Read in తెలుగు / ಕನ್ನಡ / தமிழ் / देवनागरी / English (IAST)
|| మకరాక్షవధః ||
నిర్గతం మకరాక్షం తే దృష్ట్వా వానరయూథపాః |
ఆప్లుత్య సహసా సర్వే యోద్ధుకామా వ్యవస్థితాః || ౧ ||
తతః ప్రవృత్తం సుమహత్తద్యుద్ధం రోమహర్షణమ్ |
నిశాచరైః ప్లవంగానాం దేవానాం దానవైరివ || ౨ ||
వృక్షశూలనిపాతైశ్చ శిలాపరిఘపాతనైః |
అన్యోన్యం మర్దయంతి స్మ తదా కపినిశాచరాః || ౩ ||
శక్తిఖడ్గగదాకుంతైస్తోమరైశ్చ నిశాచరాః |
పట్టిశైర్భిందిపాలైశ్చ నిర్ఘాతైశ్చ సమంతతః || ౪ ||
పాశముద్గరదండైశ్చ నిఖాతైశ్చాపరే తదా |
కదనం కపివీరాణాం చక్రుస్తే రజనీచరాః || ౫ ||
బాణౌఘైరర్దితాశ్చాపి ఖరపుత్రేణ వానరాః |
సంభ్రాంతమనసః సర్వే దుద్రువుర్భయపీడితాః || ౬ ||
తాన్ దృష్ట్వా రాక్షసాః సర్వే ద్రవమాణాన్వలీముఖాన్ |
నేదుస్తే సింహవద్ధృష్టా రాక్షసా జితకాశినః || ౭ ||
విద్రవత్సు తదా తేషు వానరేషు సమంతతః |
రామస్తాన్వారయామాస శరవర్షేణ రాక్షసాన్ || ౮ ||
వారితాన్రాక్షసాన్దృష్ట్వా మకరాక్షో నిశాచరః |
క్రోధానలసమావిష్టో వచనం చేదమబ్రవీత్ || ౯ ||
తిష్ఠ రామ మయా సార్ధం ద్వంద్వయుద్ధం దదామి తే |
త్యాజయిష్యామి తే ప్రాణాన్ధనుర్ముక్తైః శితైః శరైః || ౧౦ ||
యత్తదా దండకారణ్యే పితరం హతవాన్మమ |
మదగ్రతః స్వకర్మస్థం దృష్ట్వా రోషోఽభివర్ధతే || ౧౧ ||
దహ్యంతే భృశమంగాని దురాత్మన్మమ రాఘవ |
యన్మయాసి న దృష్టస్త్వం తస్మిన్కాలే మహావనే || ౧౨ ||
దిష్ట్యాఽసి దర్శనం రామ మమ త్వం ప్రాప్తవానిహ |
కాంక్షితోఽసి క్షుధార్తస్య సింహస్యేవేతరో మృగః || ౧౩ ||
అద్య మద్బాణవేగేన ప్రేతరాడ్విషయం గతః |
యే త్వయా నిహతా వీరాః సహ తైశ్చ సమేష్యసి || ౧౪ ||
బహునాఽత్ర కిముక్తేన శృణు రామ వచో మమ |
పశ్యంతు సకలా లోకాస్త్వాం మాం చైవ రణాజిరే || ౧౫ ||
అస్త్రైర్వా గదయా వాఽపి బాహుభ్యాం వా మహాహవే |
అభ్యస్తం యేన వా రామ తేనైవ యుధి వర్తతామ్ || ౧౬ ||
మకరాక్షవచః శ్రుత్వా రామో దశరథాత్మజః |
అబ్రవీత్ప్రహసన్వాక్యముత్తరోత్తరవాదినమ్ || ౧౭ ||
కత్థసే కిం వృథా రక్షో బహూన్యసదృశాని తు |
న రణే శక్యతే జేతుం వినా యుద్ధేన వాగ్బలాత్ || ౧౮ ||
చతుర్దశసహస్రాణి రక్షసాం త్వత్పితా చ యః |
త్రిశిరా దూషణశ్చైవ దండకే నిహతా మయా || ౧౯ ||
స్వాశితాస్తవ మాంసేన గృధ్రగోమాయువాయసాః |
భవిష్యంత్యద్య వై పాప తీక్ష్ణతుండనఖాంకురాః || ౨౦ ||
[* అధికశ్లోకం –
రుధిరార్ద్రముఖా హృష్టా రక్తపక్షాః ఖగాశ్చ యే |
ఖే గతా వసుధాయాం చ భ్రమిష్యంతి సమంతతః ||
*]
