Read in తెలుగు / ಕನ್ನಡ / தமிழ் / देवनागरी / English (IAST)
|| హనూమత్సందేశః ||
మణిం దత్త్వా తతః సీతా హనుమంతమథాబ్రవీత్ |
అభిజ్ఞానమభిజ్ఞాతమేతద్రామస్య తత్త్వతః || ౧ ||
మణిం తు దృష్ట్వా రామో వై త్రయాణాం సంస్మరిష్యతి |
వీరో జనన్యా మమ చ రాజ్ఞో దశరథస్య చ || ౨ ||
స భూయస్త్వం సముత్సాహే చోదితో హరిసత్తమ |
అస్మిన్కార్యసమారంభే ప్రచింతయ యదుత్తరమ్ || ౩ ||
త్వమస్మిన్కార్యనిర్యోగే ప్రమాణం హరిసత్తమ |
హనుమన్యత్నమాస్థాయ దుఃఖక్షయకరో భవ || ౪ ||
తస్య చింతయతో యత్నో దుఃఖక్షయకరో భవేత్ |
స తథేతి ప్రతిజ్ఞాయ మారుతిర్భీమవిక్రమః || ౫ ||
శిరసాఽఽవంద్య వైదేహీం గమనాయోపచక్రమే |
జ్ఞాత్వా సంప్రస్థితం దేవీ వానరం మారుతాత్మజమ్ || ౬ ||
బాష్పగద్గదయా వాచా మైథిలీ వాక్యమబ్రవీత్ |
కుశలం హనుమన్బ్రూయాః సహితౌ రామలక్ష్మణౌ || ౭ ||
సుగ్రీవం చ సహామాత్యం వృద్ధాన్సర్వాంశ్చ వానరాన్ |
బ్రూయాస్త్వం వానరశ్రేష్ఠ కుశలం ధర్మసంహితమ్ || ౮ ||
యథా స చ మహాబాహుర్మాం తారయతి రాఘవః |
అస్మాద్దుఃఖాంబుసంరోధాత్త్వం సమాధాతుమర్హసి || ౯ ||
జీవంతీం మాం యథా రామః సంభావయతి కీర్తిమాన్ |
తత్తథా హనుమన్వాచ్యో వాచా ధర్మమవాప్నుహి || ౧౦ ||
నిత్యముత్సాహయుక్తాశ్చ వాచః శ్రుత్వా త్వయేరితాః |
వర్ధిష్యతే దాశరథేః పౌరుషం మదవాప్తయే || ౧౧ ||
మత్సందేశయుతా వాచస్త్వత్తః శ్రుత్వైవ రాఘవః |
పరాక్రమవిధిం వీరో విధివత్సంవిధాస్యతి || ౧౨ ||
సీతాయా వచనం శ్రుత్వా హనుమాన్మారుతాత్మజః |
శిరస్యంజలిమాధాయ వాక్యముత్తరమబ్రవీత్ || ౧౩ ||
క్షిప్రమేష్యతి కాకుత్స్థో హర్యృక్షప్రవరైర్వృతః |
యస్తే యుధి విజిత్యారీన్ శోకం వ్యపనయిష్యతి || ౧౪ ||
న హి పశ్యామి మర్త్యేషు నాసురేషు సురేషు వా |
యస్తస్య క్షిపతో బాణాన్స్థాతుముత్సహతేఽగ్రతః || ౧౫ ||
అప్యర్కమపి పర్జన్యమపి వైవస్వతం యమమ్ |
స హి సోఢుం రణే శక్తస్తవ హేతోర్విశేషతః || ౧౬ ||
స హి సాగరపర్యంతాం మహీం శాసితుమీహతే |
త్వన్నిమిత్తో హి రామస్య జయో జనకనందిని || ౧౭ ||
తస్య తద్వచనం శ్రుత్వా సమ్యక్సత్యం సుభాషితమ్ |
జానకీ బహు మేనేఽథ వచనం చేదమబ్రవీత్ || ౧౮ ||
తతస్తం ప్రస్థితం సీతా వీక్షమాణా పునః పునః |
