Read in తెలుగు / ಕನ್ನಡ / தமிழ் / देवनागरी / English (IAST)
śrīdēvyuvāca |
bhagavan bhāṣitāśēṣasiddhānta karuṇānidhē |
bālātripurasundaryāḥ mantranāmasahasrakam || 1 ||
śrutvā dhārayituṁ dēva mamēcchāvartatē:’dhunā |
kr̥payā kēvalaṁ nātha tanmamākhyātumarhasi || 2 ||
īśvara uvāca |
mantranāmasahasraṁ tē kathayāmi varānanē |
gōpanīyaṁ prayatnēna śr̥ṇu tattvaṁ mahēśvari || 3 ||
asya śrībālātripurasundarī divyasahasranāma stōtramahāmantrasya īśvara r̥ṣiḥ, anuṣṭupchandaḥ, śrībālātripurasundarī dēvatā, aiṁ bījaṁ, sauḥ śaktiḥ, klīṁ kīlakaṁ, mama śrībālātripurasundarī prasādasiddhyarthē sahasranāmastōtra pārāyaṇē viniyōgaḥ ||
karanyāsaḥ –
aiṁ aṅguṣṭhābhyāṁ namaḥ |
klīṁ tarjanībhyāṁ namaḥ |
sauḥ madhyamābhyāṁ namaḥ |
aiṁ anāmikābhyāṁ namaḥ |
klīṁ kaniṣṭhikābhyāṁ namaḥ |
sauḥ karatalakarapr̥ṣṭhābhyāṁ namaḥ |
hr̥dayādinyāsaḥ –
aiṁ hr̥dayāya namaḥ |
klīṁ śirasē svāhā |
sauḥ śikhāyai vaṣaṭ |
aiṁ kavacāya hum |
klīṁ nētratrayāya vauṣaṭ |
sauḥ astrāya phaṭ |
dhyānam |
aiṅkārāsanagarbhitānalaśikhāṁ sauḥ klīṁ kalāṁ bibhratīṁ
sauvarṇāmbaradhāriṇīṁ varasudhādhautāntaraṅgōjjvalām |
vandē pustakapāśasāṅkuśajapasragbhāsurōdyatkarāṁ
tāṁ bālāṁ tripurāṁ bhajē trinayanāṁ ṣaṭcakrasañcāriṇīm ||
lamityādi pañcapūjāṁ kuryāt ||
atha stōtram –
ōṁ subhagā sundarī saumyā suṣumṇā sukhadāyinī |
manōjñā sumanā ramyā śōbhanā lalitā śivā || 1 ||
kāntā kāntimatī kāntiḥ kāmadā kamalālayā |
kalyāṇī kamalā hr̥dyā pēśalā hr̥dayaṅgamā || 2 ||
subhadrākhyātiramaṇī sarvā sādhvī sumaṅgalā |
rāmā bhavyavatī bhavyā kamanīyā:’tikōmalā || 3 ||
śōbhābhirāmā ramaṇī ramaṇīyā ratipriyā |
manōnmanī mahāmāyā mātaṅgī madirāpriyā || 4 ||
mahālakṣmīrmahāśaktirmahāvidyāsvarūpiṇī |
mahēśvarī mahānandā mahānandavidhāyinī || 5 ||
māninī mādhavī mādhvī madarūpā madōtkaṭā |
ānandakandā vijayā viśvēśī viśvarūpiṇī || 6 ||
suprabhā kaumudī śāntā bindunādasvarūpiṇī |
kāmēśvarī kāmakalā kāminī kāmavardhinī || 7 ||
bhēruṇḍā caṇḍikā caṇḍī cāmuṇḍā muṇḍamālinī |
aṇurūpā mahārūpā bhūtēśī bhuvanēśvarī || 8 ||
citrā vicitrā citrāṅgī hēmagarbhasvarūpiṇī |
caitanyarūpiṇī nityā nityānityasvarūpiṇī || 9 ||
hrīṅkārakuṇḍalī dhātrī vidhātrī bhūtasamplavā |
unmādinī mahāmārī suprasannā surārcitā || 10 ||
paramānandaniṣyandā paramārthasvarūpiṇī |
yōgīśvarī yōgamātā haṁsinī kalahaṁsinī || 11 ||
