Read in తెలుగు / ಕನ್ನಡ / தமிழ் / देवनागरी / English (IAST)
|| సీతావితర్కః ||
తతః శాఖాంతరే లీనం దృష్ట్వా చలితమానసా |
వేష్టితార్జునవస్త్రం తం విద్యుత్సంఘాతపింగలమ్ || ౧ ||
సా దదర్శ కపిం తత్ర ప్రశ్రితం ప్రియవాదినమ్ |
ఫుల్లాశోకోత్కరాభాసం తప్తచామీకరేక్షణమ్ || ౨ ||
[* సాఽథ దృష్ట్వా హరిశ్రేష్ఠం వినీతవదవస్థితమ్ | *]
మైథిలీ చింతయామాస విస్మయం పరమం గతా |
అహో భీమమిదం రూపం వానరస్య దురాసదమ్ || ౩ ||
దుర్నిరీక్ష్యమితి జ్ఞాత్వా పునరేవ ముమోహ సా |
విలలాప భృశం సీతా కరుణం భయమోహితా || ౪ ||
రామరామేతి దుఃఖార్తా లక్ష్మణేతి చ భామినీ |
రురోద బహుధా సీతా మందం మందస్వరా సతీ || ౫ ||
సా తం దృష్ట్వా హరిశ్రేష్ఠం వినీతవదుపస్థితమ్ |
మైథిలీ చింతయామాస స్వప్నోఽయమితి భామినీ || ౬ ||
సా వీక్షమాణా పృథుభుగ్నవక్త్రం
శాఖామృగేంద్రస్య యథోక్తకారమ్ |
దదర్శ పింగాధిపతేరమాత్యం
వాతాత్మజం బుద్ధిమతాం వరిష్ఠమ్ || ౭ ||
సా తం సమీక్ష్యైవ భృశం విసంజ్ఞా
గతాసుకల్పేవ బభూవ సీతా |
చిరేణ సంజ్ఞాం ప్రతిలభ్య భూయో
విచింతయామాస విశాలనేత్రా || ౮ ||
స్వప్నే మయాఽయం వికృతోఽద్య దృష్టః
శాఖామృగః శాస్త్రగణైర్నిషిద్ధః |
స్వస్త్యస్తు రామాయ సలక్ష్మణాయ
తథా పితుర్మే జనకస్య రాజ్ఞః || ౯ ||
స్వప్నోఽపి నాయం న హి మేఽస్తి నిద్రా
శోకేన దుఃఖేన చ పీడితాయాః |
సుఖం హి మే నాస్తి యతోఽస్మి హీనా
తేనేందుపూర్ణప్రతిమాననేన || ౧౦ ||
రామేతి రామేతి సదైవ బుద్ధ్యా
విచింత్య వాచా బ్రువతీ తమేవ |
తస్యానురూపాం చ కథాం తమర్థ-
-మేవం ప్రపశ్యామి తథా శృణోమి || ౧౧ ||
అహం హి తస్యాద్య మనోభవేన
సంపీడితా తద్గతసర్వభావా |
విచింతయంతీ సతతం తమేవ
తథైవ పశ్యామి తథా శృణోమి || ౧౨ ||
మనోరథః స్యాదితి చింతయామి
తథాపి బుద్ధ్యా చ వితర్కయామి |
కిం కారణం తస్య హి నాస్తి రూపం
సువ్యక్తరూపశ్చ వదత్యయం మామ్ || ౧౩ ||
నమోఽస్తు వాచస్పతయే సవజ్రిణే
స్వయంభువే చైవ హుతాశనాయ చ |
అనేన చోక్తం యదిదం మమాగ్రతో
వనౌకసా తచ్చ తథాఽస్తు నాన్యథా || ౧౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే ద్వాత్రింశః సర్గః || ౩౨ ||
సుందరకాండ – త్రయస్త్రింశః సర్గః (౩౩) >>
సంపూర్ణ వాల్మీకి సుందరకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
కిష్కింధకాండ- పారాయణ కి ఓపెన్ అవడం లేదు. దయచేసి గమనించగలరు.