భర్తృస్నేహాన్వితం వాక్యం సౌహార్దాదనుమానయత్ || ౧౯ ||
యది వా మన్యసే వీర వసైకాహమరిందమ |
కస్మింశ్చిత్సంవృతే దేశే విశ్రాంతః శ్వో గమిష్యసి || ౨౦ ||
మమ చేదల్పభాగ్యాయాః సాన్నిధ్యాత్తవ వానర |
అస్య శోకస్య మహతో ముహూర్తం మోక్షణం భవేత్ || ౨౧ ||
గతే హి హరిశార్దూల పునరాగమనాయ తు |
ప్రాణానామపి సందేహో మమ స్యాన్నాత్ర సంశయః || ౨౨ ||
తవాదర్శనజః శోకో భూయో మాం పరితాపయేత్ |
దుఃఖాద్దుఃఖపరామృష్టాం దీపయన్నివ వానర || ౨౩ ||
అయం చ వీర సందేహస్తిష్ఠతీవ మమాగ్రతః |
సుమహాంస్త్వత్సహాయేషు హర్యృక్షేషు హరీశ్వర || ౨౪ ||
కథం ను ఖలు దుష్పారం తరిష్యంతి మహోదధిమ్ |
తాని హర్యృక్షసైన్యాని తౌ వా నరవరాత్మజౌ || ౨౫ ||
త్రయాణామేవ భూతానాం సాగరస్యాస్య లంఘనే |
శక్తిః స్యాద్వైనతేయస్య తవ వా మారుతస్య వా || ౨౬ ||
తదస్మిన్కార్యనిర్యోగే వీరైవం దురితక్రమే |
కిం పశ్యసి సమాధానం త్వం హి కార్యవిదాం వరః || ౨౭ ||
కామమస్య త్వమేవైకః కార్యస్య పరిసాధనే |
పర్యాప్తః పరవీరఘ్న యశస్యస్తే ఫలోదయః || ౨౮ ||
బలైః సమగ్రైర్యది మాం రావణం జిత్య సంయుగే |
విజయీ స్వపురీం యాయాత్తత్తు మే స్యాద్యశస్కరమ్ || ౨౯ ||
శరైస్తు సం‍కులాం కృత్వా లంకాం పరబలార్దనః |
మాం నయేద్యది కాకుత్స్థస్తత్తస్య సదృశం భవేత్ || ౩౦ ||
తద్యథా తస్య విక్రాంతమనురూపం మహాత్మనః |
భవేదాహవశూరస్య తథా త్వముపపాదయ || ౩౧ ||
తదర్థోపహితం వాక్యం సహితం హేతుసంహితమ్ |
నిశమ్య హనుమాఞ్శేషం వాక్యముత్తరమబ్రవీత్ || ౩౨ ||
దేవి హర్యృక్షసైన్యానామీశ్వరః ప్లవతాం వరః |
సుగ్రీవః సత్త్వసంపన్నస్తవార్థే కృతనిశ్చయః || ౩౩ ||
స వానరసహస్రాణాం కోటీభిరభిసంవృతః |
క్షిప్రమేష్యతి వైదేహి రాక్షసానాం నిబర్హణః || ౩౪ ||
తస్య విక్రమసంపన్నాః సత్త్వవంతో మహాబలాః |
మనః సంకల్పసంపాతా నిదేశే హరయః స్థితాః || ౩౫ ||
యేషాం నోపరి నాధస్తాన్న తిర్యక్సజ్జతే గతిః |
న చ కర్మసు సీదంతి మహత్స్వమితతేజసః || ౩౬ ||
అసకృత్తైర్మహోత్సాహైః ససాగరధరాధరా |
ప్రదక్షిణీకృతా భూమిర్వాయుమార్గానుసారిభిః || ౩౭ ||
మద్విశిష్టాశ్చ తుల్యాశ్చ సంతి తత్ర వనౌకసః |
