Read in తెలుగు / ಕನ್ನಡ / தமிழ் / देवनागरी / English (IAST)
|| kumbhakarṇaprabōdhaḥ ||
sa praviśya purīṁ laṅkāṁ rāmabāṇabhayārditaḥ |
bhagnadarpastadā rājā babhūva vyathitēndriyaḥ || 1 ||
mātaṅga iva siṁhēna garuḍēnēva pannagaḥ |
abhibhūtō:’bhavadrājā rāghavēṇa mahātmanā || 2 ||
brahmadaṇḍaprakāśānāṁ vidyutsadr̥śavarcasām |
smaranrāghavabāṇānāṁ vivyathē rākṣasēśvaraḥ || 3 ||
sa kāñcanamayaṁ divyamāśritya paramāsanam |
viprēkṣamāṇō rakṣāṁsi rāvaṇō vākyamabravīt || 4 ||
sarvaṁ tatkhalu mē mōghaṁ yattaptaṁ paramaṁ tapaḥ |
yatsamānō mahēndrēṇa mānuṣēṇāsmi nirjitaḥ || 5 ||
idaṁ tadbrahmaṇō ghōraṁ vākyaṁ māmabhyupasthitam |
mānuṣēbhyō vijānīhi bhayaṁ tvamiti tattathā || 6 ||
dēvadānavagandharvairyakṣarākṣasapannagaiḥ |
avadhyatvaṁ mayā prāptaṁ mānuṣēbhyō na yācitam || 7 ||
tamimaṁ mānuṣaṁ manyē rāmaṁ daśarathātmajam | [viditaṁ]
ikṣvākukulanāthēna anaraṇyēna yatpurā || 8 ||
utpatsyatē hi madvaṁśē puruṣō rākṣasādhama |
yastvāṁ saputraṁ sāmātyaṁ sabalaṁ sāśvasārathim || 9 ||
nihaniṣyati saṅgrāmē tvāṁ kulādhama durmatē |
śaptō:’haṁ vēdavatyā ca yadā sā dharṣitā purā || 10 ||
sēyaṁ sītā mahābhāgā jātā janakanandinī |
umā nandīśvaraścāpi rambhā varuṇakanyakā || 11 ||
yathōktāstapasā prāptaṁ na mithyā r̥ṣibhāṣitam |
ētadēvābhyupāgamya yatnaṁ kartumihārhatha || 12 ||
rākṣasāścāpi tiṣṭhantu caryāgōpuramūrdhasu |
sa cāpratimagambhīrō dēvadānavadarpahā || 13 ||
brahmaśāpābhibhūtastu kumbhakarṇō vibōdhyatām |
sa parājitamātmānaṁ prahastaṁ ca niṣūditam || 14 ||
jñātvā rakṣōbalaṁ bhīmamādidēśa mahābalaḥ |
dvārēṣu yatnaḥ kriyatāṁ prākāraścādhiruhyatām || 15 ||
nidrāvaśasamāviṣṭaḥ kumbhakarṇō vibōdhyatām |
sukhaṁ svapiti niścintaḥ kālōpahatacētanaḥ || 16 ||
nava ṣaṭ sapta cāṣṭau ca māsān svapiti rākṣasaḥ |
mantrayitvā prasuptō:’yamitastu navamē:’hani || 17 ||
taṁ tu bōdhayata kṣipraṁ kumbhakarṇaṁ mahābalam |
sa tu saṅkhyē mahābāhuḥ kakudaḥ sarvarakṣasām || 18 ||
vānarānrājaputrau ca kṣipramēva vadhiṣyati |
ēṣa kētuḥ paraḥ saṅkhyē mukhyō vai sarvarakṣasām || 19 ||
kumbhakarṇaḥ sadā śētē mūḍhō grāmyasukhē rataḥ |
rāmēṇa hi nirastasya saṅgrāmēsminsudāruṇē || 20 ||
bhaviṣyati na mē śōkaḥ kumbhakarṇē vibōdhitē |
kiṁ kariṣyāmyahaṁ tēna śakratulyabalēna hi || 21 ||
īdr̥śē vyasanē prāptē yō na sāhyāya kalpatē |
tē tu tadvacanaṁ śrutvā rākṣasēndrasya rākṣasāḥ || 22 ||
jagmuḥ paramasambhrāntāḥ kumbhakarṇanivēśanam |
tē rāvaṇa samādiṣṭā māṁsaśōṇitabhōjanāḥ || 23 ||
gandhamālyāṁstathā bhakṣyānādāya sahasā yayuḥ |
tāṁ praviśya mahādvārāṁ sarvatō yōjanāyatām || 24 ||
kumbhakarṇaguhāṁ ramyāṁ sarvagandhapravāhinīm |
kumbhakarṇasya niḥśvāsādavadhūtā mahābalāḥ || 25 ||
pratiṣṭhamānaḥ kr̥cchrēṇa yatnātpraviviśurguhām |
tāṁ praviśya guhāṁ ramyāṁ śubhāṁ kāñcanakuṭ-ṭimām || 26 ||
dadr̥śurnairr̥tavyāghraṁ śayānaṁ bhīmadarśanam |
tē tu taṁ vikr̥taṁ suptaṁ vikīrṇamiva parvatam || 27 ||
kumbhakarṇaṁ mahānidraṁ sahitāḥ pratyabōdhayan |
ūrdhvarōmāñcitatanuṁ śvasantamiva pannagam || 28 ||
trāsayantaṁ mahāśvāsaiḥ śayānaṁ bhīmadarśanam |
bhīmanāsāpuṭaṁ taṁ tu pātālavipulānanam || 29 ||
śayyāyāṁ nyastasarvāṅgaṁ mēdōrudhiragandhinam |
kāñcanāṅgadanaddhāṅgaṁ kirīṭinamarindamam || 30 ||
dadr̥śurnairr̥tavyāghraṁ kumbhakarṇaṁ mahābalam |
tataścakrurmahātmānaḥ kumbhakarṇāgratastadā || 31 ||
māṁsānāṁ mērusaṅkāśaṁ rāśiṁ paramatarpaṇam |
mr̥gāṇāṁ mahiṣāṇāṁ ca varāhāṇāṁ ca sañcayān || 32 ||
cakrurnairr̥taśārdūlā rāśimannasya cādbhutam |
tataḥ śōṇitakumbhāṁśca madyāni vividhāni ca || 33 ||
purastātkumbhakarṇasya cakrustridaśaśatravaḥ |
lilipuśca parārdhyēna candanēna parantapam || 34 ||
divyairācchādayāmāsurmālyairgandhaiḥ sugandhibhiḥ |
dhūpaṁ sugandhaṁ sasr̥justuṣṭuvuśca parantapam || 35 ||
jaladā iva cōnnēduryātudhānāstatastataḥ |
śaṅkhānāpūrayāmāsuḥ śaśāṅkasadr̥śaprabhān || 36 ||
tumulaṁ yugapaccāpi vinēduścāpyamarṣitāḥ |
nēdurāsphōṭayāmāsuścikṣipustē niśācarāḥ |
kumbhakarṇavibōdhārthaṁ cakrustē vipulaṁ svanam || 37 ||
saśaṅkhabhērīpaṇavapraṇāda-
-māsphōṭitakṣvēlitasiṁhanādam |
diśō dravantastridivaṁ kirantaḥ
śrutvā vihaṅgāḥ sahasā nipētuḥ || 38 ||
yadā bhr̥śaṁ tairninadairmahātmā
na kumbhakarṇō bubudhē prasuptaḥ |
tatō musuṇṭhīrmusalāni sarvē
rakṣōgaṇāstē jagr̥hurgadāśca || 39 ||
taṁ śailaśr̥ṅgairmusalairgadābhi-
-rvr̥kṣaistalairmudgaramuṣṭibhiśca |
sukhaprasuptaṁ bhuvi kumbhakarṇaṁ
rakṣāṁsyudagrāṇi tadā nijaghnuḥ || 40 ||
tasya niḥśvāsavātēna kumbhakarṇasya rakṣasaḥ |
rākṣasā balavantō:’pi sthātuṁ nāśaknuvanpuraḥ || 41 ||
tataḥ parihitā gāḍhaṁ rākṣasā bhīmavikramāḥ |
mr̥daṅgapaṇavānbhērīḥ śaṅkhakumbhagaṇāṁstadā || 42 ||
daśarākṣasasāhasrā yugapatparyavādayan |
nīlāñjanacayākārāstē tu taṁ pratyabōdhayan || 43 ||
abhighnantō nadantaśca naiva saṁvividē tu saḥ |
yadā cainaṁ na śēkustē pratibōdhayituṁ tadā || 44 ||
tatō gurutaraṁ yatnaṁ dāruṇaṁ samupākraman |
aśvānuṣṭrānkharānnāgān jaghnurdaṇḍakaśāṅkuśaiḥ || 45 ||
bhērīśaṅkhamr̥daṅgāṁśca sarvaprāṇairavādayan |
nijaghnuścāsya gātrāṇi mahākāṣṭhakaṭaṅkaraiḥ || 46 ||
mudgarairmusalaiścaiva sarvaprāṇasamudyataiḥ |
tēna śabdēna mahatā laṅkā samabhipūritā || 47 ||
saparvatavanā sarvā sō:’pi naiva prabudhyatē |
tataḥ sahasraṁ bhērīṇāṁ yugapatsamahanyata || 48 ||
mr̥ṣṭakāñcanakōṇānāmāsaktānāṁ samantataḥ |
ēvamapyatinidrastu yadā naiva prabudhyatē || 49 ||
śāpasya vaśamāpannastataḥ kruddhā niśācarāḥ |
mahākrōdhasamāviṣṭāḥ sarvē bhīmaparākramāḥ || 50 ||
tadrakṣō bōdhayiṣyantaścakruranyē parākramam |
anyē bhērīḥ samājaghnuranyē cakrurmahāsvanam || 51 ||
kēśānanyē pralulupuḥ karṇāvanyē daśanti ca |
udakumbhaśatānyanyē samasiñcanta karṇayōḥ || 52 ||
na kumbhakarṇaḥ paspandē mahānidrāvaśaṁ gataḥ |
anyē ca balinastasya kūṭamudgarapāṇayaḥ || 53 ||
mūrdhni vakṣasi gātrēṣu pātayankūṭamudgarān |
rajjubandhanabaddhābhiḥ śataghnībhiśca sarvataḥ || 54 ||
vadhyamānō mahākāyō na prābudhyata rākṣasaḥ |
vāraṇānāṁ sahasraṁ tu śarīrē:’sya pradhāvitam |
kumbhakarṇastatō buddhaḥ sparśaṁ paramabudhyata || 55 ||
sa pātyamānairgiriśr̥ṅgavr̥kṣai-
-racintayaṁstānvipulānprahārān |
nidrākṣayāt kṣudbhayapīḍitaśca
vijr̥mbhamāṇaḥ sahasōtpapāta || 56 ||
sa nāgabhōgācalaśr̥ṅgakalpau
vikṣipya bāhū giriśr̥ṅgasārau |
vivr̥tya vaktraṁ baḍabāmukhābhaṁ
niśācarō:’sau vikr̥taṁ jajr̥mbhē || 57 ||
tasya jājr̥mbhamāṇasya vaktraṁ pātālasannibham |
dadr̥śē mēruśr̥ṅgāgrē divākara ivōditaḥ || 58 ||
sa jr̥mbhamāṇō:’tibalaḥ pratibuddhō niśācaraḥ |
niḥśvāsaścāsya sañjajñē parvatādiva mārutaḥ || 59 ||
rūpamuttiṣṭhatastasya kumbhakarṇasya tadbabhau |
tapāntē sabalākasya mēghasyēva vivarṣataḥ || 60 ||
