Read in తెలుగు / ಕನ್ನಡ / தமிழ் / देवनागरी / English (IAST)
|| తిరోహితరావణియుద్ధమ్ ||
మకరాక్షం హతం శ్రుత్వా రావణః సమితింజయః |
క్రోధేన మహతాఽఽవిష్టో దంతాన్కటకటాపయన్ || ౧ ||
కుపితశ్చ తదా తత్ర కిం కార్యమితి చింతయన్ |
ఆదిదేశాథ సంక్రుద్ధో రణాయేంద్రజితం సుతమ్ || ౨ ||
జహి వీర మహావీర్యౌ భ్రాతరౌ రామలక్ష్మణౌ |
అదృశ్యో దృశ్యమానో వా సర్వథా త్వం బలాధికః || ౩ ||
త్వమప్రతిమకర్మాణమింద్రం జయసి సంయుగే |
కిం పునర్మానుషౌ దృష్ట్వా న వధిష్యసి సంయుగే || ౪ ||
తథోక్తో రాక్షసేంద్రేణ ప్రతిగృహ్య పితుర్వచః |
యజ్ఞభూమౌ స విధివత్పావకం జుహవేంద్రజిత్ || ౫ ||
జుహ్వతశ్చాపి తత్రాగ్నిం రక్తోష్ణీషధరాః స్త్రియః |
ఆజగ్ముస్తత్ర సంభ్రాంతా రాక్షస్యో యత్ర రావణిః || ౬ ||
శస్త్రాణి శరపత్రాణి సమిధోఽథ విభీతకాః |
లోహితాని చ వాసాంసి స్రువం కార్ష్ణాయసం తథా || ౭ ||
సర్వతోఽగ్నిం సమాస్తీర్య శరపత్రైః సతోమరైః |
ఛాగస్య కృష్ణవర్ణస్య గలం జగ్రాహ జీవతః || ౮ ||
సకృదేవ సమిద్ధస్య విధూమస్య మహార్చిషః |
బభూవుస్తాని లింగాని విజయం దర్శయంతి చ || ౯ ||
ప్రదక్షిణావర్తశిఖస్తప్తహాటకసన్నిభః |
హవిస్తత్ప్రతిజగ్రాహ పావకః స్వయముత్థితః || ౧౦ ||
హుత్వాఽగ్నిం తర్పయిత్వా చ దేవదానవరాక్షసాన్ |
ఆరురోహ రథశ్రేష్ఠమంతర్ధానగతం శుభమ్ || ౧౧ ||
స వాజిభిశ్చతుర్భిశ్చ బాణైశ్చ నిశితైర్యుతః |
ఆరోపితమహాచాపః శుశుభే స్యందనోత్తమః || ౧౨ ||
జాజ్వల్యమానో వపుషా తపనీయపరిచ్ఛదః |
మృగైశ్చంద్రార్ధచంద్రైశ్చ సరథః సమలంకృతః || ౧౩ ||
జాంబూనదమహాకంబుర్దీప్తపావకసన్నిభః |
బభూవేంద్రజితః కేతుర్వైడూర్యసమలంకృతః || ౧౪ ||
తేన చాదిత్యకల్పేన బ్రహ్మాస్త్రేణ చ పాలితః |
స బభూవ దురాధర్షో రావణిః సుమహాబలః || ౧౫ ||
సోఽభినిర్యాయ నగరాదింద్రజిత్సమితింజయః |
హుత్వాఽగ్నిం రాక్షసైర్మంత్రైరంతర్ధానగతోఽబ్రవీత్ || ౧౬ ||
అద్య హత్వా రణే యౌ తౌ మిథ్యా ప్రవ్రాజితౌ వనే |
జయం పిత్రే ప్రదాస్యామి రావణాయ రణార్జితమ్ || ౧౭ ||
అద్య నిర్వానరాముర్వీం హత్వా రామం సలక్ష్మణమ్ |
కరిష్యే పరమప్రీతిమిత్యుక్త్వాఽంతరధీయత || ౧౮ ||
ఆపపాతాథ సంక్రుద్ధో దశగ్రీవేణ చోదితః |
తీక్ష్ణకార్ముకనారాచైస్తీక్ష్ణస్త్వింద్రరిపూ రణే || ౧౯ ||
స దదర్శ మహావీర్యౌ నాగౌ త్రిశిరసావివ |
సృజంతావిషుజాలాని వీరౌ వానరమధ్యగౌ || ౨౦ ||
ఇమౌ తావితి సంచింత్య సజ్యం కృత్వా చ కార్ముకమ్ |
సంతతానేషుధారాభిః పర్జన్య ఇవ వృష్టిమాన్ || ౨౧ ||
స తు వైహాయసం ప్రాప్య సరథో రామలక్ష్మణౌ |
అచక్షుర్విషయే తిష్ఠన్వివ్యాధ నిశితైః శరైః || ౨౨ ||
తౌ తస్య శరవేగేన పరీతౌ రామలక్ష్మణౌ |