kalā kalāvatī raktā suṣumnāvartmaśālinī |
vindhyādrinilayā sūkṣmā hēmapadmanivāsinī || 12 ||
bālā surūpiṇī māyā varēṇyā varadāyinī |
vidrumābhā viśālākṣī viśiṣṭā viśvanāyikā || 13 ||
vīrēndravandyā viśvātmā viśvā viśvādivardhinī |
viśvōtpattirviśvamāyā viśvārādhyā vikasvarā || 14 ||
madasvinnā madōdbhinnā māninī mānavardhinī |
mālinī mōdinī mānyā madahastā madālayā || 15 ||
madaniṣyandinī mātā madirākṣī madālasā |
madātmikā madāvāsā madhubindukr̥tādharā || 16 ||
mūlabhūtā mahāmūlā mūlādhārasvarūpiṇī |
sindūraraktā raktākṣī trinētrā triguṇātmikā || 17 ||
vaśinī vāśinī vāṇī vāruṇī vāruṇīpriyā |
aruṇā taruṇārkābhā bhāminī vahnivāsinī || 18 ||
siddhā siddhēśvarī siddhiḥ siddhāmbā siddhamātr̥kā |
siddhārthadāyinī vidyā siddhāḍhyā siddhasammatā || 19 ||
vāgbhavā vākpradā vandyā vāṅmayī vādinī parā |
tvaritā satvarā turyā tvarayitrī tvarātmikā || 20 ||
kamalā kamalāvāsā sakalā sarvamaṅgalā |
bhagōdarī bhagaklinnā bhaginī bhagamālinī || 21 ||
bhagapradā bhagānandā bhagēśī bhaganāyikā |
bhagātmikā bhagāvāsā bhagā bhaganipātinī || 22 ||
bhagāvahā bhagārādhyā bhagāḍhyā bhagavāhinī |
bhaganiṣyandinī bhargā bhagābhā bhagagarbhiṇī || 23 ||
bhagādirbhagabhōgādiḥ bhagavēdyā bhagōdbhavā |
bhagamātā bhagakr̥tā bhagaguhyā bhagēśvarī || 24 ||
bhagadēhā bhagāvāsā bhagōdbhēdā bhagālasā |
bhagavidyā bhagaklinnā bhagaliṅgā bhagadravā || 25 ||
sakalā niṣkalā kālī karālī kalabhāṣiṇī |
kamalā haṁsinī kālā karuṇā karuṇāvatī || 26 ||
bhāsvarā bhairavī bhāsā bhadrakālī kulāṅganā |
rasātmikā rasāvāsā rasasyandā rasāvahā || 27 ||
kāmaniṣyandinī kāmyā kāminī kāmadāyinī |
vidyā vidhātrī vividhā viśvadā trividhā vidhā || 28 ||
sarvāṅgā sundarī saumyā lāvaṇyā saridambudhiḥ |
caturāṅgī caturbāhuścaturā cāruhāsinī || 29 ||
mantrā mantramayī mātā maṇipūrasamāśrayā |
mantrātmikā mantramātā mantragamyā sumantrakā || 30 ||
puṣpabāṇā puṣpajaitrī puṣpiṇī puṣpavardhinī |
vajrēśvarī vajrahastā purāṇī puravāsinī || 31 ||
tārā ca taruṇākārā taruṇī tārarūpiṇī |
ikṣucāpā mahāpāśā śubhadā priyavādinī || 32 ||
sarvagā sarvajananī sarvārthā sarvapāvanī |
ātmavidyā mahāvidyā brahmavidyā vivasvatī || 33 ||
śivēśvarī śivārādhyā śivanāthā śivātmikā |
ātmikā jñānanilayā nirbhēdā nirvr̥tipradā || 34 ||
nirvāṇarūpiṇī pūrṇā niyamā niṣkalā prabhā |
