Sri Krishna Stotram (Indra Kritam) – శ్రీ కృష్ణ స్తోత్రం (ఇంద్ర కృతం)


ఇంద్ర ఉవాచ –
అక్షరం పరమం బ్రహ్మ జ్యోతీరూపం సనాతనమ్ |
గుణాతీతం నిరాకారం స్వేచ్ఛామయమనంతకమ్ || ౧ ||

భక్తధ్యానాయ సేవాయై నానారూపధరం వరమ్ |
శుక్లరక్తపీతశ్యామం యుగానుక్రమణేన చ || ౨ ||

శుక్లతేజస్స్వరూపం చ సత్యే సత్యస్వరూపిణమ్ |
త్రేతాయాం కుంకుమాకారం జ్వలంతం బ్రహ్మతేజసా || ౩ ||

ద్వాపరే పీతవర్ణం చ శోభితం పీతవాససా |
కృష్ణవర్ణం కలౌ కృష్ణం పరిపూర్ణతమం ప్రభుమ్ || ౪ ||

నవధారాధరోత్కృష్టశ్యామసుందరవిగ్రహమ్ |
నందైకనందనం వందే యశోదానందనం ప్రభుమ్ || ౫ ||

గోపికాచేతనహరం రాధాప్రాణాధికం పరమ్ |
వినోదమురళీశబ్దం కుర్వంతం కౌతుకేన చ || ౬ ||

రూపేణాప్రతిమేనైవ రత్నభూషణభూషితమ్ |
కందర్పకోటిసౌందర్యం బిభ్రతం శాంతమీశ్వరమ్ || ౭ ||

క్రీడంతం రాధయా సార్ధం బృందారణ్యే చ కుత్రచిత్ |
కుత్రచిన్నిర్జనేఽరణ్యే రాధావక్షస్స్థలస్థితమ్ || ౮ ||

జలక్రీడాం ప్రకుర్వంతం రాధికాసహితః క్వచిత్ |
రాధికాకబరీభారం కుర్వంతం కుత్రచిద్వనే || ౯ ||

కుత్రచిద్రాధికాపాదే దత్తవంతమలక్తకమ్ |
రాధాచర్వితతాంబూలం గృహ్ణంతం కుత్రచిన్ముదా || ౧౦ ||

పశ్యంతం కుత్రచిద్రాధాం పశ్యంతీం వక్రచక్షుషా |
దత్తవంతం చ రాధాయై కృత్వా మాలాం చ కుత్రచిత్ || ౧౧ ||

కుత్రచిద్రాధయా సార్ధం గచ్ఛంతం రాసమండలమ్ |
రాధాదత్తాం గళే మాలాం ధృతవంతం చ కుత్రచిత్ || ౧౨ ||

సార్ధం గోపాలికాభిశ్చ విహరంతం చ కుత్రచిత్ |
రాధాం గృహీత్వా గచ్ఛంతం విహాయ తాం చ కుత్రచిత్ || ౧౩ ||

విప్రపత్నీదత్తమన్నం భుక్తవంతం చ కుత్రచిత్ |
భుక్తవంతం తాళఫలం బాలకైస్సహ కుత్రచిత్ || ౧౪ ||

వస్త్రం గోపాలికానాం చ హరంతం కుత్రచిన్ముదా |
గవాం గణం వ్యాహరంతం కుత్రచిద్బాలకైస్సహ || ౧౫ ||

కాళీయమూర్ధ్ని పాదాబ్జం దత్తవంతం చ కుత్రచిత్ |
వినోదమురళీశబ్దం కుర్వంతం కుత్రచిన్ముదా || ౧౬ ||

గాయంతం రమ్యసంగీతం కుత్రచిద్బాలకైస్సహ |
స్తుత్వా శక్రః స్తవేంద్రేణ ప్రణనామ హరిం భియా || ౧౭ ||

పురా దత్తేన గురుణా రణే వృత్రాసురేణ చ |
కృష్ణేన దత్తం కృపయా బ్రహ్మణే చ తపస్యతే || ౧౮ ||

ఏకాదశాక్షరో మంత్రః కవచం సర్వలక్షణమ్ |
దత్తమేతత్కుమారాయ పుష్కరే బ్రహ్మణా పురా || ౧౯ ||

తేన చాంగిరసే దత్తం గురవేఽంగిరసాం మునే |
ఇదమింద్రకృతం స్తోత్రం నిత్యం భక్త్యా చ యః పఠేత్ || ౨౦ ||

ఇహ ప్రాప్య దృఢాం భక్తిమంతే దాస్యం లభేద్ధ్రువమ్ |
జన్మమృత్యుజరావ్యాధిశోకేభ్యో ముచ్యతే నరః || ౨౧ ||

న హి పశ్యతి స్వప్నేఽపి యమదూతం యమాలయమ్ || ౨౨ ||

ఇతి శ్రీబ్రహ్మవైవర్తే ఇంద్రకృత శ్రీకృష్ణస్తోత్రం |


మరిన్ని శ్రీ కృష్ణ స్తోత్రాలు చూడండి.


గమనిక : "శ్రీ దుర్గా స్తోత్రనిధి" పుస్తకము యొక్క ముద్రణ పూర్తి అయినది.

Did you see any mistake/variation in the content above? Click here to report mistakes and corrections in Stotranidhi content.

Facebook Comments

స్పందించండి

మీ ఈమెయిలు చిరునామా ప్రచురించబడదు.

error: Not allowed