ధనుషీ సశరే కృత్వా దివ్యమస్త్రం ప్రచక్రతుః || ౨౩ ||
ప్రచ్ఛాదయంతౌ గగనం శరజాలైర్మహాబలౌ |
తమస్త్రైః సూర్యసంకాశైర్నైవ పస్పృశతుః శరైః || ౨౪ ||
స హి ధూమాంధకారం చ చక్రే ప్రచ్ఛాదయన్నభః |
దిశశ్చాంతర్దధే శ్రీమాన్నీహారతమసా వృతాః || ౨౫ ||
నైవ జ్యాతలనిర్ఘోషో న చ నేమిఖురస్వనః |
శుశ్రువే చరతస్తస్య న చ రూపం ప్రకాశతే || ౨౬ ||
ఘనాంధకారే తిమిరే శరవర్షమివాద్భుతమ్ |
స వవర్ష మహాబాహుర్నారాచశరవృష్టిభిః || ౨౭ ||
స రామం సూర్యసంకాశైః శరైర్దత్తవరో భృశమ్ |
వివ్యాధ సమరే క్రుద్ధః సర్వగాత్రేషు రావణిః || ౨౮ ||
తౌ హన్యమానౌ నారాచైర్ధారాభిరివ పర్వతౌ |
హేమపుంఖాన్నరవ్యాఘ్రౌ తిగ్మాన్ముముచతుః శరాన్ || ౨౯ ||
అంతరిక్షే సమాసాద్య రావణిం కంకపత్రిణః |
నికృత్య పతగా భూమౌ పేతుస్తే శోణితోక్షితాః || ౩౦ ||
అతిమాత్రం శరౌఘేణ పీడ్యమానౌ నరోత్తమౌ |
తానిషూన్పతతో భల్లేరనేకైర్నిచకృంతతుః || ౩౧ ||
యతో హి దదృశాతే తౌ శరాన్నిపతతః శితాన్ |
తతస్తు తౌ దాశరథీ ససృజాతేఽస్త్రముత్తమమ్ || ౩౨ ||
రావణిస్తు దిశః సర్వా రథేనాతిరథః పతన్ |
వివ్యాధ తౌ దాశరథీ లఘ్వస్త్రో నిశితైః శరైః || ౩౩ ||
తేనాతివిద్ధౌ తౌ వీరౌ రుక్మపుంఖైః సుసంహితైః |
బభూవతుర్దాశరథీ పుష్పితావివ కింశుకౌ || ౩౪ ||
నాస్య వేద గతిం కశ్చిన్న చ రూపం ధనుః శరాన్ |
న చాన్యద్విదితం కించిత్సూర్యస్యేవాభ్రసంప్లవే || ౩౫ ||
తేన విద్ధాశ్చ హరయో నిహతాశ్చ గతాసవః |
బభూవుః శతశస్తత్ర పతితా ధరణీతలే || ౩౬ ||
లక్ష్మణస్తు సుసంక్రుద్ధో భ్రాతరం వాక్యమబ్రవీత్ |
బ్రాహ్మమస్త్రం ప్రయోక్ష్యామి వధార్థం సర్వరక్షసామ్ || ౩౭ ||
తమువాచ తతో రామో లక్ష్మణం శుభలక్షణమ్ |
నైకస్య హేతో రక్షాంసి పృథివ్యాం హంతుమర్హసి || ౩౮ ||
అయుధ్యమానం ప్రచ్ఛన్నం ప్రాంజలిం శరణాగతమ్ |
పలాయంతం ప్రమత్తం వా న త్వం హంతుమిహార్హసి || ౩౯ ||
అస్యైవ తు వధే యత్నం కరిష్యావో మహాబల |
ఆదేక్ష్యావో మహావేగానస్త్రానాశీవిషోపమాన్ || ౪౦ ||
తమేనం మాయినం క్షుద్రమంతర్హితరథం బలాత్ |
రాక్షసం నిహనిష్యంతి దృష్ట్వా వానరయూథపాః || ౪౧ ||
యద్యేష భూమిం విశతే దివం వా
రసాతలం వాఽపి నభఃస్థలం వా |
ఏవం నిగూఢోఽపి మమాస్త్రదగ్ధః
పతిష్యతే భూమితలే గతాసుః || ౪౨ ||
ఇత్యేవముక్త్వా వచనం మహాత్మా
రఘుప్రవీరః ప్లవగర్షభైర్వృతః |
వధాయ రౌద్రస్య నృశంసకర్మణ-
-స్తదా మహాత్మా త్వరితం నిరీక్షతే || ౪౩ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే అశీతితమః సర్గః || ౮౦ ||
యుద్ధకాండ ఏకాశీతితమః సర్గః (౮౧) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