śrīphalā śrīpradā śiṣyā śrīmayī śivarūpiṇī || 35 ||
krūrā kuṇḍalinī kubjā kuṭilā kuṭilālakā |
mahōdayā mahārūpā mahī māhī kalāmayī || 36 ||
vaśinī sarvajananī citravāsā vicitrikā |
sūryamaṇḍalamadhyasthā sthirā śaṅkaravallabhā || 37 ||
surabhiḥ sumahaḥ sūryā suṣumṇā sōmabhūṣaṇā |
sudhāpradā sudhādhārā suśrīḥ sampattirūpiṇī || 38 ||
amr̥tā satyasaṅkalpā satyā ṣaḍgranthibhēdinī |
icchāśaktirmahāśaktiḥ kriyāśaktiḥ priyaṅkarī || 39 ||
līlā līlālayā:’:’nandā sūkṣmabōdhasvarūpiṇī |
sakalā rasanā sārā sāragamyā sarasvatī || 40 ||
parā parāyaṇī padmā paraniṣṭhā parāparā |
śrīmatī śrīkarī vyōmnī śivayōniḥ śivēkṣaṇā || 41 ||
nirānandā nirākhyēyā nirdvandvā nirguṇātmikā |
br̥hatī brāhmaṇī brāhmī brahmāṇī brahmarūpiṇī || 42 ||
dhr̥tiḥ smr̥tiḥ śrutirmēdhā śraddhā puṣṭiḥ stutirmatiḥ |
advayā:’:’nandasambōdhā varā saubhāgyarūpiṇī || 43 ||
nirāmayā nirākārā jr̥mbhiṇī stambhinī ratiḥ |
bōdhikā kamalā raudrī drāviṇī kṣōbhiṇī matiḥ || 44 ||
kucēlī kucamadhyasthā madhyakūṭa gati priyā |
kulōttīrṇā kulavatī bōdhā vāgvādinī satī || 45 ||
umā priyavratā lakṣmīrvakulā kularūpiṇī |
viśvātmikā viśvayōniḥ viśvāsaktā vināyakā || 46 ||
dhyāyinī nādinī tīrthā śāṅkarī mantrasākṣiṇī |
sanmantrarūpiṇī hr̥ṣṭā śāṅkarī suraśaṅkarī || 47 ||
sundarāṅgī surāvāsā suravandyā surēśvarī |
suvarṇā varṇasatkīrtiḥ savarṇā varṇarūpiṇī || 48 ||
lalitāṅgī variṣṭhā śrīraspandā spandarūpiṇī |
śāmbhavī saccidānandā saccidānandarūpiṇī || 49 ||
jayinī viśvajananī viśvaniṣṭhā vilāsinī |
bhrūmadhyā:’khilaniṣṭhādyā nirguṇā guṇavardhinī || 50 ||
hr̥llēkhā bhuvanēśānī bhavanā bhavanātmikā |
vibhūtirbhutidā bhūtiḥ sambhūtirbhūtikāriṇī || 51 ||
īśānī śāśvatī śaivī śarvāṇī śarmadāyinī |
bhavānī bhāvagā bhāvā bhāvanā bhāvanātmikā || 52 ||
hr̥tpadmanilayā śūrā svarāvr̥ttiḥ svarātmikā |
sūkṣmarūpā parānandā svātmasthā viśvadā śivā || 53 ||
paripūrṇā dayāpūrṇā madaghūrṇitalōcanā |
śaraṇyā taruṇārkābhā madā raktā manasvinī || 54 ||
anantā:’nantamahimā nityatr̥ptā nirañjanā |
acintyā śaktiścintyārthā cintyā:’cintyasvarūpiṇī || 55 ||
jaganmayī jaganmātā jagatsārā jagadbhavā |
āpyāyinī parānandā kūṭasthā:’:’vāsarūpiṇī || 56 ||
jñānagamyā jñānamūrtiḥ jñāpinī jñānarūpiṇī |
khēcarī khēcarīmudrā khēcarīyōgarūpiṇī || 57 ||
anāthanāthā nirnāthā ghōrā:’ghōrasvarūpiṇī |
