Narayaneeyam Dasakam 49 – నారాయణీయం ఏకోనపఞ్చాశత్తమదశకమ్


ఏకోనపఞ్చాశత్తమదశకమ్ (౪౯) – వృన్దావనప్రవేశమ్

భవత్ప్రభావావిదురా హి గోపాస్తరుప్రపాతాదికమత్ర గోష్ఠే |
అహేతుముత్పాతగణం విశఙ్క్య ప్రయాతుమన్యత్ర మనో వితేనుః || ౪౯-౧ ||

తత్రోపనన్దాభిధగోపవర్యో జగౌ భవత్ప్రేరణయైవ నూనమ్ |
ఇతః ప్రతీచ్యాం విపినం మనోజ్ఞం వృన్దావనం నామ విరాజతీతి || ౪౯-౨ ||

బృహద్వనం తత్ఖలు నన్దముఖ్యా విధాయ గౌష్ఠీనమథ క్షణేన |
త్వదన్వితత్వజ్జననీనివిష్ట-గరిష్ఠయానానుగతా విచేలుః || ౪౯-౩ ||

అనోమనోజ్ఞధ్వనిధేనుపాలీఖురప్రణాదాన్తరతో వధూభిః |
భవద్వినోదాలపితాక్షరాణి ప్రపీయ నాజ్ఞాయత మార్గదైర్ఘ్యమ్ || ౪౯-౪ ||

నిరీక్ష్య వృన్దావనమీశ నన్దత్ప్రసూనకున్దప్రముఖద్రుమౌఘమ్ |
అమోదథాః శాద్వలసాన్ద్రలక్ష్మ్యా హరిన్మణీకుట్టిమపుష్టశోభమ్ || ౪౯-౫ ||

నవాకనిర్వ్యూఢనివాసభేదే-ష్వశేషగోపేషు సుఖాసితేషు |
వనశ్రియం గోపకిశోరపాలీ-విమిశ్రితః పర్యవలోకథాస్త్వమ్ || ౪౯-౬ ||

అరాలమార్గాగతనిర్మలాపాం మరాలకూజాకృతనర్మలాపామ్ |
నిరన్తరస్మేరసరోజవక్త్రాం కలిన్దకన్యాం సమలోకయస్త్వమ్ || ౪౯-౭ ||

మయూరకేకాశతలోభనీయం మయూఖమాలశబలం మణీనామ్ |
విరిఞ్చలోకస్పృశముచ్చశృఙ్గై-ర్గిరిం చ గోవర్ధనమైక్షథాస్త్వమ్ || ౪౯-౮ ||

సమం తతో గోపకుమారకైస్త్వం సమన్తతో యత్ర వనాన్తమాగాః |
తతస్తతస్తాం కృటిలామపశ్యః కలిన్దజాం రాగవతీమివైకామ్ || ౪౯-౯ ||

తథావిధేఽస్మిన్విపినే పశవ్యే సముత్సుకో వత్సగణప్రచారే |
చరన్సరామోఽథ కుమారకైస్త్వం సమీరగేహాధిప పాహి రోగాత్ || ౪౯-౧౦ ||

ఇతి ఏకోనపఞ్చాశత్తమదశకం సమాప్తమ్ |


సంపూర్ణ శ్రీమన్నారాయణీయం (౧౦౦ దశకాలు) చూడండి.


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments

స్పందించండి

error: Not allowed