Read in తెలుగు / ಕನ್ನಡ / தமிழ் / देवनागरी / English (IAST)
|| ప్రీతిప్రయాణోత్పతనమ్ ||
తతస్తు శింశుపామూలే జానకీం పర్యవస్థితామ్ |
అభివాద్యాబ్రవీద్దిష్ట్యా పశ్యామి త్వామిహాక్షతామ్ || ౧ ||
తతస్తం ప్రస్థితం సీతా వీక్షమాణా పునః పునః |
భర్తృస్నేహాన్వితం వాక్యం హనూమంతమభాషత || ౨ ||
కామమస్య త్వమేవైకః కార్యస్య పరిసాధనే |
పర్యాప్తః పరవీరఘ్న యశస్యస్తే బలోదయః || ౩ ||
శరైః సుసంకులాం కృత్వా లంకాం పరబలార్దనః |
మాం నయేద్యది కాకుత్స్థస్తత్తస్య సదృశం భవేత్ || ౪ ||
తద్యథా తస్య విక్రాంతమనురూపం మహాత్మనః |
భవేదాహవశూరస్య తథా త్వముపపాదయ || ౫ ||
తదర్థోపహితం వాక్యం ప్రశ్రితం హేతుసంహితమ్ |
నిశమ్య హనుమాంస్తస్యా వాక్యముత్తరమబ్రవీత్ || ౬ ||
క్షిప్రమేష్యతి కాకుత్స్థో హర్యృక్షప్రవరైర్వృతః |
యస్తే యుధి విజిత్యారీన్ శోకం వ్యపనయిష్యతి || ౭ ||
ఏవమాశ్వాస్య వైదేహీం హనుమాన్మారుతాత్మజః |
గమనాయ మతిం కృత్వా వైదేహీమభ్యవాదయత్ || ౮ ||
తతః స కపిశార్దూలః స్వామిసందర్శనోత్సుకః |
ఆరురోహ గిరిశ్రేష్ఠమరిష్టమరిమర్దనః || ౯ ||
తుంగపద్మకజుష్టాభిర్నీలాభిర్వనరాజిభిః |
సోత్తరీయమివాంభోదైః శృంగాంతరవిలంబిభిః || ౧౦ ||
బోధ్యమానమివ ప్రీత్యా దివాకరకరైః శుభైః |
ఉన్మిషంతమివోద్ధూతైర్లోచనైరివ ధాతుభిః || ౧౧ ||
తోయౌఘనిఃస్వనైర్మంద్రైః ప్రాధీతమివ సర్వతః |
ప్రగీతమివ విస్పష్టైర్నానాప్రస్రవణస్వనైః || ౧౨ ||
దేవదారుభిరత్యుచ్చైరూర్ధ్వబాహుమివ స్థితమ్ |
ప్రపాతజలనిర్ఘోషైః ప్రాక్రుష్టమివ సర్వతః || ౧౩ ||
వేపమానమివ శ్యామైః కంపమానైః శరద్ఘనైః |
వేణుభిర్మారుతోద్ధూతైః కూజంతమివ కీచకైః || ౧౪ ||
నిఃశ్వసంతమివామర్షాద్ఘోరైరాశీవిషోత్తమైః |
నీహారకృతగంభీరైర్ధ్యాయంతమివ గహ్వరైః || ౧౫ ||
మేఘపాదనిభైః పాదైః ప్రక్రాంతమివ సర్వతః |
జృంభమాణమివాకాశే శిఖరైరభ్రమాలిభిః || ౧౬ ||
కూటైశ్చ బహుధాకీర్ణైః శోభితం బహుకందరైః |
సాలతాలాశ్వకర్ణైశ్చ వంశైశ్చ బహుభిర్వృతమ్ || ౧౭ ||
లతావితానైర్వితతైః పుష్పవద్భిరలంకృతమ్ |
నానామృగగణాకీర్ణం ధాతునిష్యందభూషితమ్ || ౧౮ ||
బహుప్రస్రవణోపేతం శిలాసంచయసంకటమ్ |
మహర్షియక్షగంధర్వకిన్నరోరగసేవితమ్ || ౧౯ ||
లతాపాదపసంబాధం సింహాధ్యుషితకందరమ్ |
వ్యాఘ్రసంఘసమాకీర్ణం స్వాదుమూలఫలోదకమ్ || ౨౦ ||
తమారురోహ హనుమాన్పర్వతం పవనాత్మజః |
రామదర్శనశీఘ్రేణ ప్రహర్షేణాభిచోదితః || ౨౧ ||
తేన పాదతలాక్రాంతా రమ్యేషు గిరిసానుషు |
సఘోషాః సమశీర్యంత శిలాశ్చూర్ణీకృతాస్తతః || ౨౨ ||
స తమారుహ్య శైలేంద్రం వ్యవర్ధత మహాకపిః |
దక్షిణాదుత్తరం పారం ప్రార్థయఁల్లవణాంభసః || ౨౩ ||
అధిరుహ్య తతో వీరః పర్వతం పవనాత్మజః |
దదర్శ సాగరం భీమం మీనోరగనిషేవితమ్ || ౨౪ ||
స మారుత ఇవాకాశం మారుతస్యాత్మసంభవః |
ప్రపేదే హరిశార్దూలో దక్షిణాదుత్తరాం దిశమ్ || ౨౫ ||
స తదా పీడితస్తేన కపినా పర్వతోత్తమః |
రరాస సహ తైర్భూతైః ప్రవిశన్వసుధాతలమ్ || ౨౬ ||
కంపమానైశ్చ శిఖరైః పతద్భిరపి చ ద్రుమైః |
తస్యోరువేగోన్మథితాః పాదపాః పుష్పశాలినః || ౨౭ ||
నిపేతుర్భూతలే రుగ్ణాః శక్రాయుధహతా ఇవ |
కందరోదరసంస్థానాం పీడితానాం మహౌజసామ్ || ౨౮ ||
సింహానాం నినదో భీమో నభో భిందన్స శుశ్రువే |
స్రస్తవ్యావిద్ధవసనా వ్యాకులీకృతభూషణాః || ౨౯ ||
విద్యాధర్యః సముత్పేతుః సహసా ధరణీధరాత్ |
అతిప్రమాణా బలినో దీప్తజిహ్వా మహావిషాః || ౩౦ ||
నిపీడితశిరోగ్రీవా వ్యవేష్టన్త మహాహయః |
కిన్నరోరగగంధర్వయక్షవిద్యాధరాస్తదా || ౩౧ ||
పీడితం తం నగవరం త్యక్త్వా గగనమాస్థితాః |
స చ భూమిధరః శ్రీమాన్బలినా తేన పీడితః || ౩౨ ||
సవృక్షశిఖరోదగ్రః ప్రవివేశ రసాతలమ్ |
దశయోజనవిస్తారస్త్రింశద్యోజనముచ్ఛ్రితః || ౩౩ ||
ధరణ్యాం సమతాం యాతః స బభూవ ధరాధరః |
స లిలంఘయిషుర్భీమం సలీలం లవణార్ణవమ్ |
కల్లోలాస్ఫాలవేలాంతముత్పపాత నభో హరిః || ౩౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే షట్పంచాశః సర్గః || ౫౬ ||
సుందరకాండ – సప్తపంచాశః సర్గః (౫౭) >>
సంపూర్ణ వాల్మీకి సుందరకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
