Read in తెలుగు / ಕನ್ನಡ / தமிழ் / देवनागरी / English (IAST)
|| హరాదివానరపరాక్రమాఖ్యానమ్ ||
తాంస్తు తేఽహం ప్రవక్ష్యామి ప్రేక్షమాణస్య యూథపాన్ |
రాఘవార్థే పరాక్రాంతా యే న రక్షంతి జీవితమ్ || ౧ ||
స్నిగ్ధా యస్య బహువ్యామా వాలా లాంగూలమాశ్రితాః |
తామ్రాః పీతాః సితాః శ్వేతాః ప్రకీర్ణా ఘోరకర్మణః || ౨ ||
ప్రగృహీతాః ప్రకాశంతే సూర్యస్యేవ మరీచయః |
పృథివ్యాం చానుకృష్యంతే హరో నామైష యూథపః || ౩ ||
యం పృష్ఠతోఽనుగచ్ఛంతి శతశోఽథ సహస్రశః |
ద్రుమానుద్యమ్య సహసా లంకారోహణతత్పరాః || ౪ ||
ఏష కోటిసహస్రేణ వానరాణాం మహౌజసామ్ |
ఆకాంక్షతే త్వాం సంగ్రామే జేతుం పరపురంజయ || ౫ ||
యూథపా హరిరాజస్య కింకరాః సముపస్థితాః |
నీలానివ మహామేఘాంస్తిష్ఠతో యాంస్తు పశ్యసి || ౬ ||
అసితాంజనసంకాశాన్యుద్ధే సత్యపరాక్రమాన్ |
అసంఖ్యేయాననిర్దేశ్యాన్పరం పారమివోదధేః || ౭ ||
పర్వతేషు చ యే కేచిద్విషమేషు నదీషు చ |
ఏతే త్వామభివర్తంతే రాజన్నృక్షాః సుదారుణాః || ౮ ||
ఏషాం మధ్యే స్థితో రాజన్భీమాక్షో భీమదర్శనః |
పర్జన్య ఇవ జీమూతైః సమంతాత్పరివారితః || ౯ ||
ఋక్షవంతం గిరిశ్రేష్ఠమధ్యాస్తే నర్మదాం పిబన్ |
సర్వర్క్షాణామధిపతిర్ధూమ్రో నామైష యూథపః || ౧౦ ||
యవీయానస్య తు భ్రాతా పశ్యైనం పర్వతోపమమ్ |
భ్రాత్రా సమానో రూపేణ విశిష్టస్తు పరాక్రమైః || ౧౧ ||
స ఏష జాంబవాన్నామ మహాయూథపయూథపః |
ప్రక్రాంతో గురువర్తీ చ సంప్రహారేష్వమర్షణః || ౧౨ ||
ఏతేన సాహ్యం సుమహత్కృతం శక్రస్య ధీమతా |
దైవాసురే జాంబవతా లబ్ధాశ్చ బహవో వరాః || ౧౩ ||
ఆరుహ్య పర్వతాగ్రేభ్యో మహాభ్రవిపులాః శిలాః |
ముంచంతి విపులాకారా న మృత్యోరుద్విజంతి చ || ౧౪ ||
రాక్షసానాం చ సదృశాః పిశాచానాం చ లోమశాః |
ఏతస్య సైన్యా బహవో విచరంత్యగ్నితేజసః || ౧౫ ||
యం త్వేనమభిసంరబ్ధం ప్లవమానమివ స్థితమ్ |
ప్రేక్షంతే వానరాః సర్వే స్థితా యూథపయూథపమ్ || ౧౬ ||
ఏష రాజన్సహస్రాక్షం పర్యుపాస్తే హరీశ్వరః |
బలేన బలసంపన్నో దంభో నామైష యూథపః || ౧౭ ||
యః స్థితం యోజనే శైలం గచ్ఛన్పార్శ్వేన సేవతే |
ఊర్ధ్వం తథైవ కాయేన గతః ప్రాప్నోతి యోజనమ్ || ౧౮ ||
యస్మాన్న పరమం రూపం చతుష్పాదేషు విద్యతే |
శ్రుతః సన్నాదనో నామ వానరాణాం పితామహః || ౧౯ ||
యేన యుద్ధం పురా దత్తం రణే శక్రస్య ధీమతా |
పరాజయశ్చ న ప్రాప్తః సోఽయం యూథపయూథపః || ౨౦ ||
యస్య విక్రమమాణస్య శక్రస్యేవ పరాక్రమః |
ఏష గంధర్వకన్యాయాముత్పన్నః కృష్ణవర్త్మనః || ౨౧ ||
తదా దైవాసురే యుద్ధే సాహ్యార్థం త్రిదివౌకసామ్ |
యస్య వైశ్రవణో రాజా జంబూముపనిషేవతే || ౨౨ ||
యో రాజా పర్వతేంద్రాణాం బహుకిన్నరసేవినామ్ |
విహారసుఖదో నిత్యం భ్రాతుస్తే రాక్షసాధిప || ౨౩ ||
తత్రైవ వసతి శ్రీమాన్బలవాన్వానరర్షభః |
యుద్ధేష్వకత్థనో నిత్యం క్రథనో నామ యూథపః || ౨౪ ||
వృతః కోటిసహస్రేణ హరీణాం సముపస్థితః |
ఏషైవాశంసతే లంకాం స్వేనానీకేన మర్దితుమ్ || ౨౫ ||
యో గంగామనుపర్యేతి త్రాసయన్హస్తియూథపాన్ |