sudhāpradā sudhādhārā sudhārūpā sudhāmayī || 58 ||
daharā daharākāśā daharākāśamadhyagā |
māṅgalyā maṅgalakarī mahāmāṅgalyadēvatā || 59 ||
māṅgalyadāyinī mānyā sarvamaṅgaladāyinī |
svaprakāśā mahābhūṣā bhāminī bhavarūpiṇī || 60 ||
kātyāyanī kalāvāsā pūrṇā kāmā yaśasvinī |
arthā:’vasānanilayā nārāyaṇamanōharā || 61 ||
mōkṣamārgavidhānajñā viriñcōtpattibhūmikā |
anuttarā mahārādhyā duṣprāpā duratikramā || 62 ||
śuddhidā kāmadā saumyā jñānadā mānadāyinī |
svadhā svāhā sudhā mēdhā madhurā madhumandirā || 63 ||
nirvāṇadāyinī śrēṣṭhā śarmiṣṭhā śāradārcitā |
suvarcalā surārādhyā śuddhasattvā surārcitā || 64 ||
stutiḥ stutimayī stutyā stutirūpā stutipriyā |
kāmēśvarī kāmavatī kāminī kāmarūpiṇī || 65 ||
ākāśagarbhā hrīṅkārī kaṅkālī kālarūpiṇī |
viṣṇupatnī viśuddhārthā viśvarūpēśavanditā || 66 ||
viśvavēdyā mahāvīrā viśvaghnī viśvarūpiṇī |
suśīlāḍhyā śailavatī śailasthā śailarūpiṇī || 67 ||
rudrāṇī caṇḍakhaṭvāṅgī ḍākinī sākinī prabhā |
nityā nirvēdakhaṭvāṅgī jananī janarūpiṇī || 68 ||
talōdarī jagatsūtrī jagatī jvalinī jvalī |
sākinī sārasaṁhr̥dyā sarvōttīrṇā sadāśivā || 69 ||
sphurantī sphuritākārā sphūrtiḥ sphuraṇarūpiṇī |
śivadūtī śivā śiṣṭā śivajñā śivarūpiṇī || 70 ||
rāgiṇī rañjanī ramyā rajanī rajanīkarā |
viśvambharā vinītēṣṭā vidhātrī vidhivallabhā || 71 ||
vidyōtinī vicitrārthā viśvādyā vividhābhidhā |
viśvākṣarā sarasikā viśvasthā:’tivicakṣaṇā || 72 ||
brahmayōnirmahāyōniḥ karmayōnistrayītanuḥ |
hākinī hāriṇī saumyā rōhiṇī rōganāśanī || 73 ||
śrīpradā śrīrśrīdharā ca śrīkarā śrīmatiḥ śriyā |
śrīmātā śrīkarī śrēyaḥ śrēyasī ca surēśvarī || 74 ||
kāmēśvarī kāmavatī kāmagiryālayasthitā |
rudrātmikā rudramātā rudragamyā rajasvalā || 75 ||
akāraṣōḍaśāntaḥsthā bhairavā:’:’hlādinī parā |
kr̥pādēhā:’ruṇā nāthā sudhābindusamāśritā || 76 ||
kālī kāmakalā kanyā pārvatī pararūpiṇī |
māyāvatī ghōramukhī vādinī dīpinī śivā || 77 ||
makārā mātr̥cakrēśī mahāsēnā vimōhinī |
utsukā:’nutsukā hr̥ṣṭā hrīṅkārī cakranāyikā || 78 ||
rudrā bhavānī cāmuṇḍī hrīṅkārī saukhyadāyinī |
garuḍā gāruḍī jyēṣṭhā sakalā brahmacāriṇī || 79 ||
kr̥ṣṇāṅgā vāhinī kr̥ṣṇā khēcarī kamalāpriyā |
bhadriṇī rudracāmuṇḍā hrīṅkārī saubhagā dhruvā || 80 ||
garuḍī gāruḍī jyēṣṭhā svargadā brahmavādinī |
pānānuraktā pānasthā bhīmarūpā bhayāpahā || 81 ||
