Read in తెలుగు / ಕನ್ನಡ / தமிழ் / देवनागरी / English (IAST)
|| రావణసుగ్రీవనియుద్ధమ్ ||
తతో రామః సువేలాగ్రం యోజనద్వయమండలమ్ |
ఆరురోహ ససుగ్రీవో హరియూథపసంవృతః || ౧ ||
స్థిత్వా ముహూర్తం తత్రైవ దిశో దశ విలోకయన్ |
త్రికూటశిఖరే రమ్యే నిర్మితాం విశ్వకర్మణా || ౨ ||
దదర్శ లంకాం సున్యస్తాం రమ్యకాననశోభితామ్ |
తస్యాం గోపురశృంగస్థం రాక్షసేంద్రం దురాసదమ్ || ౩ ||
శ్వేతచామరపర్యంతం విజయచ్ఛత్రశోభితమ్ |
రక్తచందనసంలిప్తం రత్నాభరణభూషితమ్ || ౪ ||
నీలజీమూతసంకాశం హేమసంఛాదితాంబరమ్ |
ఐరావతవిషాణాగ్రైరుత్కృష్టకిణవక్షసమ్ || ౫ ||
శశలోహితరాగేణ సంవీతం రక్తవాససా |
సంధ్యాతపేన సంవీతం మేఘరాశిమివాంబరే || ౬ ||
పశ్యతాం వానరేంద్రాణాం రాఘవస్యాపి పశ్యతః |
దర్శనాద్రాక్షసేంద్రస్య సుగ్రీవః సహసోత్థితః || ౭ ||
క్రోధవేగేన సంయుక్తః సత్త్వేన చ బలేన చ |
అచలాగ్రాదథోత్థాయ పుప్లువే గోపురస్థలే || ౮ ||
స్థిత్వా ముహూర్తం సంప్రేక్ష్య నిర్భయేనాంతరాత్మనా |
తృణీకృత్య చ తద్రక్షః సోఽబ్రవీత్పరుషం వచః || ౯ ||
లోకనాథస్య రామస్య సఖా దాసోఽస్మి రాక్షస |
న మయా మోక్ష్యసేఽద్య త్వం పార్థివేంద్రస్య తేజసా || ౧౦ ||
ఇత్యుక్త్వా సహసోత్పత్య పుప్లువే తస్య చోపరి |
ఆకృష్య ముకుటం చిత్రం పాతయిత్వాఽపతద్భువి || ౧౧ ||
సమీక్ష్య తూర్ణమాయాంతమాబభాషే నిశాచరః |
సుగ్రీవస్త్వం పరోక్షం మే హీనగ్రీవో భవిష్యసి || ౧౨ ||
ఇత్యుక్త్వోత్థాయ తం క్షిప్రం బాహుభ్యామాక్షిపత్తలే |
కంతువత్తం సముత్థాయ బాహుభ్యామాక్షిపద్ధరిః || ౧౩ ||
పరస్పరం స్వేదవిదిగ్ధగాత్రౌ
పరస్పరం శోణితదిగ్ధదేహౌ |
పరస్పరం శ్లిష్టనిరుద్ధచేష్టౌ
పరస్పరం శాల్మలికింశుకౌ యథా || ౧౪ ||
ముష్టిప్రహారైశ్చ తలప్రహారై-
-రరత్నిఘాతైశ్చ కరాగ్రఘాతైః |
తౌ చక్రతుర్యుద్ధమసహ్యరూపం
మహాబలౌ వానరరాక్షసేంద్రౌ || ౧౫ ||
కృత్వా నియుద్ధం భృశముగ్రవేగౌ
కాలం చిరం గోపురవేదిమధ్యే |
ఉత్క్షిప్య చాక్షిప్య వినమ్య దేహౌ
పాదక్రమాద్గోపురవేదిలగ్నౌ || ౧౬ ||
అన్యోన్యమావిధ్య విలగ్నదేహౌ
తౌ పేతతుః సాలనిఖాతమధ్యే |
ఉత్పేతతుర్భూతలమస్పృశంతౌ
స్థిత్వా ముహూర్తం త్వభినిశ్వసంతౌ || ౧౭ ||
ఆలింగ్య చావల్గ్య చ బాహుయోక్త్రైః
సంయోజయామాసతురాహవే తౌ |
సంరంభశిక్షాబలసంప్రయుక్తౌ
సంచేరతుః సంప్రతి యుద్ధమార్గైః || ౧౮ ||
శార్దూలసింహావివ జాతదర్పౌ
గజేంద్రపోతావివ సంప్రయుక్తౌ |
సంహత్య చాపీడ్య చ తావురోభ్యాం
నిపేతతుర్వై యుగపద్ధరణ్యామ్ || ౧౯ ||
ఉద్యమ్య చాన్యోన్యమధిక్షిపంతౌ
సంచక్రమాతే బహుయుద్ధమార్గైః |
వ్యాయామశిక్షాబలసంప్రయుక్తౌ
క్లమం న తౌ జగ్మతురాశు వీరౌ || ౨౦ ||
బాహూత్తమైర్వారణవారణాభై-
-ర్నివారయంతౌ వరవారణాభౌ |
చిరేణ కాలేన తు సంప్రయుక్తో
సంచేరతుర్మండలమార్గమాశు || ౨౧ ||
తౌ పరస్పరమాసాద్య యత్తావన్యోన్యసూదనే |
మార్జారావివ భక్షార్థే వితస్థాతే ముహుర్ముహుః || ౨౨ ||
మండలాని విచిత్రాణి స్థానాని వివిధాని చ |
గోమూత్రికాణి చిత్రాణి గతప్రత్యాగతాని చ || ౨౩ ||
తిరశ్చీనగతాన్యేవ తథా వక్రగతాని చ |
పరిమోక్షం ప్రహారాణాం వర్జనం పరిధావనమ్ || ౨౪ ||
అభిద్రవణమాప్లావమాస్థానం చ సవిగ్రహమ్ |
పరావృత్తమపావృత్తమవద్రుతమవప్లుతమ్ || ౨౫ ||
ఉపన్యస్తమపన్యస్తం యుద్ధమార్గవిశారదౌ |
తౌ సంచేరతురన్యోన్యం వానరేంద్రశ్చ రావణః || ౨౬ ||
ఏతస్మిన్నంతరే రక్షో మాయాబలమథాత్మనః |
ఆరబ్ధుముపసంపేదే జ్ఞాత్వా తం వానరాధిపః || ౨౭ ||
ఉత్పపాత తదాకాశం జితకాశీ జితక్లమః |
రావణః స్థిత ఏవాత్ర హరిరాజేన వంచితః || ౨౮ ||
అథ హరివరనాథః ప్రాప్య సంగ్రామకీర్తిః
నిశిచరపతిమాజౌ యోజయిత్వా శ్రమేణ |
గగనమతివిశాలం లంఘయిత్వాఽర్కసూను-
-ర్హరివరగణమధ్యే రామపార్శ్వం జగామ || ౨౯ ||
ఇతి స సవితృసూనుస్తత్ర తత్కర్మ కృత్వా
పవనగతిరనీకం ప్రావిశత్సంప్రహృష్టః |
రఘువరనృపసూనోర్వర్ధయన్యుద్ధహర్షం
తరుమృగగణముఖ్యైః పూజ్యమానో హరీంద్రః || ౩౦ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే చత్వారింశః సర్గః || ౪౦ ||
యుద్ధకాండ ఏకచత్వారింశః సర్గః (౪౧) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
