే ప్రదీప్తా ఇవ తేజసా || ౫ ||
అద్య రామం వధిష్యామః సుగ్రీవం చ సలక్ష్మణమ్ |
కృపణం చ హనూమంతం లంకా యేన ప్రధర్షితా || ౬ ||
తాన్గృహీతాయుధాన్సర్వాన్వారయిత్వా విభీషణః |
అబ్రవీత్ప్రాంజలిర్వాక్యం పునః ప్రత్యుపవేశ్య తాన్ || ౭ ||
అప్యుపాయైస్త్రిభిస్తాత యోఽర్థః ప్రాప్తుం న శక్యతే |
తస్య విక్రమకాలాంస్తాన్ యుక్తానాహుర్మనీషిణః || ౮ ||
ప్రమత్తేష్వభియుక్తేషు దైవేన ప్రహృతేషు చ |
విక్రమాస్తాత సిధ్యంతి పరీక్ష్య విధినా కృతాః || ౯ ||
అప్రమత్తం కథం తం తు విజిగీషుం బలే స్థితమ్ |
జితరోషం దురాధర్షం ప్రధర్షయితుమిచ్ఛథ || ౧౦ ||
సముద్రం లంఘయిత్వా తు ఘోరం నదనదీపతిమ్ |
కృతం హనుమతా కర్మ దుష్కరం తర్కయేత వా || ౧౧ ||
బలాన్యపరిమేయాని వీర్యాణి చ నిశాచరాః |
పరేషాం సహసాఽవజ్ఞా న కర్తవ్యా కథంచన || ౧౨ ||
కిం చ రాక్షసరాజస్య రామేణాపకృతం పురా |
ఆజహార జనస్థానాద్యస్య భార్యాం యశస్వినః || ౧౩ ||
ఖరో యద్యతివృత్తస్తు రామేణ నిహతో రణే |
అవశ్యం ప్రాణినాం ప్రాణాః రక్షితవ్యా యథాబలమ్ || ౧౪ ||
అయశస్యమనాయుష్యం పరదారాభిమర్శనమ్ |
అర్థక్షయకరం ఘోరం పాపస్య చ పునర్భవమ్ || ౧౫ ||
ఏతన్నిమిత్తం వైదేహీ భయం నః సుమహద్భవేత్ |
ఆహృతా సా పరిత్యాజ్యా కలహార్థే కృతేన కిమ్ || ౧౬ ||
న నః క్షమం వీర్యవతా తేన ధర్మానువర్తినా |
వైరం నిరర్థకం కర్తుం దీయతామస్య మైథిలీ || ౧౭ ||
యావన్న సగజాం సాశ్వాం బహురత్నసమాకులామ్ |
పురీం దారయతే బాణైర్దీయతామస్య మైథిలీ || ౧౮ ||
యావత్సుఘోరా మహతీ దుర్ధర్షా హరివాహినీ |
నావస్కందతి నో లంకాం తావత్సీతా ప్రదీయతామ్ || ౧౯ ||
వినశ్యేద్ధి పురీ లంకా శూరాః సర్వే చ రాక్షసాః |
రామస్య దయితా పత్నీ స్వయం యది న దీయతే || ౨౦ ||
ప్రసాదయే త్వాం బంధుత్వాత్కురుష్వ వచనం మమ |
హితం తథ్యమహం బ్రూమి దీయతామస్య మైథిలీ || ౨౧ ||
పురా శరత్సూర్యమరీచిసన్నిభా-
-న్నవాన్సుపుంఖాన్సుదృఢాన్నృపాత్మజః |
సృజత్యమోఘాన్విశిఖాన్వధాయ తే
ప్రదీయతాం దాశరథాయ మైథిలీ || ౨౨ ||
త్యజస్వ కోపం సుఖధర్మనాశనం
భజస్వ ధర్మం రతికీర్తివర్ధనమ్ |
ప్రసీద జీవేమ సపుత్రబాంధవాః
ప్రదీయతాం దాశరథాయ మైథిలీ || ౨౩ ||
విభీషణవచః శ్రుత్వా రావణో రాక్షసేశ్వరః |
విసర్జయిత్వా తాన్సర్వాన్ప్రవివేశ స్వకం గృహమ్ || ౨౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే నవమః సర్గః || ౯ ||
సంపూర్ణ శ్రీవాల్మీకి రామాయణ యుద్ధకాండ చూడండి
గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.