హస్తినాం వానరాణాం చ పూర్వవైరమనుస్మరన్ || ౨౬ ||
ఏష యూథపతిర్నేతా గచ్ఛన్గిరిగుహాశయః |
గజాన్యోధయతే వన్యాగ్నిరీంశ్చైవ మహీరుహాన్ || ౨౭ ||
హరీణాం వాహినీముఖ్యో నదీం హైమవతీమను |
ఉశీరబీజమాశ్రిత్య పర్వతం మందరోపమమ్ || ౨౮ ||
రమతే వానరశ్రేష్ఠో దివి శక్ర ఇవ స్వయమ్ |
ఏనం శతసహస్రాణాం సహస్రమనువర్తతే || ౨౯ ||
వీర్యవిక్రమదృప్తానాం నర్దతాం బలశాలినామ్ |
స ఏష నేతా చైతేషాం వానరాణాం మహాత్మనామ్ || ౩౦ ||
స ఏష దుర్ధరో రాజన్ప్రమాథీ నామ యూథపః |
వాతేనేవోద్ధతం మేఘం యమేనమనుపశ్యసి || ౩౧ ||
అనీకమపి సంరబ్ధం వానరాణాం తరస్వినామ్ |
ఉద్ధూతమరుణాభాసం పవనేన సమంతతః || ౩౨ ||
వివర్తమానం బహుధా యత్రైతద్బహులం రజః |
ఏతేఽసితముఖా ఘోరా గోలాంగూలా మహాబలాః || ౩౩ ||
శతం శతసహస్రాణి దృష్ట్వా వై సేతుబంధనమ్ |
గోలాంగూలం మహావేగం గవాక్షం నామ యూథపమ్ || ౩౪ ||
పరివార్యాభివర్తంతే లంకాం మర్దితుమోజసా |
భ్రమరాచరితా యత్ర సర్వకాలఫలద్రుమాః || ౩౫ ||
యం సూర్యస్తుల్యవర్ణాభమనుపర్యేతి పర్వతమ్ |
యస్య భాసా సదా భాంతి తద్వర్ణా మృగపక్షిణః || ౩౬ ||
యస్య ప్రస్థం మహాత్మానో న త్యజంతి మహర్షయః |
సర్వకామఫలా వృక్షాః సదా ఫలసమన్వితాః || ౩౭ ||
మధూని చ మహార్హాణి యస్మిన్పర్వతసత్తమే |
తత్రైష రమతే రాజన్రమ్యే కాంచనపర్వతే || ౩౮ ||
ముఖ్యో వానరముఖ్యానాం కేసరీ నామ యూథపః |
షష్ఠిర్గిరిసహస్రాణాం రమ్యాః కాంచనపర్వతాః || ౩౯ ||
తేషాం మధ్యే గిరివరస్త్వమివానఘ రక్షసామ్ |
తత్రైతే కపిలాః శ్వేతాస్తామ్రాస్యా మధుపింగలాః || ౪౦ ||
నివసంత్యుత్తమగిరౌ తీక్ష్ణదంష్ట్రా నఖాయుధాః |
సింహా ఇవ చతుర్దంష్ట్రా వ్యాఘ్రా ఇవ దురాసదాః || ౪౧ ||
సర్వే వైశ్వానరసమా జ్వలితాశీవిషోపమాః |
సుదీర్ఘాంచితలాంగూలా మత్తమాతంగసన్నిభాః || ౪౨ ||
మహాపర్వతసంకాశా మహాజీమూతనిఃస్వనాః |
వృత్తపింగలరక్తాక్షా భీమభీమగతిస్వరాః || ౪౩ ||
మర్దయంతీవ తే సర్వే తస్థుర్లంకాం సమీక్ష్య తే |
ఏష చైషామధిపతిర్మధ్యే తిష్ఠతి వీర్యవాన్ || ౪౪ ||
జయార్థీ నిత్యమాదిత్యముపతిష్ఠతి బుద్ధిమాన్ |
నామ్నా పృథివ్యాం విఖ్యాతో రాజన్ శతవలీతి యః || ౪౫ ||
ఏషైవాశంసతే లంకాం స్వేనానీకేన మర్దితుమ్ |
విక్రాంతో బలవాన్ శూరః పౌరుషే స్వే వ్యవస్థితః || ౪౬ ||
రామప్రియార్థం ప్రాణానాం దయాం న కురుతే హరిః |
గజో గవాక్షో గవయో నలో నీలశ్చ వానరః || ౪౭ ||
ఏకైక ఏవ యూథానాం కోటిభిర్దశభిర్వృతః |
తథాఽన్యే వానరశ్రేష్ఠా వింధ్యపర్వతవాసినః |
న శక్యంతే బహుత్వాత్తు సంఖ్యాతుం లఘువిక్రమాః || ౪౮ ||
సర్వే మహారాజ మహాప్రభావాః
సర్వే మహాశైలనికాశకాయాః |
సర్వే సమర్థాః పృథివీం క్షణేన
కర్తుం ప్రవిధ్వస్తవికీర్ణశైలామ్ || ౪౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే సప్తవింశః సర్గః || ౨౭ ||
యుద్ధకాండ అష్టావింశః సర్గః (౨౮) >>
సంపూర్ణ శ్రీవాల్మీకి రామాయణ యుద్ధకాండ చూడండి
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
