Read in తెలుగు / ಕನ್ನಡ / தமிழ் / देवनागरी / English (IAST)
|| సీతావిలాపః ||
సా సీతా తచ్ఛిరో దృష్ట్వా తచ్చ కార్ముకముత్తమమ్ |
సుగ్రీవప్రతిసంసర్గమాఖ్యాతం చ హనూమతా || ౧ ||
నయనే ముఖవర్ణం చ భర్తుస్తత్సదృశం ముఖమ్ |
కేశాన్కేశాంతదేశం చ తం చ చూడామణిం శుభమ్ || ౨ ||
ఏతైః సర్వైరభిజ్ఞానైరభిజ్ఞాయ సుదుఃఖితా |
విజగర్హేఽత్ర కైకేయీం క్రోశంతీ కురరీ యథా || ౩ ||
సకామా భవ కైకేయి హతోఽయం కులనందనః |
కులముత్సాదితం సర్వం త్వయా కలహశీలయా || ౪ ||
ఆర్యేణ కిం తే కైకేయి కృతం రామేణ విప్రియమ్ |
తద్గృహాచ్చీరవసనం దత్త్వా ప్రవ్రాజితో వనమ్ || ౫ ||
[* ఇదానీం స హి ధర్మాత్మా రాక్షసైశ్చ కథం హతః | *]
ఏవముక్త్వా తు వైదేహీ వేపమానా తపస్వినీ || ౬ ||
జగామ జగతీం బాలా ఛిన్నా తు కదలీ యథా |
సా ముహూర్తాత్సమాశ్వాస్య ప్రతిలభ్య చ చేతనామ్ || ౭ ||
తచ్ఛిరః సముపాఘ్రాయ విలలాపాయతేక్షణా |
హా హతాఽస్మి మహాబాహో వీరవ్రతమనువ్రతా || ౮ ||
ఇమాం తే పశ్చిమావస్థాం గతాఽస్మి విధవా కృతా |
ప్రథమం మరణం నార్యో భర్తుర్వైగుణ్యముచ్యతే || ౯ ||
సువృత్తః సాధువృత్తాయాః సంవృత్తస్త్వం మమాగ్రతః |
దుఃఖాద్దుఃఖం ప్రపన్నాయా మగ్నాయా శోకసాగరే || ౧౦ ||
యో హి మాముద్యతస్త్రాతుం సోఽపి త్వం వినిపాతితః |
సా శ్వశ్రూర్మమ కౌసల్యా త్వయా పుత్రేణ రాఘవ || ౧౧ ||
వత్సేనేవ యథా ధేనుర్వివత్సా వత్సలా కృతా |
ఆదిష్టం దీర్ఘమాయుస్తే యైరచింత్యపరాక్రమ || ౧౨ ||
అనృతం వచనం తేషామల్పాయురసి రాఘవ |
అథవా నశ్యతి ప్రజ్ఞా ప్రాజ్ఞస్యాపి సతస్తవ || ౧౩ ||
పచత్యేనం యథా కాలో భూతానాం ప్రభవో హ్యయమ్ |
అదృష్టం మృత్యుమాపన్నః కస్మాత్త్వం నయశాస్త్రవిత్ || ౧౪ ||
వ్యసనానాముపాయజ్ఞః కుశలో హ్యసి వర్జనే |
తథా త్వం సంపరిష్వజ్య రౌద్రయాతినృశంసయా || ౧౫ ||
కాలరాత్ర్యా మమాచ్ఛిద్య హృతః కమలలోచన |
ఉపశేషే మహాబాహో మాం విహాయ తపస్వినీమ్ || ౧౬ ||
ప్రియామివ సమాశ్లిష్య పృథివీం పురుషర్షభ |
అర్చితం సతతం యత్తద్గంధమాల్యైర్మయా తవ || ౧౭ ||
ఇదం తే మత్ప్రియం వీర ధనుః కాంచనభూషణమ్ |
పిత్రా దశరథేన త్వం శ్వశురేణ మమానఘ || ౧౮ ||
సర్వైశ్చ పితృభిః సార్ధం నూనం స్వర్గే సమాగతః |
దివి నక్షత్రభూతస్త్వం మహత్కర్మకృతాం ప్రియమ్ || ౧౯ ||
పుణ్యం రాజర్షివంశం త్వమాత్మనః సమవేక్షసే |
కిం మాం న ప్రేక్షసే రాజన్ కిం మాం న ప్రతిభాషసే || ౨౦ ||
బాలాం బాల్యేన సంప్రాప్తాం భార్యాం మాం సహచారిణీమ్ |
సంశ్రుతం గృహ్ణతా పాణిం చరిష్యామీతి యత్త్వయా || ౨౧ ||
స్మర తన్మమ కాకుత్స్థ నయ మామపి దుఃఖితామ్ |
కస్మాన్మామపహాయ త్వం గతో గతిమతాం వర || ౨౨ ||
అస్మాల్లోకాదముం లోకం త్యక్త్వా మామపి దుఃఖితామ్ |
కల్యాణైరుచితం యత్తత్పరిష్వక్తం మయైవ తు || ౨౩ ||
