Read in తెలుగు / ಕನ್ನಡ / தமிழ் / देवनागरी / English (IAST)
|| కపిసేనాసమానయనమ్ ||
ఏవముక్తస్తు సుగ్రీవో లక్ష్మణేన మహాత్మనా |
హనుమంతం స్థితం పార్శ్వే సచివం త్విదమబ్రవీత్ || ౧ ||
మహేంద్రహిమవద్వింధ్యకైలాసశిఖరేషు చ |
మందరే పాండుశిఖరే పంచశైలేషు యే స్థితాః || ౨ ||
తరుణాదిత్యవర్ణేషు భ్రాజమానేషు సర్వతః |
పర్వతేషు సముద్రాంతే పశ్చిమాయాం తు యే దిశి || ౩ ||
ఆదిత్యభవనే చైవ గిరౌ సంధ్యాభ్రసన్నిభే |
పద్మతాలవనం భీమం సంశ్రితా హరిపుంగవాః || ౪ ||
అంజనాంబుదసంకాశాః కుంజరప్రతిమౌజసః |
అంజనే పర్వతే చైవ యే వసంతి ప్లవంగమాః || ౫ ||
వనశైలగుహావాసా వానరాః కనకప్రభాః |
మేరుపార్శ్వగతాశ్చైవ యే ధూమ్రగిరిసంశ్రితాః || ౬ ||
తరుణాదిత్యవర్ణాశ్చ పర్వతే చ మహారుణే |
పిబంతో మధు మైరేయం భీమవేగాః ప్లవంగమాః || ౭ ||
వనేషు చ సురమ్యేషు సుగంధిషు మహత్సు చ |
తాపసానాం చ రమ్యేషు వనాంతేషు సమంతతః || ౮ ||
తాంస్తాన్ సమానయ క్షిప్రం పృథివ్యాం సర్వవానరాన్ |
సామదానాదిభిః సర్వైరాశు ప్రేషయ వానరాన్ || ౯ ||
ప్రేషితాః ప్రథమం యే చ మయా దూతా మహాజవాః |
త్వరణార్థం తు భూయస్త్వం హరీన్ సంప్రేషయాపరాన్ || ౧౦ ||
యే ప్రసక్తాశ్చ కామేషు దీర్ఘసూత్రాశ్చ వానరాః |
ఇహానయస్వ తాన్ సర్వాన్ శీఘ్రం తు మమ శాసనాత్ || ౧౧ ||
అహోభిర్దశభిర్యే హి నాగచ్ఛంతి మమాజ్ఞయా |
హంతవ్యాస్తే దురాత్మానో రాజశాసనదూషకాః || ౧౨ ||
శతాన్యథ సహస్రాణాం కోట్యశ్చ మమ శాసనాత్ |
ప్రయాంతు కపిసింహానాం దిశో మమ మతే స్థితాః || ౧౩ ||
మేఘపర్వతసంకాశాశ్ఛాదయంత ఇవాంబరమ్ |
ఘోరరూపాః కపిశ్రేష్ఠా యాంతు మచ్ఛాసనాదితః || ౧౪ ||
తే గతిజ్ఞా గతిం గత్వా పృథివ్యాం సర్వవానరాః |
ఆనయంతు హరీన్ సర్వాంస్త్వరితాః శాసనాన్మమ || ౧౫ ||
తస్య వానరరాజస్య శ్రుత్వా వాయుసుతో వచః |
దిక్షు సర్వాసు విక్రాంతాన్ ప్రేషయామాస వానరాన్ || ౧౬ ||
తే పదం విష్ణువిక్రాంతం పతత్రిజ్యోతిరధ్వగాః |
ప్రయాతాః ప్రహితా రాజ్ఞా హరయస్తత్క్షణేన వై || ౧౭ ||
తే సముద్రేషు గిరిషు వనేషు చ సరస్సు చ |
వానరా వానరాన్ సర్వాన్ రామహేతోరచోదయన్ || ౧౮ ||
మృత్యుకాలోపమస్యాజ్ఞాం రాజరాజస్య వానరాః |
సుగ్రీవస్యాయయుః శ్రుత్వా సుగ్రీవభయదర్శినః || ౧౯ ||