raktā caṇḍā surānandā trikōṇā pānadarpitā |
mahōtsukā kratuprītā kaṅkālī kāladarpitā || 82 ||
sarvavarṇā suvarṇābhā parāmr̥tamahārṇavā |
yōgyārṇavā nāgabuddhirvīrapānā navātmikā || 83 ||
dvādaśāntasarōjasthā nirvāṇasukhadāyinī |
ādisattvā dhyānasattvā śrīkaṇṭhasvāntamōhinī || 84 ||
parā ghōrā karālākṣī svamūrtirmērunāyikā |
ākāśaliṅgasambhūtā parāmr̥tarasātmikā || 85 ||
śāṅkarī śāśvatī rudrā kapālā kuladīpikā |
vidyātanurmantratanuścaṇḍā muṇḍā sudarpitā || 86 ||
vāgīśvarī yōgamudrā trikhaṇḍā siddhamaṇḍitā |
śr̥ṅgārapīṭhanilayā kālī mātaṅgakanyakā || 87 ||
saṁvartamaṇḍalāntaḥsthā bhuvanōdyānavāsinī |
pādukākramasantr̥ptā bhairavasthā:’parājitā || 88 ||
nirvāṇā saurabhā durgā mahiṣāsuramardinī |
bhramarāmbā śikharikā brahmaviṣṇvīśatarpitā || 89 ||
unmattahēlā rasikā yōginī yōgadarpitā |
santānānandinī bījacakrā paramakāruṇī || 90 ||
khēcarī nāyikā yōgyā parivr̥ttā:’timōhinī |
śākambharī sambhavitrī skandā:’:’nandī madārpitā || 91 ||
kṣēmaṅkarī sumā śvāsā svargadā bindukāriṇī |
carcitā carcitapadā cārukhaṭvāṅgadhāriṇī || 92 ||
aghōrā mantritapadā bhāminī bhavarūpiṇī |
uṣā saṅkarṣiṇī dhātrī cōmā kātyāyanī śivā || 93 ||
sulabhā durlabhā śāstrī mahāśāstrī śikhaṇḍinī |
yōgalakṣmīrbhōgalakṣmīḥ rājyalakṣmīḥ kapālinī || 94 ||
dēvayōnirbhagavatī dhanvinī nādinīśvarī |
kṣētrātmikā mahādhātrī balinī kētumālinī || 95 ||
sadānandā sadābhadrā phalgunī raktavarṣiṇī |
mandāramandirā tīvrā grāhiṇī sarvabhakṣiṇī || 96 ||
agnijihvā mahājihvā śūlinī śuddhidā parā |
suvarṇikā kāladūtī dēvī kālasvarūpiṇī || 97 ||
kumbhinī śayanī gurvī vārāhī huṁ-phaḍātmikā |
ugrātmikā padmavatī dhūrjaṭī cakradhāriṇī || 98 ||
dēvī tatpuruṣā śikṣā mādhvī strīrūpadhāriṇī |
dakṣā dākṣāyaṇī dīkṣā madanā madanāturā || 99 ||
dhiṣṇyā hiraṇyā saraṇiḥ dharitrī dhararūpiṇī |
vasudhā vasudhāchāyā vasudhāmā sudhāmayī || 100 ||
śr̥ṅgiṇī bhīṣaṇā sāndrī prētasthānā mataṅginī |
khaṇḍinī yōginī tuṣṭiḥ nādinī bhēdinī naṭī || 101 ||
khaṭvāṅginī kālarātriḥ mēghamālā dharātmikā |
bhāpīṭhasthā bhavadrūpā mahāśrīrdhūmralōcanā || 102 ||
sukhadā gandhinī bandhurbandhinī bandhamōcinī |
sāvitrī satkr̥tiḥ kartrī kṣamā māyā mahōdayā || 103 ||
gaṇēśvarī gaṇākārā sadguṇā gaṇapūjitā |
nirmalā girijā śabdā śarvāṇī śarmadāyinī || 104 ||