రాఘవేణైవముక్తస్తు ఖరపుత్రో నిశాచరః |
బాణౌఘానముచత్తస్మై రాఘవాయ రణాజిరే || ౨౧ ||
తాన్ శరాన్ శరవర్షేణ రామశ్చిచ్ఛేద నైకధా |
నిపేతుర్భువి తే చ్ఛిన్నా రుక్మపుంఖాః సహస్రశః || ౨౨ ||
తద్యుద్ధమభవత్తత్ర సమేత్యాన్యోన్యమోజసా |
రక్షసః ఖరపుత్రస్య సూనోర్దశరథస్య చ || ౨౩ ||
జీమూతయోరివాకాశే శబ్దో జ్యాతలయోస్తదా |
ధనుర్ముక్తః స్వనోత్కృష్టః శ్రూయతే చ రణాజిరే || ౨౪ ||
దేవదానవగంధర్వాః కిన్నరాశ్చ మహోరగాః |
అంతరిక్షగతాః సర్వే ద్రష్టుకామాస్తదద్భుతమ్ || ౨౫ ||
విద్ధమన్యోన్యగాత్రేషు ద్విగుణం వర్ధతే పరమ్ |
కృతప్రతికృతాన్యోన్యం కురుతాం తౌ రణాజిరే || ౨౬ ||
రామముక్తాంస్తు బాణౌఘాన్రాక్షసస్త్వచ్ఛినద్రణే |
రక్షోముక్తాంస్తు రామో వై నైకధా ప్రాచ్ఛినచ్ఛరైః || ౨౭ ||
బాణౌఘైర్వితతాః సర్వా దిశశ్చ ప్రదిశస్తథా |
సంఛన్నా వసుధా చైవ సమంతాన్న ప్రకాశతే || ౨౮ ||
తతః క్రుద్ధో మహాబాహుర్ధనుశ్చిచ్ఛేద రక్షసః |
అష్టాభిరథ నారాచైః సూతం వివ్యాధ రాఘవః || ౨౯ ||
భిత్త్వా శరై రథం రామో రథాశ్వాన్సమపాతయత్ |
విరథో వసుధాం తిష్ఠన్మకరాక్షో నిశాచరః || ౩౦ ||
తత్తిష్ఠద్వసుధాం రక్షః శూలం జగ్రాహ పాణినా |
త్రాసనం సర్వభూతానాం యుగాంతాగ్నిసమప్రభమ్ || ౩౧ ||
విభ్రామ్య తు మహచ్ఛూలం ప్రజ్వలంతం నిశాచరః |
స క్రోధాత్ప్రాహిణోత్తస్మై రాఘవాయ మహాహవే || ౩౨ ||
తమాపతంతం జ్వలితం ఖరపుత్రకరాచ్చ్యుతమ్ |
బాణైస్తు త్రిభిరాకాశే శూలం చిచ్ఛేద రాఘవః || ౩౪ ||
స చ్ఛిన్నో నైకధా శూలో దివ్యహాటకమండితః |
వ్యశీర్యత మహోల్కేవ రామబాణార్దితో భువి || ౩౫ ||
తచ్ఛూలం నిహతం దృష్ట్వా రామేణాక్లిష్టకర్మణా |
సాధు సాధ్వితి భూతాని వ్యాహరంతి నభోగతా || ౩౬ ||
తం దృష్ట్వా నిహతం శూలం మకారాక్షో నిశాచరః |
ముష్టిముద్యమ్య కాకుత్స్థం తిష్ఠ తిష్ఠేతి చాబ్రవీత్ || ౩౭ ||
స తం దృష్ట్వా పతంతం వై ప్రహస్య రఘునందనః |
పావకాస్త్రం తతో రామః సందధే తు శరాసనే || ౩౮ ||
తేనాస్త్రేణ హతం రక్షః కాకుత్స్థేన తదా రణే |
సంఛిన్నహృదయం తత్ర పపాత చ మమార చ || ౩౯ ||
దృష్ట్వా తే రాక్షసాః సర్వే మకరాక్షస్య పాతనమ్ |
లంకామేవాభ్యధావంత రామబాణార్దితాస్తదా || ౪౦ ||
దశరథనృపపుత్రబాణవేగై
రజనిచరం నిహతం ఖరాత్మజం తమ్ |
దదృశురథ సురా భృశం ప్రహృష్టా
గిరిమివ వజ్రహతం యథా వికీర్ణమ్ || ౪౧ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ఏకోనాశీతితమః సర్గః || ౭౯ ||
యుద్ధకాండ అశీతితమః సర్గః (౮౦) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
