Sri Shankara Bhagavatpadacharya Stuti – శ్రీ శంకరభగవత్పాదాచార్య స్తుతిః


ముదా కరేణ పుస్తకం దధానమీశరూపిణం
తథాఽపరేణ ముద్రికాం నమత్తమోవినాశినీమ్ |
కుసుంభవాససావృతం విభూతిభాసిఫాలకం
నతాఽఘనాశనే రతం నమామి శంకరం గురుమ్ || ౧

పరాశరాత్మజప్రియం పవిత్రితక్షమాతలం
పురాణసారవేదినం సనందనాదిసేవితమ్ |
ప్రసన్నవక్త్రపంకజం ప్రపన్నలోకరక్షకం
ప్రకాశితాద్వితీయతత్త్వమాశ్రయామి దేశికమ్ || ౨

సుధాంశుశేఖరార్చకం సుధీంద్రసేవ్యపాదుకం
సుతాదిమోహనాశకం సుశాంతిదాంతిదాయకమ్ |
సమస్తవేదపారగం సహస్రసూర్యభాసురం
సమాహితాఖిలేంద్రియం సదా భజామి శంకరమ్ || ౩

యమీంద్రచక్రవర్తినం యమాదియోగవేదినం
యథార్థతత్త్వబోధకం యమాంతకాత్మజార్చకమ్ |
యమేవ ముక్తికాంక్షయా సమాశ్రయంతి సజ్జనాః
నమామ్యహం సదా గురుం తమేవ శంకరాభిధమ్ || ౪

స్వబాల్య ఏవ నిర్భరం య ఆత్మనో దయాలుతాం
దరిద్రవిప్రమందిరే సువర్ణవృష్టిమానయన్ |
ప్రదర్శ్య విస్మయాంబుధౌ న్యమజ్జయత్ సమాంజనాన్
స ఏవ శంకరస్సదా జగద్గురుర్గతిర్మమ || ౫

యదీయపుణ్యజన్మనా ప్రసిద్ధిమాప కాలటీ
యదీయశిష్యతాం వ్రజన్ స తోటకోఽపి పప్రథే |
య ఏవ సర్వదేహినాం విముక్తిమార్గదర్శకః
నరాకృతిం సదాశివం తమాశ్రయామి సద్గురుమ్ || ౬

సనాతనస్య వర్త్మనః సదైవ పాలనాయ యః
చతుర్దిశాసు సన్మఠాన్ చకార లోకవిశ్రుతాన్ |
విభాండకాత్మజాశ్రమాదిసుస్థలేషు పావనాన్
తమేవ లోకశంకరం నమామి శంకరం గురుమ్ || ౭

యదీయహస్తవారిజాతసుప్రతిష్ఠితా సతీ
ప్రసిద్ధశృంగభూధరే సదా ప్రశాంతిభాసురే |
స్వభక్తపాలనవ్రతా విరాజతే హి శారదా
స శంకరః కృపానిధిః కరోతు మామనేనసమ్ || ౮

ఇమం స్తవం జగద్గురోర్గుణానువర్ణనాత్మకం
సమాదరేణ యః పఠేదనన్యభక్తిసంయుతః |
సమాప్నుయాత్సమీహితం మనోరథం నరోఽచిరా-
-ద్దయానిధేస్స శంకరస్య సద్గురోః ప్రసాదతః || ౯

ఇతి శ్రీ శంకరభగవత్పాదాచార్య స్తుతిః |


మరిన్ని శ్రీ గురు స్తోత్రాలు చూడండి.


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed
%d bloggers like this: