Read in తెలుగు / ಕನ್ನಡ / தமிழ் / देवनागरी / English (IAST)
|| kumbhakarṇavr̥ttakathanam ||
tatō rāmō mahātējā dhanurādāya vīryavān |
kirīṭinaṁ mahākāyaṁ kumbhakarṇaṁ dadarśa ha || 1 ||
taṁ dr̥ṣṭvā rākṣasaśrēṣṭhaṁ parvatākāradarśanam |
kramamāṇamivākāśaṁ purā nārāyaṇaṁ prabhum || 2 ||
satōyāmbudasaṅkāśaṁ kāñcanāṅgadabhūṣaṇam |
dr̥ṣṭvā punaḥ pradudrāva vānarāṇāṁ mahācamūḥ || 3 ||
vidrutāṁ vāhinīṁ dr̥ṣṭvā vardhamānaṁ ca rākṣasam |
savismayamidaṁ rāmō vibhīṣaṇamuvāca ha || 4 ||
kō:’sau parvatasaṅkāśaḥ kirīṭī harilōcanaḥ |
laṅkāyāṁ dr̥śyatē vīra savidyudiva tōyadaḥ || 5 ||
pr̥thivyāḥ kētubhūtō:’sau mahānēkō:’tra dr̥śyatē |
yaṁ dr̥ṣṭvā vānarāḥ sarvē vidravanti tatastataḥ || 6 ||
ācakṣva mē mahānkō:’sau rakṣō vā yadi vā:’suraḥ |
na mayaivaṁvidhaṁ bhūtaṁ dr̥ṣṭapūrvaṁ kadācana || 7 ||
sa pr̥ṣṭō rājaputrēṇa rāmēṇākliṣṭakarmaṇā |
vibhīṣaṇō mahāprājñaḥ kākutsthamidamabravīt || 8 ||
yēna vaivasvatō yuddhē vāsavaśca parājitaḥ |
saiṣa viśravasaḥ putraḥ kumbhakarṇaḥ pratāpavān |
asya pramāṇātsadr̥śō rākṣasō:’nyō na vidyatē || 9 ||
ētēna dēvā yudhi dānavāśca
yakṣā bhujaṅgāḥ piśitāśanāśca |
gandharvavidyādharakinnarāśca
sahasraśō rāghava samprabhagnāḥ || 10 ||
śūlapāṇiṁ virūpākṣaṁ kumbhakarṇaṁ mahābalam |
hantuṁ na śēkustridaśāḥ kālō:’yamiti mōhitāḥ || 11 ||
prakr̥tyā hyēṣa tējasvī kumbhakarṇō mahābalaḥ |
anyēṣāṁ rākṣasēndrāṇāṁ varadānakr̥taṁ balam || 12 ||
ētēna jātamātrēṇa kṣudhārtēna mahātmanā |
bhakṣitāni sahasrāṇi sattvānāṁ subahūnyapi || 13 ||
tēṣu sambhakṣyamāṇēṣu prajā bhayanipīḍitāḥ |
yāntisma śaraṇaṁ śakraṁ tamapyarthaṁ nyavēdayan || 14 ||
sa kumbhakarṇaṁ kupitō mahēndrō
jaghāna vajrēṇa śitēna vajrī |
sa śakravajrābhihatō mahātmā
cacāla kōpācca bhr̥śaṁ nanāda || 15 ||
tasya nānadyamānasya kumbhakarṇasya dhīmataḥ |
śrutvā:’tinādaṁ vitrastā bhūyō bhūmirvitatrasē || 16 ||
tatra kōpānmahēndrasya kumbhakarṇō mahābalaḥ |
vikr̥ṣyairāvatāddantaṁ jaghānōrasi vāsavam || 17 ||
kumbhakarṇaprahārārtō vijajvāla sa vāsavaḥ |
tatō viṣēduḥ sahasā dēvabrahmarṣidānavāḥ || 18 ||
prajābhiḥ saha śakraśca yayau sthānaṁ svayambhuvaḥ |
kumbhakarṇasya daurātmyaṁ śaśaṁsustē prajāpatēḥ || 19 ||
prajānāṁ bhakṣaṇaṁ cāpi dēvānāṁ cāpi dharṣaṇam |
āśramadhvaṁsanaṁ cāpi parastrīharaṇaṁ bhr̥śam || 20 ||
ēvaṁ prajā yadi tvēṣa bhakṣayiṣyati nityaśaḥ |
acirēṇaiva kālēna śūnyō lōkō bhaviṣyati || 21 ||
