Read in తెలుగు / ಕನ್ನಡ / தமிழ் / देवनागरी / English (IAST)
|| నాగపాశబంధః ||
స తస్య గతిమన్విచ్ఛన్రాజపుత్రః ప్రతాపవాన్ |
దిదేశాతిబలో రామో దశ వానరయూథపాన్ || ౧ ||
ద్వౌ సుషేణస్య దాయాదౌ నీలం చ ప్లవగర్షభమ్ |
అంగదం వాలిపుత్రం చ శరభం చ తరస్వినమ్ || ౨ ||
వినతం జాంబవంతం చ సానుప్రస్థం మహాబలమ్ |
ఋషభం చర్షభస్కంధమాదిదేశ పరంతపః || ౩ ||
తే సంప్రహృష్టా హరయో భీమానుద్యమ్య పాదపాన్ |
ఆకాశం వివిశుః సర్వే మార్గమాణా దిశో దశ || ౪ ||
తేషాం వేగవతాం వేగమిషుభిర్వేగవత్తరైః |
అస్త్రవిత్పరమాస్త్రైస్తు వారయామాస రావణిః || ౫ ||
తం భీమవేగా హరయో నారాచైః క్షతవిగ్రహాః |
అంధకారే న దదృశుర్మేఘైః సూర్యమివావృతమ్ || ౬ ||
రామలక్ష్మణయోరేవ సర్వదేహభిదః శరాన్ |
భృశమావేశయామాస రావణిః సమితింజయః || ౭ ||
నిరంతరశరీరౌ తౌ భ్రాతరౌ రామలక్ష్మణౌ |
క్రుద్ధేనేంద్రజితా వీరౌ పన్నగైః శరతాం గతైః || ౮ ||
తయోః క్షతజమార్గేణ సుస్రావ రుధిరం బహు |
తావుభౌ చ ప్రకాశేతే పుష్పితావివ కింశుకౌ || ౯ ||
తతః పర్యంతరక్తాక్షో భిన్నాంజనచయోపమః |
రావణిర్భ్రాతరౌ వాక్యమంతర్ధానగతోఽబ్రవీత్ || ౧౦ ||
యుద్ధ్యమానమనాలక్ష్యం శక్రోఽపి త్రిదశేశ్వరః |
ద్రష్టుమాసాదితుం వాఽపి న శక్తః కిం పునర్యువామ్ || ౧౧ ||
ప్రావృతావిషుజాలేన రాఘవౌ కంకపత్రిణా |
ఏష రోషపరీతాత్మా నయామి యమసాదనమ్ || ౧౨ ||
ఏవముక్త్వా తు ధర్మజ్ఞౌ భ్రాతరౌ రామలక్ష్మణౌ |
నిర్బిభేద శితైర్బాణైః ప్రజహర్ష ననాద చ || ౧౩ ||
భిన్నాంజనచయశ్యామో విస్ఫార్య విపులం ధనుః |
భూయో భూయః శరాన్ఘోరాన్విససర్జ మహామృధే || ౧౪ ||
తతో మర్మసు మర్మజ్ఞో మజ్జయన్నిశితాన్ శరాన్ |
రామలక్ష్మణయోర్వీరో ననాద చ ముహుర్ముహుః || ౧౫ ||
బద్ధౌ తు శరబంధేన తావుభౌ రణమూర్ధని |
నిమేషాంతరమాత్రేణ న శేకతురుదీక్షితుమ్ || ౧౬ ||
తతో విభిన్నసర్వాంగౌ శరశల్యాచితావుభౌ |
ధ్వజావివ మహేంద్రస్య రజ్జుముక్తౌ ప్రకంపితౌ || ౧౭ ||
తౌ సంప్రచలితౌ వీరౌ మర్మభేదేన కర్శితౌ |
నిపేతతుర్మహేష్వాసౌ జగత్యాం జగతీపతీ || ౧౮ ||
తౌ వీరశయనే వీరౌ శయానౌ రుధిరోక్షితౌ |
శరవేష్టితసర్వాంగావార్తౌ పరమపీడితౌ || ౧౯ ||
న హ్యవిద్ధం తయోర్గాత్రే బభూవాంగులమంతరమ్ |
నానిర్భిన్నం న చాస్తబ్ధమాకరాగ్రాదజిహ్మగైః || ౨౦ ||
తౌ తు క్రూరేణ నిహతౌ రక్షసా కామరూపిణా |
అసృక్ సుస్రువతుస్తీవ్రం జలం ప్రస్రవణావివ || ౨౧ ||
పపాత ప్రథమం రామో విద్ధో మర్మసు మార్గణైః |
క్రోధాదింద్రజితా యేన పురా శక్రో వినిర్జితః || ౨౨ ||
రుక్మపుంఖైః ప్రసన్నాగ్రైరధోగతిభిరాశుగైః |
నారాచైరర్ధనారాచైర్భల్లైరంజలికైరపి || ౨౩ ||
వివ్యాధ వత్సదంతైశ్చ సింహదంష్ట్రైః క్షురైస్తథా |
స వీరశయనే శిశ్యే విజ్యమాదాయ కార్ముకమ్ || ౨౪ ||
భిన్నముష్టిపరీణాహం త్రినతం రత్నభూషితమ్ |
బాణపాతాంతరే రామం పతితం పురుషర్షభమ్ || ౨౫ ||
స తత్ర లక్ష్మణో దృష్ట్వా నిరాశో జీవితేఽభవత్ |
రామం కమలపత్రాక్షం శరబంధపరిక్షతమ్ || ౨౬ ||
శుశోచ భ్రాతరం దృష్ట్వా పతితం ధరణీతలే |
హరయశ్చాపి తం దృష్ట్వా సంతాపం పరమం గతాః || ౨౭ ||
బద్ధౌ తు వీరౌ పతితౌ శయానౌ
తౌ వానరాః సంపరివార్య తస్థుః |
సమాగతా వాయుసుతప్రముఖ్యా
విషాదమార్తాః పరమం చ జగ్ముః || ౨౮ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే పంచచత్వారింశః సర్గః || ౪౫ ||
యుద్ధకాండ షట్చత్వారింశః సర్గః (౪౬) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
