Narayaneeyam Dasakam 14 – నారాయణీయం చతుర్దశదశకమ్


చతుర్దశదశకమ్ (౧౪) – కపిలావతారమ్

సమనుస్మృతతావకాఙ్ఘ్రియుగ్మః
స మనుః పఙ్కజసంభవాఙ్గజన్మా |
నిజమన్తరమన్తరాయహీనం
చరితం తే కథయన్సుఖం నినాయ || ౧౪-౧ ||

సమయే ఖలు తత్ర కర్దమాఖ్యో
ద్రుహిణచ్ఛాయభవస్తదీయవాచా |
ధృతసర్గరసో నిసర్గరమ్యం
భగవంస్త్వామయుతం సమాః సిషేవే || ౧౪-౨ ||

గరుడోపరి కాలమేఘకమ్రం
విలసత్కేలిసరోజపాణిపద్మమ్ |
హసితోల్లసితాననం విభో త్వం
వపురావిష్కురుషే స్మ కర్దమాయ || ౧౪-౩ ||

స్తువతే పులకావృతాయ తస్మై
మనుపుత్రీం దయితాం నవాపి పుత్రీః |
కపిలం చ సుతం స్వమేవ పశ్చాత్
స్వగతిం చాప్యనుగృహ్య నిర్గతోఽభూః || ౧౪-౪ ||

స మనుశ్శతరూపయా మహిష్యా
గుణవత్యా సుతయా చ దేవహూత్యా |
భవదీరితనారదోపదిష్టః
సమగాత్కర్దమమాగతిప్రతీక్షమ్ || ౧౪-౫ ||

మనునోపహృతాం చ దేవహూతిం
తరుణీరత్నమవాప్య కర్దమోఽసౌ |
భవదర్చననిర్వృతోఽపి తస్యాం
దృఢశుశ్రూషణయా దధౌ ప్రసాదమ్ || ౧౪-౬ ||

స పునస్త్వదుపాసనప్రభావా-
ద్దయితాకామకృతే కృతే విమానే |
వనితాకులసఙ్కులో నవాత్మా
వ్యహరద్దేవపథేషు దేవహూత్యా || ౧౪-౭ ||

శతవర్షమథ వ్యతీత్య సోఽయం
నవ కన్యాః సమవాప్య ధన్యరూపాః |
వనయానసముద్యతోఽపి కాన్తా-
హితకృత్త్వజ్జననోత్సుకో న్యవాత్సీత్ || ౧౪-౮ ||

నిజభర్తృగిరా భవన్నిషేవా-
నిరతాయామథ దేవ దేవహూత్యామ్ |
కపిలస్త్వమజాయథా జనానాం
ప్రథయిష్యన్పరమాత్మతత్త్వవిద్యామ్ || ౧౪-౯ ||

వనమేయుషి కర్దమే ప్రసన్నే
మతసర్వస్వముపాదిశఞ్జనన్యై |
కపిలాత్మక వాయుమన్దిరేశ
త్వరితం త్వం పరిపాహి మాం గదౌఘాత్ || ౧౪-౧౦ ||

ఇతి చతుర్దశదశకం సమాప్తమ్ |


సంపూర్ణ శ్రీమన్నారాయణీయం (౧౦౦ దశకాలు) చూడండి.


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments

స్పందించండి

error: Not allowed