క్రవ్యాదైస్తచ్ఛరీరం తే నూనం విపరికృష్యతే |
అగ్నిష్టోమాదిభిర్యజ్ఞైరిష్టవానాప్తదక్షిణైః || ౨౪ ||
అగ్నిహోత్రేణ సంస్కారం కేన త్వం తు న లప్స్యసే |
ప్రవ్రజ్యాముపపన్నానాం త్రయాణామేకమాగతమ్ || ౨౫ ||
పరిప్రక్ష్యతి కౌసల్యా లక్ష్మణం శోకలాలసా |
స తస్యాః పరిపృచ్ఛంత్యా వధం మిత్రబలస్య తే || ౨౬ ||
తవ చాఖ్యాస్యతే నూనం నిశాయాం రాక్షసైర్వధమ్ |
సా త్వాం సుప్తం హతం శ్రుత్వా మాం చ రక్షోగృహం గతామ్ || ౨౭ ||
హృదయేనావదీర్ణేన న భవిష్యతి రాఘవ |
మమ హేతోరనార్యాయా హ్యనర్హః పార్థివాత్మజః || ౨౮ ||
రామః సాగరముత్తీర్య సత్త్వవాన్గోష్పదే హతః |
అహం దాశరథేనోఢా మోహాత్స్వకులపాంసనీ || ౨౯ ||
ఆర్యపుత్రస్య రామస్య భార్యా మృత్యురజాయత |
నూనమన్యాం మయా జాతిం వారితం దానముత్తమమ్ || ౩౦ ||
యాఽహమద్యేహ శోచామి భార్యా సర్వాతిథేరపి |
సాధు పాతయ మాం క్షిప్రం రామస్యోపరి రావణ || ౩౧ ||
సమానయ పతిం పత్న్యా కురు కల్యాణముత్తమమ్ |
శిరసా మే శిరశ్చాస్య కాయం కాయేన యోజయ || ౩౨ ||
రావణానుగమిష్యామి గతిం భర్తుర్మహాత్మనః |
[* ముహూర్తమపి నేచ్ఛామి జీవితుం పాపజీవితా *] || ౩౩ ||
ఇతి సా దుఃఖసంతప్తా విలలాపాయతేక్షణా |
భర్తుః శిరో ధనుస్తత్ర సమీక్ష్య చ పునః పునః || ౩౪ ||
ఏవం లాలప్యమానాయాం సీతాయాం తత్ర రాక్షసః |
అభిచక్రామ భర్తారమనీకస్థః కృతాంజలిః || ౩౫ ||
విజయస్వార్యపుత్రేతి సోఽభివాద్య ప్రసాద్య చ |
న్యవేదయదనుప్రాప్తం ప్రహస్తం వాహినీపతిమ్ || ౩౬ ||
అమాత్యైః సహితైః సర్వైః ప్రహస్తః సముపస్థితః |
తేన దర్శనకామేన వయం ప్రస్థాపితాః ప్రభో || ౩౭ ||
నూనమస్తి మహారాజ రాజభావాత్ క్షమాన్వితమ్ |
కించిదాత్యయికం కార్యం తేషాం త్వం దర్శనం కురు || ౩౮ ||
ఏతచ్ఛ్రుత్వా దశగ్రీవో రాక్షసప్రతివేదితమ్ |
అశోకవనికాం త్యక్త్వా మంత్రిణాం దర్శనం యయౌ || ౩౯ ||
స తు సర్వం సమర్థ్యైవ మంత్రిభిః కృత్యమాత్మనః |
సభాం ప్రవిశ్య విదధే విదిత్వా రామవిక్రమమ్ || ౪౦ ||
అంతర్ధానం తు తచ్ఛీర్షం తచ్చ కార్ముకముత్తమమ్ |
జగామ రావణస్యైవ నిర్యాణసమనంతరమ్ || ౪౧ ||
రాక్షసేంద్రస్తు తైః సార్ధం మంత్రిభిర్భీమవిక్రమైః |
సమర్థయామాస తదా రామకార్యవినిశ్చయమ్ || ౪౨ ||
అవిదూరస్థితాన్సర్వాన్బలాధ్యక్షాన్హితైషిణః |
అబ్రవీత్కాలసదృశం రావణో రాక్షసాధిపః || ౪౩ ||
శీఘ్రం భేరీనినాదేన స్ఫుటకోణాహతేన మే |
సమానయధ్వం సైన్యాని వక్తవ్యం చ న కారణమ్ || ౪౪ ||
తతస్తథేతి ప్రతిగృహ్య తద్వచో
బలాధిపాస్తే మహదాత్మనో బలమ్ |
సమానయంశ్చైవ సమాగమం చ తే
న్యవేదయన్భర్తరి యుద్ధకాంక్షిణి || ౪౫ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ద్వాత్రింశః సర్గః || ౩౨ ||
యుద్ధకాండ త్రయస్త్రింశః సర్గః (౩౩) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
