Read in తెలుగు / ಕನ್ನಡ / தமிழ் / देवनागरी / English (IAST)
|| mahōdaravadhaḥ ||
hanyamānē balē tūrṇamanyōnyaṁ tē mahāmr̥dhē |
sarasīva mahāgharmē sūpakṣīṇē babhūvatuḥ || 1 ||
svabalasya vighātēna virūpākṣavadhēna ca |
babhūva dviguṇaṁ kruddhō rāvaṇō rākṣasādhipaḥ || 2 ||
prakṣīṇaṁ tu balaṁ dr̥ṣṭvā vadhyamānaṁ valīmukhaiḥ |
babhūvāsya vyathā yuddhē prēkṣya daivaviparyayam || 3 ||
uvāca ca samīpasthaṁ mahōdaramarindamam |
asminkālē mahābāhō jayāśā tvayi mē sthitā || 4 ||
jahi śatrucamūṁ vīra darśayādya parākramam |
bhartr̥piṇḍasya kālō:’yaṁ nirdēṣṭuṁ sādhu yudhyatām || 5 ||
ēvamuktastathētyuktvā rākṣasēndrō mahōdaraḥ |
pravivēśārisēnāṁ tāṁ pataṅga iva pāvakam || 6 ||
tataḥ sa kadanaṁ cakrē vānarāṇāṁ mahābalaḥ |
bhartr̥vākyēna tējasvī svēna vīryēṇa cōditaḥ || 7 ||
vānarāśca mahāsattvāḥ pragr̥hya vipulāḥ śilāḥ |
praviśyāribalaṁ bhīmaṁ jaghnustē rajanīcarān || 8 ||
mahōdarastu saṅkruddhaḥ śaraiḥ kāñcanabhūṣaṇaiḥ |
cicchēda pāṇipādōrūnvānarāṇāṁ mahāhavē || 9 ||
tatastē vānarāḥ sarvē rākṣasairarditā bhr̥śam |
diśō daśa drutāḥ kēcitkēcitsugrīvamāśritāḥ || 10 ||
prabhagnāṁ samarē dr̥ṣṭvā vānarāṇāṁ mahācamūm |
abhidudrāva sugrīvō mahōdaramanantaram || 11 ||
pragr̥hya vipulāṁ ghōrāṁ mahīdharasamāṁ śilām |
cikṣēpa ca mahātējāstadvadhāya harīśvaraḥ || 12 ||
tāmāpatantīṁ sahasā śilāṁ dr̥ṣṭvā mahōdaraḥ |
asambhrāntastatō bāṇairnirbibhēda durāsadām || 13 ||
rakṣasā tēna bāṇaughairnikr̥ttā sā sahasradhā |
nipapāta śilā bhūmau gr̥dhracakramivākulam || 14 ||
tāṁ tu bhinnāṁ śilāṁ dr̥ṣṭvā sugrīvaḥ krōdhamūrchitaḥ |
sālamutpāṭya cikṣēpa rākṣasē raṇamūrdhani || 15 ||
śaraiśca vidadārainaṁ śūraḥ parapurañjayaḥ |
sa dadarśa tataḥ kruddhaḥ parighaṁ patitaṁ bhuvi || 16 ||
āvidhya tu sa taṁ dīptaṁ parighaṁ tasya darśayan |
parighāgrēṇa vēgēna jaghānāsya hayōttamān || 17 ||
tasmāddhatahayādvīraḥ sōvaplutya mahārathāt |
gadāṁ jagrāha saṅkruddhō rākṣasō:’tha mahōdaraḥ || 18 ||
gadāparighahastau tau yudhi vīrau samīyatuḥ |
nardantau gauvr̥ṣaprakhyau ghanāviva savidyutau || 19 ||
tataḥ kruddhō gadāṁ tasmai cikṣēpa rajanīcaraḥ |
jvalantīṁ bhāskarābhāsāṁ sugrīvāya mahōdaraḥ || 20 ||
gadāṁ tāṁ sumahāghōrāmāpatantīṁ mahābalaḥ |
sugrīvō rōṣatāmrākṣaḥ samudyamya mahāhavē || 21 ||
ājaghāna gadāṁ tasya parighēṇa harīśvaraḥ |
papāta sa gadōdbhinnaḥ parighastasya bhūtalē || 22 ||
tatō jagrāha tējasvī sugrīvō vasudhātalāt |
āyasaṁ musalaṁ ghōraṁ sarvatō hēmabhūṣitam || 23 ||
sa tamudyamya cikṣēpa sō:’pyanyāṁ vyākṣipadgadām |
bhinnāvanyōnyamāsādya pētaturdharaṇītalē || 24 ||
tatō bhagnapraharaṇau muṣṭibhyāṁ tau samīyatuḥ |
tējōbalasamāviṣṭau dīptāviva hutāśanau || 25 ||
jaghnatustau tadā:’nyōnyaṁ nēdatuśca punaḥ punaḥ |
talaiścānyōnyamāhatya pētaturdharaṇītalē || 26 ||
utpētatustatastūrṇaṁ jaghnatuśca parasparam |
bhujaiścikṣipaturvīrāvanyōnyamaparājitau || 27 ||
jagmatustau śramaṁ vīrau bāhuyuddhē parantapau |
ājahāra tataḥ khaḍgamadūraparivartinam || 28 ||
rākṣasaścarmaṇā sārdhaṁ mahāvēgō mahōdaraḥ |
tathaiva ca mahākhaḍgaṁ carmaṇā patitaṁ saha || 29 ||
jagrāha vānaraśrēṣṭhaḥ sugrīvō vēgavattaraḥ |
tau tu rōṣaparītāṅgau nardantāvabhyadhāvatām || 30 ||
udyatāsī raṇē hr̥ṣṭau yudhi śastraviśāradau |
dakṣiṇaṁ maṇḍalaṁ cōbhau sutūrṇaṁ samparīyatuḥ || 31 ||
anyōnyamabhisaṅkruddhau jayē praṇihitāvubhau |
sa tu śūrō mahāvēgō vīryaślāghī mahōdaraḥ || 32 ||
mahācarmaṇi taṁ khaḍgaṁ pātayāmāsa durmatiḥ |
lagnamutkarṣataḥ khaḍgaṁ khaḍgēna kapikuñjaraḥ || 33 ||
jahāra saśirastrāṇaṁ kuṇḍalōpahitaṁ śiraḥ |
nikr̥ttaśirasastasya patitasya mahītalē || 34 ||
tadbalaṁ rākṣasēndrasya dr̥ṣṭvā tatra na tiṣṭhatē |
hatvā taṁ vānaraiḥ sārdhaṁ nanāda muditō hariḥ |
cukrōdha ca daśagrīvō babhau hr̥ṣṭaśca rāghavaḥ || 35 ||
viṣaṇṇavadanāḥ sarvē rākṣasā dīnacētasaḥ |
vidravanti tataḥ sarvē bhayavitrastacētasaḥ || 36 ||
mahōdaraṁ taṁ vinipātya bhūmau
mahāgirēḥ kīrṇamivaikadēśam |
sūryātmajastatra rarāja lakṣmyā
sūryaḥ svatējōbhirivāpradhr̥ṣyaḥ || 37 ||
atha vijayamavāpya vānarēndraḥ
samaramukhē surayakṣasiddhasaṅghaiḥ |
avanitalagataiśca bhūtasaṅghaiḥ
harūṣasamākulitaiḥ stutō mahātmā || 38 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē aṣṭanavatitamaḥ sargaḥ || 98 ||
yuddhakāṇḍa ēkōnaśatatamaḥ sargaḥ (99) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