మత్తః ప్రత్యవరః కశ్చిన్నాస్తి సుగ్రీవసన్నిధౌ || ౩౮ ||
అహం తావదిహ ప్రాప్తః కిం పునస్తే మహాబలాః |
న హి ప్రకృష్టాః ప్రేష్యంతే ప్రేష్యంతే హీతరే జనాః || ౩౯ ||
తదలం పరితాపేన దేవి శోకో వ్యపైతు తే |
ఏకోత్పాతేన తే లంకామేష్యంతి హరియూథపాః || ౪౦ ||
మమ పృష్ఠగతౌ తౌ చ చంద్రసూర్యావివోదితౌ |
త్వత్సకాశం మహాసత్త్వౌ నృసింహావాగమిష్యతః || ౪౧ ||
తౌ హి వీరౌ నరవరౌ సహితౌ రామలక్ష్మణౌ |
ఆగమ్య నగరీం లంకాం సాయకైర్విధమిష్యతః || ౪౨ ||
సగణం రావణం హత్వా రాఘవో రఘునందనః |
త్వామాదాయ వరారోహే స్వపురం ప్రతియాస్యతి || ౪౩ ||
తదాశ్వసిహి భద్రం తే భవ త్వం కాలకాంక్షిణీ |
న చిరాద్ద్రక్ష్యసే రామం ప్రజ్వలంతమివానలమ్ || ౪౪ ||
నిహతే రాక్షసేంద్రేఽస్మిన్సపుత్రామాత్యబాంధవే |
త్వం సమేష్యసి రామేణ శశాంకేనేవ రోహిణీ || ౪౫ ||
క్షిప్రం త్వం దేవి శోకస్య పారం యాస్యసి మైథిలి |
రావణం చైవ రామేణ నిహతం ద్రక్ష్యసేఽచిరాత్ || ౪౬ ||
ఏవమాశ్వాస్య వైదేహీం హనుమాన్మారుతాత్మజః |
గమనాయ మతిం కృత్వా వైదేహీం పునరబ్రవీత్ || ౪౭ ||
తమరిఘ్నం కృతాత్మానం క్షిప్రం ద్రక్ష్యసి రాఘవమ్ |
లక్ష్మణం చ ధనుష్పాణిం లంకాద్వారముపస్థితమ్ || ౪౮ ||
నఖదంష్ట్రాయుధాన్వీరాన్సింహశార్దూలవిక్రమాన్ |
వానరాన్వారణేంద్రాభాన్క్షిప్రం ద్రక్ష్యసి సం‍గతాన్ || ౪౯ ||
శైలాంబుదనికాశానాం లంకామలయసానుషు |
నర్దతాం కపిముఖ్యానామార్యే యూథాన్యనేకశః || ౫౦ ||
స తు మర్మణి ఘోరేణ తాడితో మన్మథేషుణా |
న శర్మ లభతే రామః సింహార్దిత ఇవ ద్విపః || ౫౧ ||
మా రుదో దేవి శోకేన మా భూత్తే మనసోఽప్రియమ్ |
శచీవ పత్యా శక్రేణ భర్త్రా నాథవతీ హ్యసి || ౫౨ ||
రామాద్విశిష్టః కోఽన్యోఽస్తి కశ్చిత్సౌమిత్రిణా సమః |
అగ్నిమారుతకల్పౌ తౌ భ్రాతరౌ తవ సంశ్రయౌ || ౫౩ ||
నాస్మిం‍శ్చిరం వత్స్యసి దేవి దేశే
రక్షోగణైరధ్యుషితేఽతిరౌద్రే |
న తే చిరాదాగమనం ప్రియస్య
క్షమస్వ మత్సంగమకాలమాత్రమ్ || ౫౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే ఏకోనచత్వారింశః సర్గః || ౩౯ ||
సుందరకాండ – చత్వారింశః సర్గః (౪౦) >>
సంపూర్ణ వాల్మీకి సుందరకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
