Read in తెలుగు / ಕನ್ನಡ / தமிழ் / देवनागरी / English (IAST)
|| సీతాభాషితప్రశ్నః ||
ఏవముక్తో హనుమతా రామో దశరథాత్మజః |
తం మణిం హృదయే కృత్వా ప్రరురోద సలక్ష్మణః || ౧ ||
తం తు దృష్ట్వా మణిశ్రేష్ఠం రాఘవః శోకకర్శితః |
నేత్రాభ్యామశ్రుపూర్ణాభ్యాం సుగ్రీవమిదమబ్రవీత్ || ౨ ||
యథైవ ధేనుః స్రవతి స్నేహాద్వత్సస్య వత్సలా |
తథా మమాపి హృదయం మణిరత్నస్య దర్శనాత్ || ౩ ||
మణిరత్నమిదం దత్తం వైదేహ్యాః శ్వశురేణ మే |
వధూకాలే యథాబద్ధమధికం మూర్ధ్ని శోభతే || ౪ ||
అయం హి జలసంభూతో మణిః సజ్జనపూజితః |
యజ్ఞే పరమతుష్టేన దత్తః శక్రేణ ధీమతా || ౫ ||
ఇమం దృష్ట్వా మణిశ్రేష్ఠం యథా తాతస్య దర్శనమ్ |
అద్యాస్మ్యవగతః సౌమ్య వైదేహస్య తథా విభోః || ౬ ||
అయం హి శోభతే తస్యాః ప్రియాయా మూర్ధ్ని మే మణిః |
అస్యాద్య దర్శనేనాహం ప్రాప్తాం తామివ చింతయే || ౭ ||
కిమాహ సీతా వైదేహీ బ్రూహి సౌమ్య పునః పునః |
పిపాసుమివ తోయేన సించంతీ వాక్యవారిణా || ౮ ||
ఇతస్తు కిం దుఃఖతరం యదిమం వారిసంభవమ్ |
మణిం పశ్యామి సౌమిత్రే వైదేహీమాగతం వినా || ౯ ||
చిరం జీవతి వైదేహీ యది మాసం ధరిష్యతి |
న జీవేయం క్షణమపి వినా తామసితేక్షణామ్ || ౧౦ ||
నయ మామపి తం దేశం యత్ర దృష్టా మమ ప్రియా |
న తిష్ఠేయం క్షణమపి ప్రవృత్తిముపలభ్య చ || ౧౧ ||
కథం సా మమ సుశ్రోణి భీరుభీరుః సతీ సదా |
భయావహానాం ఘోరాణాం మధ్యే తిష్ఠతి రక్షసామ్ || ౧౨ ||
శారదస్తిమిరోన్ముక్తో నూనం చంద్ర ఇవాంబుదైః |
ఆవృతం వదనం తస్యా న విరాజతి రాక్షసైః || ౧౩ ||
కిమాహ సీతా హనుమంస్తత్త్వతః కథయాద్య మే |
ఏతేన ఖలు జీవిష్యే భేషజేనాతురో యథా || ౧౪ ||
మధురా మధురాలాపా కిమాహ మమ భామినీ |
మద్విహీనా వరారోహా హనుమన్కథయస్వ మే || ౧౫ ||
[* అధికపాఠః –
దుఃఖాద్దుఃఖతరం ప్రాప్య కథం జీవతి జానకీ ||
*]
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే షట్షష్టితమః సర్గః || ౬౬ ||
సుందరకాండ సర్గ – సప్తషష్టితమః సర్గః (౬౭) >>
సంపూర్ణ వాల్మీకి సుందరకాండ చూడండి.
గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.