tasya dīptāgnisadr̥śē vidyutsadr̥śavarcasī |
dadr̥śātē mahānētrē dīptāviva mahāgrahau || 61 ||
tatastvadarśayansarvānbhakṣyāṁśca vividhānbahūn |
varāhānmahiṣāṁścaiva sa babhakṣa mahābalaḥ || 62 ||
adanbubhukṣitō māṁsaṁ śōṇitaṁ tr̥ṣitaḥ piban |
mēdaḥ kumbhāṁśca madyaṁ ca papau śakraripustadā || 63 ||
tatastr̥pta iti jñātvā samutpēturniśācarāḥ |
śirōbhiśca praṇamyainaṁ sarvataḥ paryavārayan || 64 ||
nidrāviśadanētrastu kaluṣīkr̥talōcanaḥ |
cārayansarvatō dr̥ṣṭiṁ tāndadarśa niśācarān || 65 ||
sa sarvānsāntvayāmāsa nairr̥tānnairr̥tarṣabhaḥ |
bōdhanādvismitaścāpi rākṣasānidamabravīt || 66 ||
kimarthamahamādr̥tya bhavadbhiḥ pratibōdhitaḥ |
kaccitsukuśalaṁ rājñō bhayavānēṣa vā na kim || 67 ||
athavā dhruvamanyēbhyō bhayaṁ paramupasthitam |
yadarthamēvaṁ tvaritairbhavadbhiḥ pratibōdhitaḥ || 68 ||
adya rākṣasarājasya bhayamutpāṭayāmyaham |
pātayiṣyē mahēndraṁ vā śātayiṣyē tathā:’nalam || 69 ||
na hyalpakāraṇē suptaṁ bōdhayiṣyati māṁ guruḥ |
tadākhyātārthatattvēna matprabōdhanakāraṇam || 70 ||
ēvaṁ bruvāṇaṁ saṁrabdhaṁ kumbhakarṇaṁ mahābalam |
yūpākṣaḥ sacivō rājñaḥ kr̥tāñjaliruvāca ha || 71 ||
na nō daivakr̥taṁ kiñcidbhayamasti kadācana |
mānuṣānnō bhayaṁ rājaṁstumulaṁ samprabādhatē || 72 ||
na daityadānavēbhyō vā bhayamasti hi tādr̥śam |
yādr̥śaṁ mānuṣaṁ rājanbhayamasmānupasthitam || 73 ||
vānaraiḥ parvatākārairlaṅkēyaṁ parivāritā |
sītāharaṇasantaptādrāmānnastumulaṁ bhayam || 74 ||
ēkēna vānarēṇēyaṁ pūrvaṁ dagdhā mahāpurī |
kumārō nihataścākṣaḥ sānuyātraḥ sakuñjaraḥ || 75 ||
svayaṁ rakṣōdhipaścāpi paulastyō dēvakaṇṭakaḥ |
mr̥tēti samyugē muktō rāmēṇādityatējasā || 76 ||
yanna dēvaiḥ kr̥tō rājā nāpi daityairna dānavaiḥ |
kr̥taḥ sa iha rāmēṇa vimuktaḥ prāṇasaṁśayāt || 77 ||
sa yūpākṣavacaḥ śrutvā bhrāturyudhi parājayam |
kumbhakarṇō vivr̥ttākṣō yūpākṣamidamabravīt || 78 ||
sarvamadyaiva yūpākṣa harisainyaṁ salakṣmaṇam |
rāghavaṁ ca raṇē hatvā paścāddrakṣyāmi rāvaṇam || 79 ||
rākṣasāṁstarpayiṣyāmi harīṇāṁ māṁsaśōṇitaiḥ |
rāmalakṣmaṇayōścāpi svayaṁ pāsyāmi śōṇitam || 80 ||
tattasya vākyaṁ bruvatō niśamya
sagarvitaṁ rōṣavivr̥ddhadōṣam |
mahōdarō nairr̥tayōdhamukhyaḥ
