Read in తెలుగు / ಕನ್ನಡ / தமிழ் / देवनागरी / English (IAST)
|| హనూమత్ప్రేషణమ్ ||
శ్రుత్వా తు వచనం తస్య వాయుసూనోర్మహాత్మనః |
ఉవాచాత్మహితం వాక్యం సీతా సురసుతోపమా || ౧ ||
త్వాం దృష్ట్వా ప్రియవక్తారం సంప్రహృష్యామి వానర |
అర్ధసంజాతసస్యేవ వృష్టిం ప్రాప్య వసుంధరా || ౨ ||
యథా తం పురుషవ్యాఘ్రం గాత్రైః శోకాభికర్శితైః |
సంస్పృశేయం సకామాహం తథా కురు దయాం మయి || ౩ ||
అభిజ్ఞానం చ రామస్య దద్యా హరిగణోత్తమ |
క్షిప్తామిషీకాం కాకస్య కోపాదేకాక్షిశాతనీమ్ || ౪ ||
మనఃశిలాయాస్తిలకో గండపార్శ్వే నివేశితః |
త్వయా ప్రనష్టే తిలకే తం కిల స్మర్తుమర్హసి || ౫ ||
స వీర్యవాన్కథం సీతాం హృతాం సమనుమన్యసే |
వసంతీం రక్షసాం మధ్యే మహేంద్రవరుణోపమః || ౬ ||
ఏష చూడామణిర్దివ్యో మయా సుపరిరక్షితః |
ఏతం దృష్ట్వా ప్రహృష్యామి వ్యసనే త్వామివానఘ || ౭ ||
ఏష నిర్యాతితః శ్రీమాన్మయా తే వారిసంభవః |
అతః పరం న శక్ష్యామి జీవితుం శోకలాలసా || ౮ ||
అసహ్యాని చ దుఃఖాని వాచశ్చ హృదయచ్ఛిదః |
రాక్షసీనాం సుఘోరాణాం త్వత్కృతే మర్షయామ్యహమ్ || ౯ ||
ధారయిష్యామి మాసం తు జీవితం శత్రుసూదన |
మాసాదూర్ధ్వం న జీవిష్యే త్వయా హీనా నృపాత్మజ || ౧౦ ||
ఘోరో రాక్షసరాజోఽయం దృష్టిశ్చ న సుఖా మయి |
త్వాం చ శ్రుత్వా విషజ్జంతం న జీవేయమహం క్షణమ్ || ౧౧ ||
వైదేహ్యా వచనం శ్రుత్వా కరుణం సాశ్రుభాషితమ్ |
అథాఽబ్రవీన్మహాతేజా హనుమాన్మారుతాత్మజః || ౧౨ ||
త్వచ్ఛోకవిముఖో రామో దేవి సత్యేన తే శపే |
రామే దుఃఖాభిభూతే తు లక్ష్మణః పరితప్యతే || ౧౩ ||
కథంచిద్భవతీ దృష్టా న కాలః పరిశోచితుమ్ |
ఇమం ముహూర్తం దుఃఖానామంతం ద్రక్ష్యసి భామిని || ౧౪ ||
తావుభౌ పురుషవ్యాఘ్రౌ రాజపుత్రావరిందమౌ |
త్వద్దర్శనకృతోత్సాహౌ లంకాం భస్మీకరిష్యతః || ౧౫ ||
హత్వా తు సమరే క్రూరం రావణం సహబాంధవమ్ |
రాఘవౌ త్వాం విశాలాక్షి స్వాం పురీం ప్రాపయిష్యతః || ౧౬ ||
యత్తు రామో విజానీయాదభిజ్ఞానమనిందితే |
ప్రీతిసంజననం తస్య భూయస్త్వం దాతుమర్హసి || ౧౭ ||
సాఽబ్రవీద్దత్తమేవేతి మయాభిజ్ఞానముత్తమమ్ |
ఏతదేవ హి రామస్య దృష్ట్వా మత్కేశభూషణమ్ || ౧౮ ||
శ్రద్ధేయం హనుమన్వాక్యం తవ వీర భవిష్యతి |
స తం మణివరం గృహ్య శ్రీమాన్ప్లవగసత్తమః || ౧౯ ||
ప్రణమ్య శిరసా దేవీం గమనాయోపచక్రమే |
తముత్పాతకృతోత్సాహమవేక్ష్య హరిపుంగవమ్ || ౨౦ ||
వర్ధమానం మహావేగమువాచ జనకాత్మజా |
అశ్రుపూర్ణముఖీ దీనా బాష్పగద్గదయా గిరా || ౨౧ ||
హనుమన్సింహసంకాశౌ భ్రాతరౌ రామలక్ష్మణౌ |
సుగ్రీవం చ సహామాత్యం సర్వాన్బ్రూయా హ్యనామయమ్ || ౨౨ ||
యథా చ స మహాబాహుర్మాం తారయతి రాఘవః |
అస్మాద్దుఃఖాంబుసంరోధాత్త్వం సమాధాతుమర్హసి || ౨౩ ||
ఇమం చ తీవ్రం మమ శోకవేగం
రక్షోభిరేభిః పరిభర్త్సనం చ |
బ్రూయాస్తు రామస్య గతః సమీపం
శివశ్చ తేఽధ్వాస్తు హరిప్రవీర || ౨౪ ||
స రాజపుత్ర్యా ప్రతివేదితార్థః
కపిః కృతార్థః పరిహృష్టచేతాః |
అల్పావశేషం ప్రసమీక్ష్య కార్యం
దిశం హ్యుదీచీం మనసా జగామ || ౨౫ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే చత్వారింశః సర్గః || ౪౦ ||
సుందరకాండ – ఏకచత్వారింశః సర్గః (౪౧) >>
సంపూర్ణ వాల్మీకి సుందరకాండ చూడండి.
గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.