Read in తెలుగు / ಕನ್ನಡ / தமிழ் / English (IAST)
ద్వాత్రింశదశకమ్ (౩౨) మత్స్యావతారమ్
పురా హయగ్రీవమహాసురేణ షష్ఠాన్తరాన్తోద్యదకాణ్డకల్పే |
నిద్రోన్ముఖబ్రహ్మముఖాద్ధృతేషు వేదేష్వధిత్సః కిల మత్స్యరూపమ్ || ౩౨-౧ ||
సత్యవ్రతస్య ద్రమిలాధిభర్తుర్నదీజలే తర్పయతస్తదానీమ్ |
కరాఞ్జలౌ సఞ్జ్వలితాకృతిస్త్వమదృశ్యథాః కశ్చన బాలమీనః || ౩౨-౨ ||
క్షిప్తం జలే త్వాం చకితం విలోక్య నిన్యేఽంబుపాత్రేణ మునిః స్వగేహమ్ |
స్వల్పైరహోభిః కలశీం చ కూపం వాపీం సరశ్చానశిషే విభో త్వమ్ || ౩౨-౩ ||
యోగప్రభావాద్భవదాజ్ఞయైవ నీతస్తతస్త్వం మునినా పయోధిమ్ |
పృష్టోఽమునా కల్పదిదృక్షుమేనం సప్తాహమాస్వేతి వదన్నయాసీః || ౩౨-౪ ||
ప్రాప్తే త్వదుక్తేఽహని వారిధారాపరిప్లుతే భూమితలే మునీన్ద్రః |
సప్తర్షిభిః సార్ధమపారవారిణ్యుద్ఘూర్ణమానః శరణం యయౌ త్వామ్ || ౩౨-౫ ||
ధరాం త్వదాదేశకరీమవాప్తాం నౌరూపిణీమారురుహుస్తదా తే |
తత్కమ్పకమ్ప్రేషు చ తేషు భూయస్త్వమంబుధేరావిరభూర్మహీయాన్ || ౩౨-౬ ||
ఝషాకృతిం యోజనలక్షదీర్ఘాం దధానముచ్చైస్తరతేజసం త్వామ్ |
నిరీక్ష్య తుష్టా మునయస్త్వదుక్త్యా త్వత్తుఙ్గశృఙ్గే తరణిం బబన్ధుః || ౩౨-౭ ||
ఆకృష్టనౌకో మునిమణ్డలాయ ప్రదర్శయన్విశ్వజగద్విభాగాన్ |
సంస్తూయమానో నృవరేణ తేన జ్ఞానం పరం చోపదిశన్నచారీః || ౩౨-౮ ||
కల్పావధౌ సప్తమునీన్పురోవత్ప్రస్థాప్య సత్యవ్రతభూమిపం తమ్ |
వైవస్వతాఖ్యం మనుమాదధానః క్రోధాద్ధయగ్రీవమభిద్రుతోఽభూః || ౩౨-౯ ||
స్వతుఙ్గశృఙ్గక్షతవక్షసం తం నిపాత్య దైత్యం నిగమాన్గృహీత్వా |
విరిఞ్చయే ప్రీతహృదే దదానః ప్రభఞ్జనాగారపతే ప్రపాయాః || ౩౨-౧౦ ||
ఇతి ద్వాత్రింశదశకం సమాప్తమ్ |
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
