Read in తెలుగు / ಕನ್ನಡ / தமிழ் / देवनागरी / English (IAST)
|| రావణానుశోకః ||
కుంభకర్ణం హతం దృష్ట్వా రాఘవేణ మహాత్మనా |
రాక్షసా రాక్షసేంద్రాయ రావణాయ న్యవేదయన్ || ౧ ||
రాజన్స కాలసంకాశః సంయుక్తః కాలకర్మణా |
విద్రావ్య వానరీం సేనాం భక్షయిత్వా చ వానరాన్ || ౨ ||
ప్రతపిత్వా ముహూర్తం చ ప్రశాంతో రామతేజసా |
కాయేనార్ధప్రవిష్టేన సముద్రం భీమదర్శనమ్ || ౩ ||
నికృత్తకంఠోరుభుజో విక్షరన్రుధిరం బహు |
రుద్ధ్వా ద్వారం శరీరేణ లంకాయాః పర్వతోపమః || ౪ ||
కుంభకర్ణస్తవ భ్రాతా కాకుత్స్థశరపీడితః |
లగండభూతో వికృతో దావదగ్ధ ఇవ ద్రుమః || ౫ ||
తం శ్రుత్వా నిహతం సంఖ్యే కుంభకర్ణం మహాబలమ్ |
రావణః శోకసంతప్తో ముమోహ చ పపాత చ || ౬ ||
పితృవ్యం నిహతం దృష్ట్వా దేవాంతకనరాంతకౌ |
త్రిశిరాశ్చాతికాయశ్చ రురుదుః శోకపీడితాః || ౭ ||
భ్రాతరం నిహతం దృష్ట్వా రామేణాక్లిష్టకర్మణా |
మహోదరమహాపార్శ్వౌ శోకాక్రాంతౌ బభూవతుః || ౮ ||
తతః కృచ్ఛ్రాత్సమాసాద్య సంజ్ఞాం రాక్షసపుంగవః |
కుంభకర్ణవధాద్దీనో విలలాప స రావణః || ౯ ||
హా వీర రిపుదర్పఘ్న కుంభకర్ణ మహాబల |
త్వం మాం విహాయ వై దైవాద్యాతోఽసి యమసాదనమ్ || ౧౦ ||
మమ శల్యమనుద్ధృత్య బాంధవానాం మహాబల |
శత్రుసైన్యం ప్రతాప్యైకస్త్వం మాం సంత్యజ్య గచ్ఛసి || ౧౧ ||
ఇదానీం ఖల్వహం నాస్మి యస్య మే దక్షిణో భుజః |
పతితో యం సమాశ్రిత్య న బిభేమి సురాసురాత్ || ౧౨ ||
కథమేవంవిధో వీరో దేవదానవదర్పహా |
కాలాగ్నిరుద్రప్రతిమో రణే రామేణ వై హతః || ౧౩ ||
యస్య తే వజ్రనిష్పేషో న కుర్యాద్వ్యసనం సదా |
స కథం రామబాణార్తః ప్రసుప్తోఽసి మహీతలే || ౧౪ ||
ఏతే దేవగణాః సార్ధమృషిభిర్గగనే స్థితాః |
నిహతం త్వాం రణే దృష్ట్వా నినదంతి ప్రహర్షితాః || ౧౫ ||
ధ్రువమద్యైవ సంహృష్టా లబ్ధలక్షాః ప్లవంగమాః |
ఆరోక్ష్యంతి హి దుర్గాణి లంకాద్వారాణి సర్వశః || ౧౬ ||
రాజ్యేన నాస్తి మే కార్యం కిం కరిష్యామి సీతయా |
కుంభకర్ణవిహీనస్య జీవితే నాస్తి మే రతిః || ౧౭ ||
యద్యహం భ్రాతృహంతారం న హన్మి యుధి రాఘవమ్ |
నను మే మరణం శ్రేయో న చేదం వ్యర్థజీవితమ్ || ౧౮ ||
అద్యైవ తం గమిష్యామి దేశం యత్రానుజో మమ |
న హి భ్రాతృన్సముత్సృజ్య క్షణం జీవితుముత్సహే || ౧౯ ||
దేవా హి మాం హసిష్యంతి దృష్ట్వా పూర్వాపకారిణమ్ |
కథమింద్రం జయిష్యామి కుంభకర్ణ హతే త్వయి || ౨౦ ||
తదిదం మామనుప్రాప్తం విభీషణవచః శుభమ్ |
యదజ్ఞానాన్మయా తస్య న గృహీతం మహాత్మనః || ౨౧ ||
విభీషణవచో యావత్కుంభకర్ణప్రహస్తయోః |
వినాశోఽయం సముత్పన్నో మాం వ్రీడయతి దారుణః || ౨౨ ||
తస్యాయం కర్మణః ప్రాప్తో విపాకో మమ శోకదః |
యన్మయా ధార్మికః శ్రీమాన్స నిరస్తో విభీషణః || ౨౩ ||
ఇతి బహువిధమాకులాంతరాత్మా
కృపణమతీవ విలప్య కుంభకర్ణమ్ |
న్యపతదథ దశాననో భృశార్త-
-స్తమనుజమింద్రరిపుం హతం విదిత్వా || ౨౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే అష్టషష్టితమః సర్గః || ౬౮ ||
యుద్ధకాండ ఏకోనసప్తతితమః సర్గః (౬౯)
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక: రాబోయే ధనుర్మాసం సందర్భంగా "శ్రీ కృష్ణ స్తోత్రనిధి" ముద్రించుటకు ఆలోచన చేయుచున్నాము. ఇటీవల మేము "శ్రీ సాయి స్తోత్రనిధి" పుస్తకము విడుదల చేశాము.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
