Read in తెలుగు / ಕನ್ನಡ / தமிழ் / देवनागरी / English (IAST)
|| aindrarathakētupātanam ||
lakṣmaṇēna tu tadvākyamuktaṁ śrutvā sa rāghavaḥ |
sandadhē paravīraghnō dhanurādāya vīryavān || 1 ||
rāvaṇāya śarānghōrānvisasarja camūmukhē |
athānyaṁ rathamāruhya rāvaṇō rākṣasādhipaḥ || 2 ||
abhyadravata kākutsthaṁ svarbhānuriva bhāskaram |
daśagrīvō rathasthastu rāmaṁ vajrōpamaiḥ śaraiḥ || 3 ||
ājaghāna mahāghōrairdhārābhiriva tōyadaḥ |
dīptapāvakasaṅkāśaiḥ śaraiḥ kāñcanabhūṣaṇaiḥ || 4 ||
nirbibhēda raṇē rāmō daśagrīvaṁ samāhitam |
bhūmau sthitasya rāmasya rathasthasya ca rakṣasaḥ || 5 ||
na samaṁ yuddhamityāhurdēvagandharvadānavāḥ |
tataḥ kāñcanacitrāṅgaḥ kiṅkiṇīśatabhūṣitaḥ || 6 ||
taruṇādityasaṅkāśō vaiḍūryamayakūbaraḥ |
sadaśvaiḥ kāñcanāpīḍairyuktaḥ śvētaprakīrṇakaiḥ || 7 ||
haribhiḥ sūryasaṅkāśairhēmajālavibhūṣitaiḥ |
rukmavēṇudhvajaḥ śrīmān dēvarājarathō varaḥ || 8 ||
dēvarājēna sandiṣṭō rathamāruhya mātaliḥ |
abhyavartata kākutsthamavatīrya triviṣṭapāt || 9 ||
abravīcca tadā rāmaṁ sapratōdō rathē sthitaḥ |
prāñjalirmātalirvākyaṁ sahasrākṣasya sārathiḥ || 10 ||
sahasrākṣēṇa kākutstha rathō:’yaṁ vijayāya tē |
dattastava mahāsattva śrīmān śatrunibarhaṇa || 11 ||
idamaindraṁ mahaccāpaṁ kavacaṁ cāgnisannibham |
śarāścādityasaṅkāśāḥ śaktiśca vimalā śitā || 12 ||
āruhyēmaṁ rathaṁ vīra rākṣasaṁ jahi rāvaṇam |
mayā sārathinā rājanmahēndra iva dānavān || 13 ||
ityuktaḥ samparikramya rathaṁ samabhivādya ca |
ārurōha tadā rāmō lōkām̐llakṣmyā virājayan || 14 ||
tadbabhūvādbhutaṁ yuddhaṁ tumulaṁ rōmaharṣaṇam |
rāmasya ca mahābāhō rāvaṇasya ca rakṣasaḥ || 15 ||
sa gāndharvēṇa gāndharvaṁ daivaṁ daivēna rāghavaḥ |
astraṁ rākṣasarājasya jaghāna paramāstravit || 16 ||
astraṁ tu paramaṁ ghōraṁ rākṣasaṁ rākṣasādhipaḥ |
sasarja paramakruddhaḥ punarēva niśācaraḥ || 17 ||
tē rāvaṇadhanurmuktāḥ śarāḥ kāñcanabhūṣaṇāḥ |
abhyavartanta kākutsthaṁ sarpā bhūtvā mahāviṣāḥ || 18 ||
tē dīptavadanā dīptaṁ vamantō jvalanaṁ mukhaiḥ |
rāmamēvābhyavartanta vyāditāsyā bhayānakāḥ || 19 ||
tairvāsukisamasparśairdīptabhōgairmahāviṣaiḥ |
diśaśca santatāḥ sarvāḥ pradiśaśca samāvr̥tāḥ || 20 ||
tāndr̥ṣṭvā pannagānrāmaḥ samāpatata āhavē |
astraṁ gārutmataṁ ghōraṁ prāduścakē bhayāvaham || 21 ||
tē rāghavaśarā muktā rukmapuṅkhāḥ śikhiprabhāḥ |
suparṇāḥ kāñcanā bhūtvā vicēruḥ sarpaśatravaḥ || 22 ||
tē tānsarvān śarānjaghnuḥ sarparūpānmahājavān |
suparṇarūpā rāmasya viśikhāḥ kāmarūpiṇaḥ || 23 ||
astrē pratihatē kruddhō rāvaṇō rākṣasādhipaḥ |
abhyavarṣattadā rāmaṁ ghōrābhiḥ śaravr̥ṣṭibhiḥ || 24 ||
tataḥ śarasahasrēṇa rāmamakliṣṭakāriṇam |
ardayitvā śaraughēṇa mātaliṁ pratyavidhyata || 25 ||
cicchēda kētumuddiśya śarēṇaikēna rāvaṇaḥ |
pātayitvā rathōpasthē rathātkētuṁ ca kāñcanam || 26 ||
aindrānapi jaghānāśvān śarajālēna rāvaṇaḥ |
taṁ dr̥ṣṭvā sumahatkarma rāvaṇasya durātmanaḥ || 27 ||
viṣēdurdēvagandharvā dānavāścāraṇaiḥ saha |
rāmamārtaṁ tadā dr̥ṣṭvā siddhāśca paramarṣayaḥ || 28 ||
vyathitā vānarēndrāśca babhūvuḥ savibhīṣaṇāḥ |
rāmacandramasaṁ dr̥ṣṭvā grastaṁ rāvaṇarāhuṇā || 29 ||
prājāpatyaṁ ca nakṣatraṁ rōhiṇīṁ śaśinaḥ priyām |
samākramya budhastasthau prajānāmaśubhāvahaḥ || 30 ||
sadhūmaparivr̥ttōrmiḥ prajvalanniva sāgaraḥ |
utpapāta tadā kruddhaḥ spr̥śanniva divākaram || 31 ||
śastravarṇaḥ suparuṣō mandaraśmirdivākaraḥ |
adr̥śyata kabandhāṅkaḥ saṁsaktō dhūmakētunā || 32 ||
kōsalānāṁ ca nakṣatraṁ vyaktamindrāgnidaivatam |
ākramyāṅgārakastasthau viśākhāmapi cāmbarē || 33 ||
daśāsyō viṁśatibhujaḥ pragr̥hītaśarāsanaḥ |
adr̥śyata daśagrīvō maināka iva parvataḥ || 34 ||
nirasyamānō rāmastu daśagrīvēṇa rakṣasā |
nāśaknōdabhisandhātuṁ sāyakānraṇamūrdhani || 35 ||
sa kr̥tvā bhrukuṭiṁ kruddhaḥ kiñcitsaṁraktalōcanaḥ |
jagāma sumahākrōdhaṁ nirdahanniva cakṣuṣā || 36 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē tryuttaraśatatamaḥ sargaḥ || 103 ||
yuddhakāṇḍa dvyuttaraśatatamaḥ sargaḥ (102) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