vāsavasya vacaḥ śrutvā sarvalōkapitāmahaḥ |
rakṣāṁsyāvāhayāmāsa kumbhakarṇaṁ dadarśa ha || 22 ||
kumbhakarṇaṁ samīkṣyaiva vitatrāsa prajāpatiḥ |
dr̥ṣṭvā viśvāsya caivēdaṁ svayambhūridamabravīt || 23 ||
dhruvaṁ lōkavināśāya paulastyēnāsi nirmitaḥ |
tasmāttvamadyaprabhr̥ti mr̥takalpaḥ śayiṣyasē || 24 ||
brahmaśāpābhibhūtō:’tha nipapātāgrataḥ prabhōḥ |
tataḥ paramasambhrāntō rāvaṇō vākyamabravīt || 25 ||
vivr̥ddhaḥ kāñcanō vr̥kṣaḥ phalakālē nikr̥tyatē |
na naptāraṁ svakaṁ nyāyyaṁ śaptumēvaṁ prajāpatē || 26 ||
na mithyāvacanaśca tvaṁ svapsyatyēṣa na saṁśayaḥ |
kālastu kriyatāmasya śayanē jāgarē tathā || 27 ||
rāvaṇasya vacaḥ śrutvā svayambhūridamabravīt || 28 ||
śayitā hyēṣa ṣaṇmāsānēkāhaṁ jāgariṣyati |
ēkēnāhnā tvasau vīraścaranbhūmiṁ bubhukṣitaḥ |
vyāttāsyō bhakṣayēllōkānsaṅkruddha iva pāvakaḥ || 29 ||
sō:’sau vyasanamāpannaḥ kumbhakarṇamabōdhayat |
tvatparākramabhītaśca rājā samprati rāvaṇaḥ || 30 ||
sa ēṣa nirgatō vīraḥ śibirādbhīmavikramaḥ |
vānarānbhr̥śasaṅkruddhō bhakṣayanparidhāvati || 31 ||
kumbhakarṇaṁ samīkṣyaiva harayō:’dya pravidrutāḥ |
kathamēnaṁ raṇē kruddhaṁ vārayiṣyanti vānarāḥ || 32 ||
ucyantāṁ vānarāḥ sarvē yantramētatsamucchritam |
iti vijñāya harayō bhaviṣyantīha nirbhayāḥ || 33 ||
vibhīṣaṇavacaḥ śrutvā hētumatsumukhēritam |
uvāca rāghavō vākyaṁ nīlaṁ sēnāpatiṁ tadā || 34 ||
gaccha sainyāni sarvāṇi vyūhya tiṣṭhasva pāvakē |
dvārāṇyādāya laṅkāyāścaryāścāpyatha saṅkramān || 35 ||
śailaśr̥ṅgāṇi vr̥kṣāṁśca śilāścāpyupasaṁhara |
tiṣṭhantu vānarāḥ sarvē sāyudhāḥ śailapāṇayaḥ || 36 ||
rāghavēṇa samādiṣṭō nīlō haricamūpatiḥ |
śaśāsa vānarānīkaṁ yathāvatkapikuñjaraḥ || 37 ||
tatō gavākṣaḥ śarabhō hanumānaṅgadastadā |
śailaśr̥ṅgāṇi śailābhā gr̥hītvā dvāramabhyayuḥ || 38 ||
rāmavākyamupaśrutya harayō jitakāśinaḥ |
pādapairardayanvīrā vānarāḥ paravāhinīm || 39 ||
tatō harīṇāṁ tadanīkamugraṁ
rarāja śailōdyatadīptahastam |
girēḥ samīpānugataṁ yathaiva
mahanmahāmbhōdharajālamugram || 40 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē ēkaṣaṣṭitamaḥ sargaḥ || 61 ||
yuddhakāṇḍa dviṣaṣṭitamaḥ sargaḥ (62) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: శరన్నవరాత్రుల సందర్భంగా "శ్రీ లలితా స్తోత్రనిధి" మరియు "శ్రీ దుర్గా స్తోత్రనిధి" పుస్తకములు కొనుగోలుకు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