తతస్తేఽంజనసంకాశా గిరేస్తస్మాన్మహాజవాః |
తిస్రః కోట్యః ప్లవంగానాం నిర్యయుర్యత్ర రాఘవః || ౨౦ ||
అస్తం గచ్ఛతి యత్రార్కస్తస్మిన్ గిరివరే స్థితాః |
తప్తహేమమహాభాసస్తస్మాత్కోట్యో దశ చ్యుతాః || ౨౧ ||
కైలాసశిఖరేభ్యశ్చ సింహకేసరవర్చసామ్ |
తతః కోటిసహస్రాణి వానరాణాముపాగమన్ || ౨౨ ||
ఫలమూలేన జీవంతో హిమవంతముపాశ్రితాః |
తేషాం కోటిసహస్రాణాం సహస్రం సమవర్తత || ౨౩ ||
అంగారకసమానానాం భీమానాం భీమకర్మణామ్ |
వింధ్యాద్వానరకోటీనాం సహస్రాణ్యపతన్ ద్రుతమ్ || ౨౪ ||
క్షీరోదవేలానిలయాస్తమాలవనవాసినః |
నారికేలాశనాశ్చైవ తేషాం సంఖ్యా న విద్యతే || ౨౫ ||
వనేభ్యో గహ్వరేభ్యశ్చ సరిద్భ్యశ్చ మహాజవాః |
ఆగచ్ఛద్వానరీ సేనా పిబంతీవ దివాకరమ్ || ౨౬ ||
యే తు త్వరయితుం యాతా వానరాః సర్వవానరాన్ |
తే వీరా హిమవచ్ఛైలం దదృశుస్తం మహాద్రుమమ్ || ౨౭ ||
తస్మిన్ గిరివరే రమ్యే యజ్ఞో మాహేశ్వరః పురా |
సర్వదేవమనస్తోషో బభౌ దివ్యో మనోహరః || ౨౮ ||
అన్ననిష్యందజాతాని మూలాని చ ఫలాని చ |
అమృతాస్వాదకల్పాని దదృశుస్తత్ర వానరాః || ౨౯ ||
తదన్నసంభవం దివ్యం ఫలం మూలం మనోహరమ్ |
యః కశ్చిత్సకృదశ్నాతి మాసం భవతి తర్పితః || ౩౦ ||
తాని మూలాని దివ్యాని ఫలాని చ ఫలాశనాః |
ఔషధాని చ దివ్యాని జగృహుర్హరియూథపాః || ౩౧ ||
తస్మాచ్చ యజ్ఞాయతనాత్ పుష్పాణి సురభీణి చ |
ఆనిన్యుర్వానరా గత్వా సుగ్రీవప్రియకారణాత్ || ౩౨ ||
తే తు సర్వే హరివరాః పృథివ్యాం సర్వవానరాన్ |
సంచోదయిత్వా త్వరితా యూథానాం జగ్మురగ్రతః || ౩౩ ||
తే తు తేన ముహూర్తేన యూథపాః శీఘ్రగామినః |
కిష్కింధాం త్వరయా ప్రాప్తాః సుగ్రీవో యత్ర వానరః || ౩౪ ||
తే గృహీత్వౌషధీః సర్వాః ఫలం మూలం చ వానరాః |
తం ప్రతిగ్రాహయామాసుర్వచనం చేదమబ్రువన్ || ౩౫ ||
సర్వే పరిగతాః శైలాః సముద్రాశ్చ వనాని చ |
పృథివ్యాం వానరాః సర్వే శాసనాదుపయాంతి తే || ౩౬ ||
ఏవం శ్రుత్వా తతో హృష్టః సుగ్రీవః ప్లవగాధిపః |
ప్రతిజగ్రాహ తత్ప్రీతస్తేషాం సర్వముపాయనమ్ || ౩౭ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే సప్తత్రింశః సర్గః || ౩౭ ||
సంపూర్ణ వాల్మీకి రామాయణే కిష్కింధాకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