ēkākinī sindhukanyā kāvyasūtrasvarūpiṇī |
avyaktarūpiṇī vyaktā yōginī pīṭharūpiṇī || 105 ||
nirmadā dhāmadā:’:’dityā nityā sēvyā:’kṣarātmikā |
tapinī tāpinī dīkṣā śōdhinī śivadāyinī || 106 ||
svasti svastimatī bālā kapilā visphuliṅginī |
arciṣmatī dyutimatī kaulinī kavyavāhinī || 107 ||
janāśritā viṣṇuvidyā mānasī vindhyavāsinī |
vidyādharī lōkadhātrī sarvā sārasvarūpiṇī || 108 ||
pāpaghnī sarvatōbhadrā tristhā śaktitrayātmikā |
trikōṇanilayā tristhā trayīmātā trayītanuḥ || 109 ||
trayīvidyā trayīsārā trayīrūpā tripuṣkarā |
trivarṇā tripurā triśrīḥ trimūrtistridaśēśvarī || 110 ||
trikōṇasaṁsthā trividhā trisvarā tripurāmbikā |
tridivā tridivēśānī tristhā tripuradāhinī || 111 ||
jaṅghinī sphōṭinī sphūrtiḥ stambhinī śōṣiṇī plutā |
aiṅkārākhyā vāmadēvī khaṇḍinī caṇḍadaṇḍinī || 112 ||
klīṅkārī vatsalā hr̥ṣṭā sauḥkārī madahaṁsikā |
vajriṇī drāviṇī jaitrī śrīmatī gōmatī dhruvā || 113 ||
paratējōmayī saṁvitpūrṇapīṭhanivāsinī |
tridhātmā tridaśā tryakṣā trighnī tripuramālinī || 114 ||
tripurāśrīstrijananī tribhūstrailōkyasundarī |
kumārī kuṇḍalī dhātrī bālā bhaktēṣṭadāyinī || 115 ||
kalāvatī bhagavatī bhaktidā bhavanāśinī |
saugandhinī saridvēṇī padmarāgakirīṭinī || 116 ||
tattvatrayī tattvamayī mantriṇī mantrarūpiṇī |
siddhā śrītripurāvāsā bālātripurasundarī || 117 ||
bālātripurasundaryā mantranāmasahasrakam |
kathitaṁ dēvadēvēśi sarvamaṅgaladāyakam || 118 ||
sarvarakṣākaraṁ dēvi sarvasaubhāgyadāyakam |
sarvāśrayakaraṁ dēvi sarvānandakaraṁ varam || 119 ||
sarvapāpakṣayakaraṁ sadā vijayavardhanam |
sarvadā śrīkaraṁ dēvi sarvayōgīśvarīmayam || 120 ||
sarvapīṭhamayaṁ dēvi sarvānandakaraṁ param |
sarvadaurbhāgyaśamanaṁ sarvaduḥkhanivāraṇam || 121 ||
sarvābhicāradōṣaghnaṁ paramantravināśanam |
parasainyastambhakaraṁ śatrustambhanakāraṇam || 122 ||
mahācamatkārakaraṁ mahābuddhipravardhanam |
mahōtpātapraśamanaṁ mahājvaranivāraṇam || 123 ||
mahāvaśyakaraṁ dēvi mahāsukhaphalapradam |
ēvamētasya mantrasya prabhāvō varṇituṁ mayā || 124 ||
na śakyatē varārōhē kalpakōṭi śatairapi |
yaḥ paṭhētsaṅgamē nityaṁ sarvadā mantrasiddhidam || 125 ||
iti śrīviṣṇuyāmalē śrī bālātripurasundarī sahasranāma stōtram |
గమనిక : "శ్రీ దత్తాత్రేయ స్తోత్రనిధి" పుస్తకము ముద్రణ చేయబోతున్నాము.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
