Read in తెలుగు / ಕನ್ನಡ / தமிழ் / देवनागरी / English (IAST)
|| రామవృత్తసంశ్రవః ||
ఏవం బహువిధాం చింతాం చింతయిత్వా మహాకపిః |
సంశ్రవే మధురం వాక్యం వైదేహ్యా వ్యాజహార హ || ౧ ||
రాజా దశరథో నామ రథకుంజరవాజిమాన్ |
పుణ్యశీలో మహాకీర్తిరృజురాసీన్మహాయశాః || ౨ ||
రాజర్షీణాం గుణశ్రేష్ఠస్తపసా చర్షిభిః సమః |
చక్రవర్తికులే జాతః పురందరసమో బలే || ౩ ||
అహింసారతిరక్షుద్రో ఘృణీ సత్యపరాక్రమః |
ముఖ్యశ్చేక్ష్వాకువంశస్య లక్ష్మీవాఁల్లక్ష్మివర్ధనః || ౪ ||
పార్థివవ్యంజనైర్యుక్తః పృథుశ్రీః పార్థివర్షభః |
పృథివ్యాం చతురంతాయాం విశ్రుతః సుఖదః సుఖీ || ౫ ||
తస్య పుత్రః ప్రియో జ్యేష్ఠస్తారాధిపనిభాననః |
రామో నామ విశేషజ్ఞః శ్రేష్ఠః సర్వధనుష్మతామ్ || ౬ ||
రక్షితా స్వస్య వృత్తస్య స్వజనస్య చ రక్షితా | [ధర్మస్య]
రక్షితా జీవలోకస్య ధర్మస్య చ పరంతపః || ౭ ||
తస్య సత్యాభిసంధస్య వృద్ధస్య వచనాత్పితుః |
సభార్యః సహ చ భ్రాత్రా వీరః ప్రవ్రాజితో వనమ్ || ౮ ||
తేన తత్ర మహారణ్యే మృగయాం పరిధావతా |
రాక్షసా నిహతాః శూరా బహవః కామరూపిణః || ౯ ||
జనస్థానవధం శ్రుత్వా హతౌ చ ఖరదూషణౌ |
తతస్త్వమర్షాపహృతా జానకీ రావణేన తు || ౧౦ ||
వంచయిత్వా వనే రామం మృగరూపేణ మాయయా |
స మార్గమాణస్తాం దేవీం రామః సీతామనిందితామ్ || ౧౧ ||
ఆససాద వనే మిత్రం సుగ్రీవం నామ వానరమ్ |
తతః స వాలినం హత్వా రామః పరపురంజయః || ౧౨ ||
ప్రాయచ్ఛత్కపిరాజ్యం తత్సుగ్రీవాయ మహాబలః |
సుగ్రీవేణాపి సందిష్టా హరయః కామరూపిణః || ౧౩ ||
దిక్షు సర్వాసు తాం దేవీం విచిన్వంతి సహస్రశః |
అహం సంపాతివచనాచ్ఛతయోజనమాయతమ్ || ౧౪ ||
అస్యా హేతోర్విశాలాక్ష్యాః సాగరం వేగవాన్ప్లుతః |
యథారూపాం యథావర్ణాం యథాలక్ష్మీం చ నిశ్చితామ్ || ౧౫ ||
అశ్రౌషం రాఘవస్యాహం సేయమాసాదితా మయా |
విరరామైవముక్త్వాఽసౌ వాచం వానరపుంగవః || ౧౬ ||
జానకీ చాపి తచ్ఛ్రుత్వా విస్మయం పరమం గతా |
తతః సా వక్రకేశాంతా సుకేశీ కేశసంవృతమ్ |
ఉన్నమ్య వదనం భీరుః శింశుపావృక్షమైక్షత || ౧౭ ||
నిశమ్య సీతా వచనం కపేశ్చ
దిశశ్చ సర్వాః ప్రదిశశ్చ వీక్ష్య |
స్వయం ప్రహర్షం పరమం జగామ
సర్వాత్మనా రామమనుస్మరంతీ || ౧౮ ||
సా తిర్యగూర్ధ్వం చ తథాప్యధస్తా-
-న్నిరీక్షమాణా తమచింత్యబుద్ధిమ్ |
దదర్శ పింగాధిపతేరమాత్యం
వాతాత్మజం సూర్యమివోదయస్థమ్ || ౧౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే ఏకత్రింశః సర్గః || ౩౧ ||
సుందరకాండ – ద్వాత్రింశః సర్గః (౩౨) >>
సంపూర్ణ వాల్మీకి సుందరకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
Mee krushi n sraddh abhinandaneea.