Read in తెలుగు / ಕನ್ನಡ / தமிழ் / देवनागरी / English (IAST)
|| రావణధ్వజోన్మథనమ్ ||
తతః ప్రవృత్తం సుక్రూరం రామరావణయోస్తదా |
సుమహద్ద్వైరథం యుద్ధం సర్వలోకభయావహమ్ || ౧ ||
తతో రాక్షససైన్యం చ హరీణాం చ మహద్బలమ్ |
ప్రగృహీతప్రహరణం నిశ్చేష్టం సమతిష్ఠత || ౨ ||
సంప్రయుద్ధౌ తతో దృష్ట్వా బలవన్నరరాక్షసౌ |
వ్యాక్షిప్తహృదయాః సర్వే పరం విస్మయమాగతాః || ౩ ||
నానాప్రహరణైర్వ్యగ్రైర్భుజైర్విస్మితబుద్ధయః |
సర్పంతం ప్రేక్ష్య సంగ్రామం నాభిజగ్ముః పరస్పరమ్ || ౪ ||
రక్షసాం రావణం చాపి వానరాణాం చ రాఘవమ్ |
పశ్యతాం విస్మితాక్షాణాం సైన్యం చిత్రమివాబభౌ || ౫ ||
తౌ తు తత్ర నిమిత్తాని దృష్ట్వా రావణరాఘవౌ |
కృతబుద్ధీ స్థిరామర్షౌ యుయుధాతే హ్యభీతవత్ || ౬ ||
జేతవ్యమితి కాకుత్స్థో మర్తవ్యమితి రావణః |
ధృతౌ స్వవీర్యసర్వస్వం యుద్ధేఽదర్శయతాం తదా || ౭ ||
తతః క్రోధాద్దశగ్రీవః శరాన్సంధాయ వీర్యవాన్ |
ముమోచ ధ్వజముద్దిశ్య రాఘవస్య రథే స్థితమ్ || ౮ ||
తే శరాస్తమనాసాద్య పురందరరథధ్వజమ్ |
రథశక్తిం పరామృశ్య నిపేతుర్ధరణీతలే || ౯ ||
తతో రామోఽభిసంక్రుద్ధశ్చాపమాయమ్య వీర్యవాన్ |
కృతప్రతికృతం కర్తుం మనసా సంప్రచక్రమే || ౧౦ ||
రావణధ్వజముద్దిశ్య ముమోచ నిశితం శరమ్ |
మహాసర్పమివాసహ్యం జ్వలంతం స్వేన తేజసా || ౧౧ ||
జగామ స మహీం ఛిత్త్వా దశగ్రీవధ్వజం శరః |
స నికృత్తోఽపతద్భూమౌ రావణస్య రథధ్వజః || ౧౨ ||
ధ్వజస్యోన్మథనం దృష్ట్వా రావణః సుమహాబలః |
సంప్రదీప్తోఽభవత్క్రోధాదమర్షాత్ప్రదహన్నివ || ౧౩ ||
స రోషవశమాపన్నః శరవర్షం మహద్వమన్ |
రామస్య తురగాన్దీప్తైః శరైర్వివ్యాధ రావణః || ౧౪ ||
తే విద్ధా హరయస్తత్ర నాస్ఖలన్నాపి బభ్రముః |
బభూవుః స్వస్థహృదయాః పద్మనాలైరివాహతాః || ౧౫ ||
తేషామసంభ్రమం దృష్ట్వా వాజినాం రావణస్తదా |
భూయ ఏవ సుసంక్రుద్ధః శరవర్షం ముమోచ హ || ౧౬ ||
గదాశ్చ పరిఘాశ్చైవ చక్రాణి ముసలాని చ |
గిరిశృంగాణి వృక్షాంశ్చ తథా శూలపరశ్వధాన్ || ౧౭ ||
మాయావిహితమేతత్తు శస్త్రవర్షమపాతయత్ |
తుములం త్రాసజననం భీమం భీమప్రతిస్వనమ్ || ౧౮ ||
తద్వర్షమభవద్యుద్ధే నైకశస్త్రమయం మహత్ |
విముచ్య రాఘవరథం సమాంతాద్వానరే బలే || ౧౯ ||
సాయకైరంతరిక్షం చ చకారాశు నిరంతరమ్ |
సహస్రశస్తతో బాణానశ్రాంతహృదయోద్యమః || ౨౦ ||
ముమోచ చ దశగ్రీవో నిఃసంగేనాంతరాత్మనా |
వ్యాయచ్ఛమానం తం దృష్ట్వా తత్పరం రావణం రణే || ౨౧ ||
ప్రహసన్నివ కాకుత్స్థః సందధే సాయకాన్ శితాన్ |
స ముమోచ తతో బాణాన్రణే శతసహస్రశః || ౨౨ ||
తాన్దృష్ట్వా రావణశ్చక్రే స్వశరైః ఖం నిరంతరమ్ |
తతస్తాభ్యాం ప్రముక్తేన శరవర్షేణ భాస్వతా || ౨౩ ||
శరబద్ధమివాభాతి ద్వితీయం భాస్వదంబరమ్ |
నానిమిత్తోఽభవద్బాణో నాతిభేత్తా న నిష్ఫలః || ౨౪ ||
అన్యోన్యమభిసంహత్య నిపేతుర్ధరణీతలే |
తథా విసృజతోర్బాణాన్రామరావణయోర్మృధే || ౨౫ ||
ప్రాయుద్ధ్యతామవిచ్ఛిన్నమస్యంతౌ సవ్యదక్షిణమ్ |
చక్రతుశ్చ శరౌఘైస్తౌ నిరుచ్ఛ్వాసమివాంబరమ్ || ౨౬ ||
రావణస్య హయాన్రామో హయాన్రామస్య రావణః |
జఘ్నతుస్తౌ తథాఽన్యోన్యం కృతానుకృతకారిణౌ || ౨౭ ||
ఏవం తౌ తు సుసంక్రుద్ధౌ చక్రతుర్యుద్ధమద్భుతమ్ |
ముహూర్తమభవద్యుద్ధం తుములం రోమహర్షణమ్ || ౨౮ ||
ప్రయుధ్యమానౌ సమరే మహాబలౌ
శితైః శరై రావణలక్ష్మణాగ్రజౌ |
ధ్వజావపాతేన స రాక్షసాధిపో
భృశం ప్రచుక్రోధ తదా రఘూత్తమే || ౨౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే నవోత్తరశతతమః సర్గః || ౧౦౯ ||
యుద్ధకాండ దశోత్తరశతతమః సర్గః (౧౧౦) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