kr̥tāñjalirvākyamidaṁ babhāṣē || 81 ||
rāvaṇasya vacaḥ śrutvā guṇadōṣau vimr̥śya ca |
paścādapi mahābāhō śatrūnyudhi vijēṣyasi || 82 ||
mahōdaravacaḥ śrutvā rākṣasaiḥ parivāritaḥ |
kumbhakarṇō mahātējāḥ sampratasthē mahābalaḥ || 83 ||
taṁ samutthāpya bhīmākṣaṁ bhīmarūpaparākramam |
rākṣasāstvaritā jagmurdaśagrīvanivēśanam || 84 ||
tatō gatvā daśagrīvamāsīnaṁ paramāsanē |
ūcurbaddhāñjalipuṭāḥ sarva ēva niśācarāḥ || 85 ||
prabuddhaḥ kumbhakarṇō:’yaṁ bhrātā tē rākṣasarṣabha |
kathaṁ tatraiva niryātu drakṣyasyēnamihāgatam || 86 ||
rāvaṇastvabravīddhr̥ṣṭō rākṣasāṁstānupasthitān |
draṣṭumēnamihēcchāmi yathānyāyaṁ ca pūjyatām || 87 ||
tathētyuktvā tu tē sarvē punarāgamya rākṣasāḥ |
kumbhakarṇamidaṁ vākyamūcū rāvaṇacōditāḥ || 88 ||
draṣṭuṁ tvāṁ kāṅkṣatē rājā sarvarākṣasapuṅgavaḥ |
gamanē kriyatāṁ buddhirbhrātaraṁ sampraharṣaya || 89 ||
kumbhakarṇastu durdharṣō bhrāturājñāya śāsanam |
tathētyuktvā mahābāhuḥ śayanādutpapāta ha || 90 ||
prakṣālya vadanaṁ hr̥ṣṭaḥ snātaḥ paramabhūṣitaḥ |
pipāsustvarayāmāsa pānaṁ balasamīraṇam || 91 ||
tatastē tvaritāstasya rākṣasā rāvaṇājñayā |
madyakumbhāṁśca vividhān kṣipramēvōpahārayan || 92 ||
pītvā ghaṭasahasrē dvē gamanāyōpacakramē |
īṣatsamutkaṭō mattastējōbalasamanvitaḥ || 93 ||
kumbhakarṇō babhau hr̥ṣṭaḥ kālāntakayamōpamaḥ |
bhrātuḥ sa bhavanaṁ gacchanrakṣōgaṇasamanvitaḥ |
kumbhakarṇaḥ padanyāsairakampayata mēdinīm || 94 ||
sa rājamārgaṁ vapuṣā prakāśayan
sahasraraśmirdharaṇīmivāṁśubhiḥ |
jagāma tatrāñjalimālayā vr̥taḥ
śatakraturgēhamiva svayambhuvaḥ || 95 ||
taṁ rājamārgasthamamitraghātinaṁ
vanaukasastē sahasā bahiḥ sthitāḥ |
dr̥ṣṭvāpramēyaṁ giriśr̥ṅgakalpaṁ
vitatrasustē hariyūthapālāḥ || 96 ||
kēciccharaṇyaṁ śaraṇaṁ sma rāmaṁ
vrajanti kēcidvyathitāḥ patanti |
kēciddiśaḥ sma vyathitāḥ prayānti
kēcidbhayārtā bhuvi śēratē sma || 97 ||
tamadriśr̥ṅgapratimaṁ kirīṭinaṁ
spr̥śantamādityamivātmatējasā |
vanaukasaḥ prēkṣya vivr̥ddhamadbhutaṁ
bhayārditā dudruvirē tatastataḥ || 98 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē ṣaṣṭitamaḥ sargaḥ || 60 ||
yuddhakāṇḍa ēkaṣaṣṭitamaḥ sargaḥ (61) >>
See vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
